IBRANI 10 - Allah Wene Fano Wene Hupla Inane

¹ It afuni Yahudi mene wene Allah nen komotninafikhe wene andi higithogo hilingiti logolik, ebe mene hilingiti lagaukwa fuk. We, ebe hobuk fanotninabigin mene werek kwelek, oba lirogo hilingitik, alik waganogo hilingitik, ikhi lagaukwa. It a'nogo hilingiti logolik, o mo lagagik, pigik, ugu kwelek, yi tahun ti tahun wam Allah faget wareti lagaukwa mene andi mene nek wareto mondok welagaukwa andi nen he, it afuni wam Allah faget waresi waga lagaukwa mene halok andiba nen katokhogo fanorinabigin elo'lek aga lagaikhe andi.

² It katokhogo horinabilepma re, ”Nit weak hilingito,” iluk inendawimo enggin logolik, menenei ebeti lagaukwa mene andi lek a'lepsik he, inanggo warogo Allah wogosi waga logoilep lego.

^3-4 Afuni weak hilingitarek mene andi wam sapi inom, kambing inom, amep oba horinabigin elo'lek andi nen he, hundik-handik wam warogo Allah wogeti lagaukwa andiba, afuni weak hilingiti lagaukwa mene inendawimo eberisikhi lagaikhe andi.

⁵ A'nogo hilingiti lagaukwa andi nen, at Kristus kweangma pi waga logolik, Allah mel yagatikhe: ”Hat he, afuni nen wam wathetik, yi mene ti mene wokhetik, agarek andi mene wokheti logogun habit andi nen he, an nebe afuni hangge hilingisogo nobagagin yi o.

⁶ Hat faget wam warogo endu nolhetarek andi inom, weak hilingitarek mene horinabinogeluk wam warogo wokhetarek andi inom, habiraro.

⁷ Andi nen he, Allah neisena. An nen wene yagahesik. Hat haneba re, wene an nen yagahesu hak, An nen hat hendawimo hamolo mene hilingisigeluk wesigin, iluk wene an faget lisu palogo fesukwama werek andi, ebe hilingisigeluk nebe wagarik welagi yi o,” iluk yagatikhe.

⁸ At Kristus nen wene attagat yagatikhe andi re, ”Afuni nen hat wam wathetik, yi mene ti mene wokhetik, endumo nolhetik, weak hilingitarek mene horinabinogeluk wam wathetik, agarek andi, hat habiraro,” isikhe andi, Allah nen komotninafikhe wene andi higithogo hilingiti lagaukwa mene faget isikhe.

⁹ Wene a'nogo arat yagatikhesik hobuk mel yagatikhe: ”Allah neisena. An nen hat hendawimo hamolo mene andiat hilingisigeluk nebe wagarik welagi o,” iluk yagatikhe. A'nogo yagatikhe andi re, Allah nen it attak hilingiti lagaukwa wene andi legetfisaluk, hobuk Kristus wa'lasigin andiat logouwago, isikhe andi nen a'nogo yagatikhe.

¹⁰ Nen, at Yesus Kristus Allah endawimo amolo mene andi hilingiti logolik, at ebe misigam faget wa'laga logolik, Allah wogetikhe andiba, nit ninebe Allah faget mondok-mondok ninobagaikhemo welago.

¹¹ It ap Allah eisewerek inebe lombogen afuni faget hilingiti logolik he, hundik-handik hobugalep wam wareti lagaukwa andi mene nek warogo Allah wogeti lagaukwa andi nen, Allah nen it weak hilingiti lagaukwa mene korogo wokhagain he, mondok elo'lek agaikhe andi o.

¹² A'nogo meneat he, at Kristus enek he, nit afuni weak hilingitorek mene faget enggi misigam wa'laga logolik, ebe mondok-mondok Allah wogetikhesik, era'lu enggi ebekwe hu'lasi lagaikhesik kain welagarek andi.

¹³ A'nogo logolik he, at inom weak mene Allah nen awe a'ma andogorogo fisa wagunem eisogen alperelinabigin andi nek oan nen nenangorogo werego.

¹⁴ At Kristus misigam faget wa'laga logolik, ebe Allah wogetikhe andiba, nit afuni ninebe Allah faget fisogorek mene halok katokhogo mondok ho'ninafikhe.

¹⁵ At Allah Areagun en, wene andi faget abok yaganisikhi logolik, wene attagat mel isikhe:

¹⁶ ”At Allah nen, hobuk, an nen it wene ket mene warogo woginabigin andi re, wene ebe yiat warogo woginabigin: komorinafirek wene andi inendawimo fisigik, inendawinggenma lisu palhik, igin o,” iluk isikhesik he,

¹⁷ ”An nen it weak hilingitik, komore'lek weak hilingitik, agarek mene andi arat nonggoretfisambik, nendawimo eberek logogin mondok lego,” iluk hobuk isikhemo lisu palogo fesukwa andi.

¹⁸ Andi nen he, nit afuni komore'lek ninobabut weak hilingitorek mene, at Allah nen arat sebelogo legetfisasikhe andi nen he, nit weak hilingitorek mene ho'ninabuageluk ninanggo Allah faget warogo hobuk fisogoin mondok lego.

”Nit ninailo lekhogo Allah oba horokhogo kwikhi logogun,” iluk yagaisasukwa wene

¹⁹ Nerugwi nagaila'lak. At Yesus amep wulagaisogo wa'lagaikhe andiba, nit Allah onggwarek aiba andoma ninailo lekhogoat kuogo.

²⁰ Nit a'nogo kugun andi re, o hulu su meneba huli warek andi, at Yesus ebeat. Mene re, nit afuni nineluget ninabigin oba kuageluk, kwe at Yesus ebe wa'lagaikhe andiba, kwe ket mene nit faget yatikhe.

²¹ Yatikhesik, at ebe Allah aiba andomaat eisewerek nit faget kain welagarego.

²² At ebe andoma were'ma, nit ninendawimo nen he, ”Nit weak hilingito,” iluk ninendawimo menenei ebetorek mene fano hotninafik, ninagap ebene i elokhonggen fano meneba sobalninafik, isikhe andi nen he, ninendawinggen misigat at oba himbiret fuluk ninailo lekhogo, at oba horokhogo kwikhi logouwogo.

²³ At obabut he, ”Wokhisagain,” iluk abok yaganisikheresigen he, ebe wo'nisikheregat andi, niren he, ”Eberogoat tiphogo wo'nisagain,” iluk afuni ineilhanem ninane fakhogo ogorek mene andi ugu mondok logolik, ninghogo fisogo logouwogo.

²⁴ A'nogo fisogo logolik, nit-nit nendawi-hendawirogo logolik, lebet-lebet hilingiti logouwogeluk, ninendawinggen ago wat-wat ikhi logouwogo.

²⁵ Ninoe enggi welagi'legat wesigin iluk ninelu andi nen he, nit andogotunem it ekhe kamo agarek andi hak, nit kamo igi'lek he, oba ebet-ebet nit-nit ninendawinggen ago warogo komo-komo ikhi logouwogo.

²⁶ Ebe wene Allah ane yaganisasukwa mene ninelu logoligat he, nineranenat wene andi sagalogo herakfisaluk weak mondogat hilingiti logogun halok he, nit hobuk ninanggo Allah faget waresumo ho'ninabigin mondok legaro.

²⁷ Allah a'mage lagambik o wurep oba wene inoba figik, kotik, igin andiba, at inom weak mene halok inebe endu aik oba inoati logolik, nit at ane herakfisaluk weak hilingiti logogun halok, ninomat ninoasinogo iluk, niren futfuluk ninailorogoat logouwogo.

²⁸ Wene Allah nen komotninafikhemo, at Musa nen yaganisasikhe wene andi, it afuni nen hologo higithogo hilingiti'lek sagalogo herakfisugu halok, afuni inebe pire a, henagan a, ”Nit nineilhanem iren eberogoat wene andi sagalogo herakfisaga o,” iluk fakhogo ugu halok, inendawirinafi'lek inebe mondok inoati lagaukwa anggigi.

²⁹ Andi hak, it afuni nen Allah amlogo meneat he, ineisogen al perelogo herakfisigik, Allah nen nit ninom hunesuogeluk Kristus wa'lagaikhe andiba amep oba fano horinafikhe meneat he, hobuk inendawimo nen sebelfigik, Allah obabut fano mene Areagun a'nogo inane asegen wokhigik, ugu halok he, wene mondok enggin mene inoba fembik weagerinabigin o.

³⁰ ”Unggulmo an nen inoatik, onggo an nen figik, igin o,” iluk isikhe andi, sa nen isikhe nogo. Allah nenat isikhe ninelu o. Nen, wene ekhe mel isikhe: ”An ineisena noba lombogen nagainafuri wene inoba figik, kotik, igin o,” iluk isikheat.

³¹ Wene a'nogo inoba fagain andi, nit weak hilingitunem ninebe Allah eluk mondok welagarek mene enggiba ninobagaikhe halok, ninailo mondok asigin andi.

³² Nerugwi nagaila'lak. Hit attak Allah nen hinebe seleget hinafikhemo were'ma yi enggin ti enggin wiik-weakhogo hilinghinafu kwelek, hinafe morogo ninghogo welagagip andi hinendawimo ebe'no o.

³³ A'nogo logolik, hit ekhe afuni andogore'ma hinenu wiik-weakhogo weak hilinghinafunem, hit ekhe nen, ”Nit ninomat weagetninabuak,” iluk inoba kugunem hinomat weak hilinghinafik,

³⁴ it ekhe hele warogo kwelakfisugunem hinendawirinafik, ikhi lagagip andi. A'nogo hilingiti logolik hinendawimo nen he, ”Nit mene ningsek fano mondok logogin mene werego,” iluk anggikhi logolik he, hit mene yi mene ti mene helugunem hinendawimo weak agi'lek hinagaiyek anggikhi lagagip andi.

³⁵ Halok he, attak weak hilinghinafu kwelek hinendawimo puk welagagip mene andi kobokhogo herakfisigi'lek, yogondak ya a'nogoat logogun halok, onggo hokho mene wokhisagain andi nen he, ninghogo logoino o.

³⁶ Hiren Allah endawimo amolo anggikherek mene hilingitunem, aren, ”Hit wokhisagain,” iluk abok yagahisasikhe mene andi wanubagaigen he, hinafe morogo hilingiti logoino.

³⁷ Allah aneba lisu yi'nogo palek werek: ”At wesigin andi re, eil misik logombigen wesigin. Ekhe inom logombigen wesigin lego. We, weak-weagat wesigin o.

³⁸ At wesigin andi, oan wagi'lek werek kwelek, it an nagainafuri wene inoba korogo an ninom hunogo inobagagi mene halok inebe lombok, inendawinggen noba himbiret fuluk logogun oba ineluk logogun. Meneat he, afuni it mene ekhe inambotkwe wulibugun mene halok inebe lombok, it andi inoba an nen nagaiyek welagi lek. andi nen an nabiro,” iluk isikhemo lisu palogo fesukwa.

³⁹ A'nogo meneat he, nit he, it afuni ekhe alomat lasuogeluk inambotkwe wulibugun mene andi hangge welago fuk. Lego. Nit he, ninebe telninabuageluk ninendawinggen at oba himbirik welago mene welago o.