HOSEA 6 - Allah Wene Fano Wene Hupla Inane

It afuni Israel mene nen ibi-eberogo nen ninobabut hebelugun o, iluk isukwasigen weak hilingitukwa wene

¹ It afuni Israel mene nen inane ikhi logolik, ”Nit hobuk nineisena Tuhan oba ninambotkwe sugulogo louwogen we'ni o. Nit ninoba enggin-fenggin hikhi lago andi re Aren hilingninobagali'lago o, oba nen Arenat nit ninoba fanotninobagagin werego. Nen Aren ninoari'lago, oba nen Arenat nit ninoba ou werek andi fano hilingninobagagin werego.

² Ninenggi pire henagan yaba re ninoba ou welago mene Aren fano hilingninabigin o. Nen nit ninebe nineluk At awe a'ma ninobagaumo logogun.

³ Andi nen he, niren At ebe tukhumhogo ninelu asuogen he, eberogoat ninomamerogo hilingiti logouwogo. O hil lakfei wagarek andi hak, At ebe ninoba wagik, meiso pi waga la'luk, kweang sakhot fikherek andi hak, ninebe fanotninafik, i wesigin o,” iluk li'lagwi.

⁴ Oba nen he Tuhan nen ikhi logolik, ”Hit afuni Israel mene inom, Yehuda mene inom, hinobaget he An nen ninggi'nogo mene hilinghinabigin nogo? Hiren An hinendawitnafi lagep andi re, o hubet werek kwelegat ohena inom, lilengge inom, weak-weagat lek agarek andi hak legari'lago.

⁵ A'nogo hilingiti lagep andi nen, An nen hobuk hinebe wene hinoba fembik leget hinabigin wene andi yagahisoageluk, ap An nane yagahisagarek mene inayonggo fuluk, hinoba lakfisa waga lagi andi o. Hiren hilingisu mene An namolo welagi mene re, eilabut yegelhugunem enegat agarek andi hak selek mondok werek.

⁶ Hiren wam, yi mene ti mene An nobaget warogo nolneti lagep andi nabit hangge. Oba nen he, An nebe tukhumhogo hinelu agik, hinendawinggen hundik mondok welagik, ikhi logogun andi nek he, an namolo re andi o,” iluk yagaisasikhe.

⁷ Oba nen he at Adam en hilingitikhe higit, hiren ogo An ninom wene watigip mene a'nogo sagalhi lagep.

⁸ O kota Gilead oba andoma re ap anini weak inom ap ware mene inomen hoborek werek.

⁹ It ap imam-imam o kota andiba werek mene re afuni ebekhalem lagunem kagalfisaluk inangge telugu mene esa logalhigik werek andi higit werek. O Sikhem ebekhalem obalik hore'ma lagaikharek oba andoma nen ogore iren kwe palfuluk ap inoari'lagwiat. Iren inoari'lagwi mene andoma mondogat he yi'nogo hilingisugun iluk wenggelogo fuluk inelu logoligat hilingiri'lagwi.

¹⁰ O Israel oba andoma wene ekhe inameilo mene hilingitunem isikhi lagi mene re yi: ”An nagainafuri mene omanogo nen tugwi kembu fogerakhugunem inonggwaregen inebe emetfakhugunem isikhi lagi.

¹¹ Hit afuni Yehuda mene yi sani, ”Hit faget he, hinobabut hilingiti lagep andi higithogo wene hinoba fagain mene nenggi mondogat wenagaisogo figi o,” iluk ikhe.