HOSEA 2 - Allah Wene Fano Wene Hupla Inane

¹ Andi nen he, hiren hinerugwi hinagaila'lak mene andoma yagaisikhi logolik he, Allah againafuri mene, igik, Tuhan nen endawit hinaferek mene o, iluk yagaisigik ikhi logoino,” iluk yaganete.

”Afuni Israel mene inobabut he, hemi yanani mene inobabut hangge,” iluk oba lirogo yagaisasikhe wene

² Tuhan nen ikhi logolik mel isikhe: ”Nagainafuri e. Hinagaisa re an nagwe fuk. Nen, An he at agun legaro. At obabut yanani nilik nikherek mene andi herakfisaluk, obabut hebelasuagen he, hiren komot hano.

³ A'nogo yagasugun oba nen aren etokhogoat esanggo holhi'lek, yananiat nilik nugu halok, at ebe alfulukwa kogouk ta'lagaikhe andi hak, alfulukwa kogougat logouwageluk An nen asu nonggologo potfisagain o. An nen at ebe kweang i amusu le'ma puk iringik weak andi hangge hilingisogo foumo re, ebe i nele nen wa'lasigin.

⁴ Hit yenggerugwi yi, hinebe hinagaisa pailak hilingiti logolik takhinafemo re, hinebe nendawithinabigin legaro.

⁵ Hinagaisa enggali mondok lek yanani nilik nikhi logolik, mel ikherek: An ap ninom nikhi lago mene nen namburu inom, nagai inom, yosi wol mene inom, kain linen su eil puselek weak fano mene inom, e zaitun enggen amusu inom, anggur enggen amusu inom, wo'netarek mene heraginabik inoba lagain o, iluk ikherek andi.

⁶ A'nogo nilik nikherek andi hak, ninggi logoinogo iluk, An nen at ebe alok-alogengge meneba hukhogo kwelakfembik, at anggwe wulifukwe re helep leget wurogo anggwe palfigik, igin o.

⁷ Anggwe a'nogo palogo foumo re, ap at inom nikharek mene andoma heraginabik lagain iluk hilingisigin oba nen he, inom ambi asugun lek. Nen aren it muginarek lagain oba nen he, it heraginabigin mondok legaro. Arigin lasumo, aren ikhi logolik, an attak he, fano welagiba nen, yogondak mondok weak welagi. Andi nen he, An nagun attak mene oba hobuk nambotkwe lagain o, iluk igin.

⁸ Hit hinagaisa andi re, An nen gandum inom, anggur inom, e zaitun enggen amusu inom, uang emas mene inom, perak mene inom, sik pikhogo wogotik, ikhi lagiba nen he, Allah nen wo'nete o, iluk ambeba nen fakhogo igi'lek logolik, uang omanogo re aren andugwi kembu Baal fogerasigeluk, helikherek andi.

⁹ A'nogo hilingiri'lago andi nen he, gandum enggen inom, anggur enggen inom, palhu sambul he, An nen wogotunem palikherek mene andi, nambotkwe oak heligik, kain esi wol mene inom, esi puselekweak linen mene inom, alfulukwa kogouk weregen labesuageluk wogotirek mene andi, nambotkwe oak heligik, igin o.

¹⁰ An nen, at ebe ap inom nikharek mene andi ineilhanem asu nonggologo alfulukwa kogouk logouwageluk hilingfagain. At ebe an nenggiba logolik, nomameba a'nogo hilingitunem, it ap andi ekhe nen at ebe telugun mondok lek.

¹¹ Aren, afuni Yahudi mene nen hilingitarek higithogo hilingiti logolik, tahun misigat wela'luk pesta seni isago ninggik, tugi ket mene folelhunem pesta hilingitik, enggi sabit oba An faget weat welagik, ikherek mene andi re, mondogat An nen legetfagain o.

¹² At endawimo nen he, e ara ero inom, anggur ero inom, ap An ninom nikhi lago mene nen onggo wo'netarek mene o, iluk anggikherek mene andi re, An nen mondok legetfisagain aro. An nen at eabu anggur yabu inom, e ara yabu inom, andi hunogoat enggama hakhogo hilingisogo foumo, wam maro obabut weak mene nen weaget fisikhi logogin.

¹³ Aren An noba onggorasimbik, ninhup-nanhup amben fano mene tugwi kembu Baal andi faget enek noletik, alilingge fano mene waganogo ap inom nikharek mene andi heraginabi lagik, ikherek andi nen he, An nen wene at oba fagain o, iluk An Tuhan nen nane arat igi,” iluk ikhe.

” Tuhan nen At againafuri Israel mene nendawirinabigin,” iluk isikhe wene

¹⁴ Tuhan nen afuni Israel mene faget a'nogo ikhesik he, ekhe mel ikhe: ”Andi nen he, An nen at he andi o leimo andoma waluk lambik he, nane amusuba endawinggen paligin o.

¹⁵ A'nogo yagasimbik, at eabu anggur yabu andi hobuk ambotkwe fano hilingisogo wogotik, o Akhor tonggoma yi weak ti weak hilingiti lagaba andi hobuk fanot fikhi logogin oba hilingisogo figik, igin o. O andoma nen at ebe silerik oba o Mesir en wulibi waga logolik, An nebe wo'nafikhe andi hak wo'nabigin.

¹⁶ A'nogo wo'nabimbik, aren an yaganeti logolik, Baal, iluk yaganeti logogin lego. We, Nagun e, iluk yaganeti logogin.

¹⁷ Afuni nen tugwi kembu Baal andi enu ugu mene inonggorasuageluk he, An nen at oba Baal enu ikhi logou fugo, iluk yagasigin.

¹⁸ Andem sambul he, yi wam ti wam inom, sue tarogo nikherek mene inom, kisu kweanggwe pololangerik nikherek mene inom, mondogat wene warisikhi logolik, Hiren An nagainafuri weagerinafi logou fugo, iluk wene warisagain. A'nogo wene warisambik, An nagainafuri inaiba andoma inebe fano lioksek logouwagaluk, sikhe, sige, karok, weim yafarek mene andoma mondogat lilibukhogo legetfisagain.

¹⁹ Hobuk hat Israel hebe An nagwe ebe mene higit wokhabimbik he wokharek mondok logogin o. A'nogo wokharek logolik, hebe nendawit habimbik, nendawinggen hundik mene logogin. A'nogo logolik, An nen higithogo hilingitik, tiphogo nek hilingik, ikhi logogin aro.

²⁰ An nen wene warogo isigi mene higithogo, hat hebe re An nen igisogo wokhabigin. Hat honggwarek hambeba nenat An nobaget fakhogo ikhi logolik An neisena re Tuhan andi aro, iluk ikhi logogin o.

^21-22 A'nogo ikhi logogun andem sambul he, hit nagainafuri Israel mene nen nayonggo fugunem, hinane nesanggo holhi logogin. An nen, meiso pogoroba nen pi wesuagaluk hilingitunem, kweangma pi wagunem he, yi mene ti mene gandum inom, anggur inom, e zaitun inom, yago mene andoma enggen he, fanorogoat iti logogin.

²³ An nen nagainafuri hinebe hinaiba andoma fano mondok logobagaigeluk hilinghinabigin. Hit faget ikhi logolik he, Nabit mene, iluk igi mene andi, hobuk An nen hit hinebe nendawit hinafi logogin o. Nen, Hinebe An nagainafuri lek, iluk isigi mene andi, hobuk An nen, hit An nagainafuri o, iluk igik, nen, hiren he nit nineisena re Allah aro, iluk yaganetik, ikhi logogun o,” iluk ikhe.