IBRANI 1 - Allah Wene Fano Wene Hupla Inane

At Allah nen ane at amlogo yagatikhemo, aren nit yaganisasikhe wene

¹ O attagat, at Allah nen it ap at ane yagaisikhi lagaukwa mene omanogo enggi hundik-handigat wene at ekhe yagatik, at ekhe yagatik, hunogo-hunogoat yagaisugunem he, iren nit ninambu ninombalak yagaisikhi lagaukwa.

² Meneat he, o wurep oba, nit yogondak welago yaba re, Allah nen wene andi amlogo yagatikhemo, aren nit yaganisa wagaikhe. Amlogo andi re, eroba Allah nen yi mene ti mene mondogat elalhikhe andi, ebe at amlogo nenat elalhikhemo, eisewerek logouwageluk menfesikhemo welagarek andi.

³ Mo eil tilelek-walelek lakfei wagarek andi hak, Allah ebe fogeratarek mene a'nogo nen, Yesus ebe lakfei wagaikhemo kweangma selekhogo logolik, eisena obali'mo at ebeat welagarek. A'nogo logolik, yi mene ti mene mondogat welagarek andi, at ane omameba welagarek. Were'ma, nit weak hilingiti lagagu mene korogo legetfisasikhesik he, Allah Enupogot esin mene a'nogo oba lagasikhesik era'lu kainat welagarek andi.

Malaikat sebelek meneat he, Allah amlogo enek he, esin lego welagarek wene

⁴ At Allah nen he, it malaikat omanogo inenu sebelek hangge werek kwelek, at Yesus enek he, enu lego kain esin logouwageluk salinafikhe hagat, it malaikat inebe sebelek hangge werek kwelek, Yesus ebe lego kain esin welagarek andi.

⁵ Allah nen at yagati logolik, ”Hat An namlogo o. Hebe yogondak takhafi,” iluk, yagatikhe andi hak, it malaikat mene ekhe wene a'nogo yagaisasikhe nogo? Lego. Nen ekhe re, ”An he, at eisena asigin. Nen, athe, an namlogo asuak,” iluk it malaikat ekhe yagaisasikhe nogo? Legaro.

⁶ Andi nen he, Allah nen amlogo misigat tago kweangma yoma pelakfei wagaikhe andi sambul he, it malaikat yi'nogo yagaisasikhe: ”Hit An nagoromi malaikat mondogat he, at enek oba himbirik logolik fogerati logoino o,” iluk yagaisasikhe.

⁷ Nen, ekhe re, it malaikat faget mel isikhe: ”An nen it malaikat inebe o sogoi hangge hilingisogo fisigik, it yonggo lakfisigirek mene inebe endu amulok hangge hilingisogo fisigik, igirek,” iluk isikhe.

⁸ Meneat he, amlogo yagati logolik: ”Hat hebe Allah at logolik, yi afuni ti afuni ferinarek mondok logogin. A'nogo logolik, wene higithogo nek pilingisikhi logogin o.

⁹ Nen, hat hobabut he, higithogo nek hilingitendek andi mene hilingiti logolik, weak hilingiti logogun mene hapsiri andi nen he, hagaila'lak hinom welagep mene inawe a'ma hangge werek kwelek, hat enek he, hunggul oba amusu kweisalogo menhobagasigi andi nen he, hendawimo hagaiyek hokhorogo anggikhi logoino,” iluk yagatikhesik,

¹⁰ wene ekhe yi'nogo yagatikheat: ”Hat Henupogoratma re, eroba nen he, kweang tik watik, pogot henggiba elalhik, isigin andi.

¹¹ Mondogat elalhigin mene andi, su hangge mining asimbik hobuk legasigin meneat he, hat enek he, hetok mondok logogin o.

¹² Kweang pogot andi, su yinggilogo fagarek andi hak, haren yinggilogo fembik, hobuk ket mene fagain meneat he, hat hebe nek he, o mo lagagik, pigik, ugu kwelek, ebe yaman agi'lek hetok mondok logogin o,” iluk yagatikhe.

¹³ A'nogo yagatikhesik, ekhe mel yagatikheat: ”Afuni hat hinom weak mene omanogo heisogen alperelogo fisanogen An nen oan hoba fisa wagi'lek werek kwelek, hat An nera'lu nenggi ebekwe hebe kain logoinok,” iluk, it malaikat mene omanogo ekhe yagatikhe nogo? Legaro.

¹⁴ Allah agoromi malaikat andi inebe re, ninggi'nogo hilingitarek mene nogo. It inebe inareagun hangge mene, nit Allah nen telninabigin mene halok lebe'nisikhi logouwageluk, aren inayonggo fuluk lakfisa wagarek mene aro.