HOSEA 4 - Allah Wene Fano Wene Hupla Inane

Tuhan nen afuni Israel mene inoba hikhiberisasikhe wene

¹ Tuhan he, afuni o yi werek mene inom wene werego. Enggere Israel mene yi sani, Aren ane ikherek mene andoma furogo holhi logoni o, ”O kweang yiba re tiphogo hilingitu mene inom, inendawi hundik hilingitu mene inom werek lek. It afuni oma werek mene nen ogo An Allah iluk eberogo inambeba nen fageri'lagwi mondok legat.

² Iren hilingiti logogun anggaluk hombuk pali'lagwi oba nen, ili'lagwi mene higithogo hilingiri'lagwi mondok lek, it he ineranen wene igik, ap inoatik, yogot wanhik, pabi lagik, hilingitunem weak mene omanogo ekhe inom hilinglarik laga logolik, ap watu aple nek ekhe inom inoarik lagu mondok werek.

³ Andiba o kweang yiba re mondogat puk iringik weak mene asigin, nen yi mene ti mene kweang yiba eluk werek mene mondogat he wa'lasigin. Eluk-elugengge tulemkwe tari'lago mene inom, kweang oba welagarek mene inom, i laut elonggoma welagarek mene inom mondogat he legasigin o,” ikhe.

Tuhan nen it ap imam inoba hikhibet isasikhe wene

⁴ Tuhan nen ikhi logolik, ”Hit imam yoma sani, An nen hit weak iluk yagahisagain enggere, hiren An nagainafuri mene weaget fisigik, wene wenagisigik, u fugo.

⁵ Linggene nen hundik hubanggo weak mondok hilingiti lagep, andi hakhogo re it nabi nen ogo andi hakhogo nek hilingiri'lagwi. Andi faget he hit hinagaisa Israel andi re An nen eil oak legetfagain o.

⁶ Hit imam hinap omanogo nen An noba tibet figi'lek hilingiti lagep, andiba re afuni An nagainafuri nen ogo An noba fut figi'lek hilingitunem, it inebe alomat fakhili'lagwi andi. Hit he wene An nen yagahisikhi lagi mene omanogo filikhogo lakfisikhi lagep. Ma re, An nen ogo hit filikhogo lakhinobagagin aro. Nen hit hinagainafuri mene ogore An nobaget imam logogun iluk fagesigin legaro.

⁷ Hit hinebe hokhorogo sik-pik ikhi logolik, An nelokhoma weak hokhorogoat hilingirik laga lagep. Yago, hit imam hinap yoma sani! Ariginhi lagep andiba re, hit hinebe hilingik welagep mene andi re An nen agamesigin. Hit he legeisogo hinobagakhi logogun lek oba nen weaget hinobagakhi logogun.

⁸ Hit he An nagainafuri nen weak hilingituba re hinenggi werek irikhi lagep, andiba re hiren ebeti logolik it he weak enek hilingirik laga logouwak anggikhi lagep.

⁹ Ma re, afuni inoba enggin-fenggin hili'lagwi andem higit he hirogo a'nogoat hogoin o! Nen hiren hilingiti lagep andem higithogo re An nen unggum hinoba wokhisagain aro.

¹⁰ Hit he yi mene ti mene afuni nen obaget nolesugun iluk fei wagu mene omanogo ninggi logogun oba nen nelerogo nek logogun. Hiren dewa yi mene ti mene fano muliratu mene iluk a'nogo oba apne wanhi logogun oba nen, hiren An a'nogo nobagaluk kembu ilah amu mene andomaba apne wanhi logogun andiba re, afuni re ekhe inom ta'laga logogun lego,” iluk ikhe.

Tuhan nen afuni kembu fogeratarek mene unggum wogisagain isikhe wene

¹¹ Tuhan ane ikhi logolik, ”An nagainafuri yi sani, anggur attak mene ogo, ket mene ogo, hiren fanorogo hilingisuogeluk wenggeluageluk mene andoma legaphogo hinobagaikhemo welagebo.

¹² Hiren e eil misik lebeksek meneba pilingisogo yaganisoageluk kinoti lagep! Andiba re hit hinendawimo ninelu a'lep iluk wenggelhi lagep mene andoma re tomuk misik ekhe nen pilingisogo yagaisili'logo! Hit he, he ekhe agun inom logoligenat uang herati logolik hambenan enek hilingitu mene hak An a'nogo oboget nealuk ilah amu mene murok laga lagep.

¹³ Kembu fogerati lagep kwe andoma re, punu-punu ambolkwe inom tom ambolkwe inom, hiren at kembu faget warogo nolfuluk amben fano mene omanogo e ero hokho mene a'makwe andoma re, kunmo mondok sakhore'ma iluk nolhi lagep. Oba nen ambisangma re ninggi'nogo hilinglari'logo nogo? Hina'logomi omanogo hambenan nilik nikharek mene nek ari'lagwi, nen hineamal hemi omanogo re, pabi nek nili'lagwi.

¹⁴ Oba nen he, An nen, it hilingiri'lagwi mene andoma faget unggum wogisagain lego, andi re, hit oba nen ogo re, laluk, it uang herati logolik pailak hilingiri'lagwi mene omanogo inambit kembu awi wurikwe andoma yabu hilingitunem hinom hambenan hilingisi laga lagep. A'nogo hilingiti logolik hiren it hinom seberogo fugungge omanogo kembu dewa faget nologo fogerati lagep. A'nogo hilingiti lagep mene andoma faget wene aben ikhi logolik: ’Afuni inunggulenu Allah ebe werek mene faget wenggelhi'legengge hilingitarek mene andoma re ibi-eberogo nen he it inebe alomat lakhogoin o,’ iluk agarek.

¹⁵ Hit afuni Israel mene nen he An noba hinendawinggen tiphogo logolik hilingiti lagep lek! Oba nen it Yehuda mene andi re hiren hilingiti lagep andem hakhogo hilingiti logoinogo. Hiren o Gilgal iluk ogo nen o Betel iluk ogo wene kabogesugun iluk ekhe hilingisu fuk. O andoma nen Tuhan Eluk Mondok welagarek agun a'nogo enuba hombuk palu fugat.

¹⁶ Yago, hit afuni Israel mene yi sani, hit he hinungguloak mondok helep higit welagep! Ariginik welagepma re, An nen ninggi'nogo domba engga noageluk o leimo halharek hakhogo halhinafi logogin nogo?” iluk ikhe.

¹⁷ It afuni Israel mene re tugwi kembu nen inendawinggen ninggemo re, it he herakfisani.

¹⁸ It inebe anggur hokhorogo nili'lagwingge nen he lugulugwi paliluk it inendawimo inagaiyek anggagarek higithogo yugunat pailak mondok hilingiri'lagwinggere herakfisano. It he legeisogo fisugu mene andi re elo'lek hak nen afuni sebelfisagarek mene andi nek he fano anggaluk hilingiri'lagwi.

¹⁹ Andiba it inebe re sogoien furisugunem hakhogo legasugun. Iren kembu dewa obaget warogo wogeti logogun mene omanogo faget he, inenggali asugun o,” iluk ikhe.