HOSEA 5 - Allah Wene Fano Wene Hupla Inane

^1-2 Tuhan nen ikhi logolik, ”Hit ap an eisewerek welagep mene yi inom, hit afuni Israel mene mondogat inom, hit afuni ap inenupogoren tagomangge mene yi inom, hinesanggo fanorogo holini o, hiren he it ekhe wene inoba figik, kotik, higithogo u werek kwelegat he, o Mizpa nen paik ke'noguageluk hele figik, o tom Tabor oba nen ikan kwalasuageluk su webet figik, o Sitim kweang uanhogo habuli'mo puageluk fougetik, egepma werek andi hak, it ekhe weak asuageluk hilingiti lagep andi nen he, An nen wene hit mondogat hinoba fagain o.

³ Hit afuni Israel mene yi sani, hiren hinobabut yi'nogo ti'nogo hilingiti lagep mene mondogat he An nelu o. Hiren hilingiti lagep mene an neilhanem hinago mene ekhe werek fuk. Hiren tugwi kembu fogerati logolik, An noba lombokhogo logou re hinabit welagep. Andi nen he afuni hit mene ekhe an fogetnafu aple a'nogo re elo'lek ari'lago andi,” iluk yagaisasikhe.

Tugwi kembu fogeratarek mene faget inelurogo yagaisasikhe wene

⁴ It Israel mene inaweak hokhorogo hilingiti lagaukwba re it inebe inambotkwe sugulogo ineisena Allah oba wesu re elo'lek hilinglaga. It inebe re tugwi kembu andoma nen mondogat pik pugerisikhemo re Tuhan a'nogo faget ebet-higi'legengge hilingiri'lagwi andi.

⁵ It afuni inunggulenu Israel mene inonggwaregen fogerakhagarek andiba re, inobabut enegat ari'lago. It Allah ane sagalogo weak hilingitarek andi nen he, ineisok a'lip tunghogo warili'lagwi andi. A'nogo warugunem afuni inunggulenu Yehuda mene inomat warili'lagwi aro.

⁶ Iren he ineisena Tuhan ebe herasugun iluk wam, domba inom, sapi inom, At faget warogo noleri'lagwi meneat he, Aren it inebe herakfisasikhe andi nen he, hinom ambi asugun lek, andoma mondogat he alomarogo hilingiri'lagwi.

⁷ It he ineisena Tuhan oba lombokhogo welagi'lek logolik, it ina'logomi inamlogomi re pailak oba nen taginabi'lagwi andi nen he Tuhan againafuri ebe mene ari'lagwi mondok lek. Andiba re inenggi welagi'legat it inebe alomat laga logolik, ineabukwe ogo mondogat legetfisigik, igin.

”Afuni Yehuda mene inom, Israel mene inom, weim yabugun,” iluk isikhe wene

⁸ Hit ap Benyamin mene yi, weim yabi we'ni o! iluk inane humesu hak he, o Gibea nen pinggong ane hokho mene anethani o! O Rama nen e anggwe folelek mene anethani! Nen o Betel en he hinane ngai e'ni!

⁹ Hit afuni Israel mene yi sani, hinesanggo fanorogo holini o, wene hinoba fou higit obaat hinawi wei igin andi nen he alomat lasugun o,” iluk igi andi eberogoat hilinglasigin aro.

¹⁰ Tuhan nen ikhi logolik, ”Afuni Yehuda mene inogogwi kaindek en afuni Israel mene inebe inoati logolik, inaiba sebeli kwi wagaikha andi nen he, na'mage mondok het-pet imbik i fu wagarek higit wene inoba lakfagain o.

¹¹ Hit afuni Israel mene nen it ekhe telhinabu lek meneat he telhinabuageluk ninghogo inayonggo fikhi lagep andi nen he, it ekhe nen wene hinoba fagasik weagethinafi logolik hinawi mondogat sebelaga andi.

¹² Hit a'nogo hilingiti lagep andi nen he, An nen hinunggulenu Israel mene weaget hinobagagik, hit afuni Yehuda mene legethinafik, igin o.

¹³ Hit afuni hinunggulenu Israel mene inom, Yehuda mene inom, weak welagep andi futfembik he, hit Israel mene nen afuni Asyur mene inoe raja lego welagarek mene ekhe nen telhinabuagaluk ayonggo lagep meneat he, aren telhinafik, hinebe fano logobagaigeluk hiligisogo hinobagagik, u re, elo'legat aga andi.

¹⁴ Ma re mene singa nen afuni inoaterek andi hak, An nen hit afuni Israel mene inom, Yehuda mene inom, hinom hinoasigin aro. Hit hinebe An nonggwaregenat libi'labakhogo hinoasimbik he, herakhinobagagin o. An nen hinebe lisogo wokhinarek lagunem afuni ekhe nen telhinabugun mondok lego.

¹⁵ Nane sagalogo weak hilingiti lagep andi nen, yi enggin ti enggin hokhorogo hikhi logobagaigeluk hinebe herakhinobagagin o. A'nogo herakhinobagaumo, hiren, Nit weak hilingito, iluk futfembik, yi enggin ti enggin a'nogo hikhi logolik enek he, hinendawinggen oba nenat hera'nabik wesugun he a,” iluk yagaisasikhe.