HOSEA 3 - Allah Wene Fano Wene Hupla Inane

Hosea inom agwe higithogo hilingiterek lek mene inomen hilingitukwa wene

¹ Tuhan nen An yaganeti logolik yi'nogo ikhe: ”Haren, hagwe obabut agun oba lomborogo logou abirengge we yanani nilik nikherek mene andi hobuk oba lan o. Lambik he, An nen afuni Israel mene inebe An hera'nobagaluk, hunogo mene faget, Nineisena ebe yi aro, iluk fogeratarek mene andi fogeratik, anggur enggen puk mene werago tugwi kembu fisugu mene faget inamolo welagik, ugu kwelek meneat he, An nen nendawirinafirek andi hak, haren he andi hendawirasi lan o,” iluk yaganete.

² A'nogo yaganetemo, an nen he andi onggo re uang perak mene 15 nen, hombak hangge enu jelai enggen he 150 kilo nen inom onggo figi.

³ Onggo a'nogo figirik, mel yagati: ”Hat an ninom oan sebeti'lek logolik he, yanani nilik nikhi logou fugo. Nen, an ogore, hat nemberek nogo igi'legat logogin,” iluk yagati.

⁴ A'nogo yagatigimo At Allah nen he, ”Andi hagat afuni Israel mene inenggi hokhorogoat inoe enupogot inom, inogogwi kaindek at enggi ebekwe mene inom, le'ma logolik, wam warogo An nolnetik, afuni inalik hilingik mene oba himbirik logouwogeluk menegeisogo figik, tugwi kembu fisogo welagik, hobuk hilinglasigin mene faget inelu asuageluk hilingitarek mene fisogo welagik, ikhi logogun lego.

⁵ A'nogo meneat he, it afuni Israel mene hobuk inafe hebelasimbik it ineisena Tuhan Allah hera'nabi wagik, inoe raja Daud en tagomangge mene ekhe oba wagik, ugun oba werego. A'nogo wesimbik hilinglasigin andi elugun kobokhogo re, inailorogo fogetnafu were'ma, an nen fanorinafi logogin o,” iluk yaganete.