HOSEA 7 - Allah Wene Fano Wene Hupla Inane

¹ A'nogo isikhesik Tuhan nen ikhi logolik, ”Hundik-handik An nen nagainafuri Israel mene inebe fano hilinginafik, inambotkwe pugunhogo fisigik, hilingisigin iluk hilingitu sambul aremnogo isikhi lagimo re, weak hilingisugun mene inom, inaniniba hilingisugun mene inom enek hilingiri'lagwi. Iren he, ineranhogo wene lalalengge hilingitik, afuni inaiba yogot hinasi kwigik, ebekhe kwe nen telogo heligik, hilingiri'lagwi andi.

² Iren ina'mageba hilingiri'lagwi mene andoma faget An nen eberisagain mene a'nogo inendawimo eberi'lagwi lek. Oba nen he it inaweagen sebelinafunem An nen weinamat isikhi lagi.”

Raja awi silimo omanogo nen weim abok isukwa wene

³ Tuhan ane ikhi logolik he, ”Afuni holhu mene nen ineranhogo wene lalhigik raja inom at agoromi at a'ma yabu hilingiri'lagwi mene inom inendawimo inagaiyeget fisogoin iluk hilingiti logolik inobabut hafeba hilingiri'lagwi andi.

⁴ It inebe mondogat he ap alomarinafarek mene logolik tiphogo hilingiri'lagwi lek mene. Werek It inendawimo inabit anggaluk hilingiri'lagwi mene andoma re, ap roti hilingitu mene nen, aren mulelherek mene a'nogo oan fougeti le'ma nen endu amuloget figi'legengge werek a'nogo hak hilingik.

⁵ Linggene raja nen pesta hilingitu sambul he, afuni omanogo nen raja inom agoromi at a'ma yabu hilingiri'lagwi mene inom i anggur agai lugulugwit inabuageluk wogisaluk mondok kemburogo hilingiri'lagwi. A'nogo hilingitunem ambisangma re raja a'nogo it ap weagerinafarek mene omanogo inom inagaiyek-pinagaiyekhogo hilingitarek.

⁶ Endu wulenggen wagane'ma nonggalek hak iren inaniniba hilingfogoin iluk hilingitarek mene andoma a'nogo hilingitik, nen it inanini nen ina'mage lagaikharek mene a'nogo hubanggo inendawimo het lagaikhi la'luk, hubet he endu amulok kulunghogo lagaikherek hak inendawimo ina'mage wulabi'lagwi andi.

⁷ It inanini nen ina'mage lagaikherek mene a'nogoba re inogogwi kaindek ferinarek werek mene omanogo mondogat inoari'lagwi. Iren raja omanogo mondogat ekhe inoatik-ekhe inoatik hilingita andi. Oba nen he, inebeba elokhe mondok weakhogo hilinglagu kwelek oba nenat he, ap misigen iluk ogo An nen leberisoageluk samban noba kino ili'lagwi mondok lego,” iluk ikhe.

Israel mene inom inunggulenu amu mene inom faget isikhe wene

⁸ Tuhan ane ikhi logolik, ”Unggulenu Israel mene re, unggulenu amu mene at haningisogo werek mene omanogo inom misik sebetunem he, it inebe re roti abel fena oan wuti'lek mene hak hilingik.

⁹ Iren unggulenu amu mene inom seberi'lagwi andiba re it inomame lek ari'logo mene a'nogo futfili'lagwi lek. It ineluk logogun mene faget mondogat ambisangma asi weri'lagoba nen, it he inonggorengge wonghogo werek.

¹⁰ It Israel mene nen wonoget fakhili'lagwi mene a'nogo re mondogat weinam hilingi'mo re, it inaweak hilingiri'lagwi mene a'nogo ero weinam ari'lago andi. Mondogat andoma ari'lagoba nen iren sugulogo An ineisena Tuhan Allah a'nogo nambit wagik, An hera'nafik, hilingiri'lagwi lek.

¹¹ Israel he, sue yalma mongol mene nen lagik wagik ikherek hak hilingiri'lagwi. Attak he iren Mesir mene nen lebetninapni o iluk kino lagaikha. Andi nen hobuk he Asyur mene nen lebetninapni iluk yagaisa lagaikha!

¹² Oba nen he iren hundik-handik a'nogo logoin iluk lagunem he, afuni nen hele webet fugunem sue ke'nok ikherek hak An nen it inebe elema kwalasuageluk su ugu legeisogo fuluk logogin. Iren inaweak hilingiri'lagwi mene andi An nelu welagimo re An nanini mene hilingiri'lagwi mene andem faget unggum wogisagain.

¹³ Iren An nobagaluk lili'lagwi andi nen he it inebe alomat laga logouwak. It he, An ninom eilhogo hilingiri'lagwi enggere it inebe mondogat wololenggenhogo hilinglaga logouwak. An nen it inagap telinabile iluk nendawimo anggikhi lagiba nen, iren An nobaget hilingiri'lagwi mene andoma re, we henarogo nek hilingiri'lagwi.

¹⁴ Iren inendawinggenma ibi-eberogo nen samban An noba ili'lagwi lek. Iren samban ikhi logolik he it inebe nogoli'lagwiba omanogo weing la'luk, afuni An noba eberogo anggili'lagwi lek mene nen hilingiri'lagwi omanogo hakhogo re le ari'lagwi. Iren ambi gandum inom anggur inom kino yaga'neti logolik halok he, ap kembu dewa fogerari'lagwi mene nen hilingitarek hakhogo inebene inagap palikhi logolik kino yaganeri'lagwi. It he mondok ibi-eberogo nenat An nane sagalogo hilingiri'lagwi.

¹⁵ It inebe re An nenat kulinafirik wuriget fisigiba nen he it inebe misik a'luk An nane sagali'lagwi.

¹⁶ It he hundik-handik dewa inomame werek lek mene omanogo faget mu'luk lili'lagwi. It faget he werek angga lek hak, it inebere sikhe enggela sapulangsek mene hangge werek. It inogogwi kaindegen he inane wonoget fakhikhi logolik agarek andiba re, it inebe weim ambisangma nen inoasumo wa'lasugun. Nen, it afuni Mesir mene nen endo yaginafi logogun,” iluk ikhe.