HOSEA 8 - Allah Wene Fano Wene Hupla Inane

It afuni Israel mene nen tugwi kembu oba fogerati lagaukwama Tuhan nen unggum wogisasikhe wene

¹ Tuhan nen ikhi logolik, ”Ap inaselei mene re sue kuri nen senggelherek engge senggeligiluk sebeli wagarek hak, An naiba omanogo it selei mene nen weim yabi weri'lagwingge re, weim waga iluk enek engge re trompet ane fu'ni o! An nagainafuri nen he An ninom wene watugu mene a'nogo taganhogo hilingitik, An nen yagaisikhi lagi mene omanogo sagalogo hilingitik, ili'lagwi andi.

² Iren An nobaget ikhi logolik he. ’Nit nineisena re Allah o, nen nit ninebe ogore At againafuri welago, niren At ebe ninelu o,’ iluk ikhi logolik meneat,

³ oba nen iren fano mene helugu aple andoma inabit eri'lagwi. Andiba re it inebe ap selei mene nen mugisogoin.

⁴ An nagainafuri nen he An anggigirek mene heinok wo'niigi'legengge re ap raja wenagaisogo menfili'lagwi. An nen fano hilingi'ni iluk mel yagaisigi'lek kwelek it mene inogogwi kaindek omanogo heragaisogo menfisili'lagwiat. Nen iren he emas, perak iren mene helaluk kembu alik wokfuluk hilingiri'lagwiba re it inonggwarek inebe alomat fakhili'lagwi aro.

⁵ An nen afuni Samaria mene nen sapi emas meneba apne wanharek mene andi faget mondok nabit isikhi lagi o. Nen An na'mage it inoba mondok fikhi lagi aro. Iren tugwi kembu fogeratu mondok werek kwelek enek he inebe alomat fakhugu mondok logogun mene andi re ki huli nen logogun nogo?

⁶ Sapi emas iren fogeratarek mene andi re it Israel inap elalhu inelu mene nen elalek engge! Andi re ebe Allah re lek enggere mondok wolelenggen isogoin halok fano!

⁷ An nagainafuri nen sogoi awi yatu halok he enggen he sielu palikhi logogun! Gandum yabu yago mene wurik agu lek halok he nunggu mene faget gandum weregabet fakhikhi logogun lek! Oba nen gandum andoma wurik asi le'ma nen ogore ap inunggulenu amu mene nen ninggi logoilep.

⁸ Iwak kweang mene halogeterek hak, Israel mene re mondok weak agaikha, nen it inebe re inunggulenu amu mene hilingik hakhogo hilinglagaikha. Ma re Israel en yi'nogo ti'nogo ekhe hilingisugun mondok lek.

⁹ Linggene keledai maro mene nen kwanit hikherek hak Israel mene re inendawimo nen anggaluk enek hilingiri'lagwi. Iren he Asyur en lebetninabuageluk heraginabik lili'lagwi, nen inunggulenu amu mene inoba ninom sebesuogen iluk onggo palinabi'lagwiat.

¹⁰ Oba nen An nen it inebe andogorogo fisambik unggum wogisagain. It inebe raja Asyur mene nen alperelinafunem he we horok yogondak arem obaat ouen heinet wasuogeluk werek.

¹¹ Afuni Israel mene nen inaweak legabetukwe iluk mezbah hokhorogo wutu kwelek he, iren weak hilingitukwe iluk obalik omanogo ogore hokhorogoat hilinglarik lili'lago!

¹² An nen it yanggulinafu mene faget wene hokhorogo palhigimo nen he, iren andire niren hilingisu mene re fuk o, nit he ninabit, iluk he omanogo mondogat filikhogo herakfisaga.

¹³ Iren An noba wam warogo wo'netu aplere mondok inagaiyek. Nen wam a'nogo eino palek he it nili'lagwi, oba nen An Tuhan nen he iren a'nogo warogo fei weri'lagwi mene andoma re mondogat nabit. Yogondak he An nen it inaweak hilingiri'lagwi mene andoma eberek logolik he it inaweak onggo unggum inoba fagain o, An nen it inebe inambotkwe sugulogo o Mesir lakfisagain.

¹⁴ Afuni Israel mene nen inawi o istana sili pumbuk wurili'lagwiba nen iren ap ebe elalinafikhe agun a'nogo inonggot ari'lagwi. Afuni Yehuda mene nen inawi kota omamerogo wurilik lagali'lagwi, oba nen he An nen it inawi istana sili andoma inom, inawi kota andoma inom endu noageluk pelabi wesigin o,” iluk ikhe.