HOSEA 9 - Allah Wene Fano Wene Hupla Inane

Israel mene unggum inoba fagain mene faget fagetikhe wene

¹ Hit afuni Israel mene yi sani, hiren linggene lego mene omanogo faget ebeti logolik halok he, it inunggulenu amu mene nen hilingiri'lagwi andoma hakhogo hilingiti logogubo. Hit he, hineisena Allah a'nogo herakfisegepsik at oba tiphogo welagi'legengge hilingiti lagep. Gandum enggen lolhukwe omanogo mondogat he hit hinebe uang herakhikhi logolik dewa baal oba hambenan hilingiti lagep, nen hit he, gandum dewa andi nen onggo wo'nisili'lago iluk helugu mene faget enek hinagaiyek welagep!

² Oba nen we eil misik logombik andem oba hit hinangge gandum enggen inom, zaitun amusu inom, anggur inom mondogat lekhogo nek logogun.

³ Yago, hit afuni Israel mene re kweang hineisena Tuhan nen wokhisasikheba andoma femhogo logogun lek. Hit mene fena re nekhengge sugulogo o Mesir logoin, nen fena re o Asyur oba andoma nen nunggunggere saliogengge mene omanogo ninggi logogun.

⁴ Hit ap pok mene inanggele'ma andoma logolik hiren anggur inom wam inom Tuhan endawimo agaiyek hoageluk fuluk wogeti logogun lek. Hiren ninggi logogun mene andoma re, ap ware'ma fongma andoma logolik nunggunem emetlagaikharek a'nogo hak emethinafi logogin. Nunggungge andoma re we hinalabutmo homot hinobauwageluk ninggi logogun oba nen endebengge ekhe o Tuhan awi wuri'mo omanogo wogosugun nen iluk waluk laga logogun lek.

⁵ Linggene ekhe seni isati logolik Tuhan agaugwetfuluk legeisogo fugu sambul he, hiren wene andi faget hilingisugun iluk yi'nogo ti'nogo ekhe hilingisugun mene re elo'lek aga logogin.

⁶ Enggin mene hinoba asi wagunem, nen hit hinebe wokhinarek o ekhema hinobagai lagunem, it fena hit hinanggele'kwe werek mene andoma re afuni Mesir mene nen inoa'luk he inebe warek o Memfis andoma salinafi logogun. Engga inom alok-alogengge inomen he, hit hinaiba wurik logogin kwe andoma inom, hinangge onggo hokho mene perak andoma inom, sebelogo fagain.

⁷ Unggum helogoin oba arat horogasi waga, iren hilingiri'lagwi mene andoma ambisangma helogoin oba faget arat horogasi waga. Israel mene andoma re, ambisangma hogoin mene werek! Hiren ikhi logolik, ”Nabi yi re munggwarengge endawimo kwikhesik! At ebe mondok wenenebo mene!” iluk ikhi lagep. Hiren a'nogo ikhi lagep andi re hit hinaweak hokhore'ma re, an noba hinabit logolik ikhi lagebo.

⁸ An he, nebe nabi logolik hit Tuhan againafuri hineluet hinobagakhi logouwageluk Allah nen la'nobagai wagaikhe, oba nen an o ekhema-ekhema laga lagikwe omanogo re, sue faget hakhogo an nobaget hele webet nobagakhi lagep. O kweang Allah onggwarek anggweangma a'nogoba nen afuni nit nabi ninap omanogo eil ninabi'lagwi.

⁹ Hiren hinobarogo mondok hokho mene fikhi lagep mene andoma re, afuni o Gibea mene nen hilingiti lagaukwa hakhogo hilingiti lagebo, ma re hit kwanirogo hilingiti lagep mene andoma Allah nen ebethambik he, hinaweak oba unggum wokhisagain.

Israel mene weak hilingitunem ambisangma wene inoba asigin wene

¹⁰ Tuhan nen ikhi logolik, ”Attak An nen Israel herakhasigi sambul andi re, afuni o leimo nen anggur enggen herakhaluk inagaiyek agaikharek hak hilingitigi. An nen attak hinombawi isasigi sambul andem he, afuni nen e ara enggen attak mene ineilenggen haluk inagaiyek agarek hak nagaiyek hasigi. Oba nen he, it inebe tom Peor oba laluk kembu baal fogeratunem, dewa iren inendawi hundik hilingiri'lagwi mene andi ebe emerek hak emetlagunem he An nen nabit anggikhi lagi o.

¹¹ Israel mene inalong welagaikharek mene andi re, sue tarogo longgo i lagarek hak legasigin, iren inomalik ina'ma agik, inagainafuri taginafik, ikhi logogun mondok lek.

¹² Oba nen iren inagainafuri taginapluk kulogo sougerinafi logogun oba nen ogore An nen woginafi logogin, Ap misik iluk ogo ekhe ineluk fisikhi logogin lek. Yago, hit Israel mene yi sani, An nen hit oboget hisagain oba andem he, hinebe alomat lakhogoin o!” ikhe.

¹³ Tuhan neisena, an neilenggen hugunem en he it inagainafuri omanogo sikmugisaluk pinggi inoatunem higi o.

¹⁴ It ap andoma faget he an nen Hat hoba nenamene kino yagaheti ha? Hemi it mene andoma re abili mene hilingfisan o! Nen, it inagainafuri andoma eilak huninafi'legengge herakfisoageluk hilinginabin, neisena.

Tuhan nen Israel mene unggum inoba fagain wene

¹⁵ Tuhan nen ikhi logolik, ”Iren weak mondok hokhorogo hilingiri'lagwi mene andoma re, o Gilgal en eroratukwa. A'nogo hilingitukwa andem huli nen An nen it inoba nabit anggugu mene a'nogo eroratigi. Nen, iren ina'mageba hilingitarek mene andi nen An nen o An nanggweang oba yoma nen mugisogo wulaginabigin, An nen it inoba nendawi hundik hilinginabigin lek; it inogogwi ferinarek mene andoma mondogaren he, An nane oak sagalogo mondok hilingiri'lagwi.

¹⁶ Afuni Israel mene re An nen unggum wogisamo, it inebe re awi yago mene omanggen pugagik, enggen iti'legengge welagik ikherek hak hilinglasugun. It inagainafuri inerembul oba tago logogun lek. Nen, it inagainafuri tago logogun oba nen ogore An nen inebe mondogat pinggi inoasigin o,” ikhe.

Nabi nen Israel mene faget isikhe wene

¹⁷ Afuni Allah againafuri nen he Allah an nen obaget hilingiti lagi mene a'nogo At ane holhu re ninabit iluk herakfisagama, it inebe re afuni inunggulenu amu mene inanggelekwe leil wati logogun o, iluk ikhe.