HOSEA 13 - Allah Wene Fano Wene Hupla Inane

Allah nen Israel mene unggum wogisagain ilik wene wurep oba oba tekhogo isikhe wene

¹ Attak he, afuni Efraim mene agaukhogo yagaisikhi lagaukwa andi nen, iren he, ”Yi'nogo hilingi'no, ti'nogo hilingi'no,” iluk ugu halok, afuni inunggulenu Israel mene ekhe nen he, inailo welagaukwa meneat he, it afuni Efraim mene nen he, Allah ane sagalogo tugwi kembu baal mene fogerati logolik weak hilingiti lagaukwa andi nen he inebe mondok lek asugun o.

² O yogondak ogore, afuni Efrayim mene andi re, Allah ane sagalogo weak hilingituat werek. Iren he, tugwi kembu afuni inendawimo nen wenggelfuluk perak mene agauwak hilingisogo inenggiba wuri'lagwi. A'nogo wutfuluk iren ikhi logolik he: ”Wam, yi mene ti mene tugwi kembu yoma faget warogo nole'ni o,” iluk ugunem, afuni nen he sapi eak alik waganek meneba hai inambe saluk watarek andi re higit nogo a!

³ Iren a'nogo hilingiri'lagwi andi nen he, inebe hobuk ohena hea, athe, lilengge o hubet wela'lugen lek agarek andi hak inom, nen gandum enggen sagalharek oba afulfulengge sogoien funhogo waluk lagarek andi hangge inom, so'le o tum oba nen lagaikheresik lek agarek andi hangge inom, inebe a'nogoat lek asugun o.

⁴ Tuhan nen ikhi logolik: ”Hit hinebe o Mesir en wokhinarek wulibi wagagi mene hineisena Tuhan Allah re, An aro. Allah amu mene ekhe werek lek, An nami-namu nenat hit hinagap telogo hinobagasigi o.

⁵ O leimo kweang amusu lekwe omanogo nen An nenat fethinarek welagagi.

⁶ A'nogo meneat he, hit hinebe o fanoma kwi wagagipsik logolik, yi mene ti mene hinalabut ninghogo ninggi logolik he, hinoba homot lagunem foget fakhikhi logolik, An noba hinonggot a'luk welagep andi.

⁷ A'nogo hilingiti lagep andi nen, hit hinebe singa nen senggelinaferek hak An nen senggelhinabigin o. Nen posi hangge enu macan tutul ebe ebekhe kwe kagalek logolik eilenggen woginaferek hak neilenggen wokhinafi lagi o.

⁸ An nen he, no beruang eak longgot fuluk hilingiterek hak herogo hinoba sagali imbik, hinebe libik-labakhogo hinoatik, singa nen hilingiterek hak hit hinebe welagep oba andoma nen senggelhinafik, nen olomene aik anini mene nen hilingiterek hak hinebe senggel fogathogo hilinghinabigin o.

⁹ Hit afuni Israel mene yi re. An nen hit hinebe wolelenggen tagalogo hinoasigin o. A'nogo hinoatunem andi re, sa nen elok telhinabigin nogo?

¹⁰ Hiren he, Nit ninogogwi raja inom, athe ninogogwi kaindek mene inom ekhe wo'nisan o, iluk kino yaganetigip, A'nogo meneat he, yogondak it mondogat inebe koma werek nogo? Iren he hit holhu mene oma elok telhinabugun nogo?

¹¹ Na'mageba An nen hit hinogogwi raja logouwageluk wokhisikhi lagi, andi nen hobuk An noba harorogoat it inebe nekhengge lisogo woginabigin aro,” ikhe.

¹² A'nogo yagaisasikhesik hobuk At Tuhan nen mel isikhe: ”Afuni Israel mene nen weak hilingitarek mene inom, nalek-falek hilingitarek mene inom mondogat lisu palogo werego, nen lisu palek andoma re abolo'lek werek.

¹³ It Israel mene re ineluk logouwageluk iaple logolik oba nen he, it inebe kembu logolik inenggi iaple werek meneba aremnogore higithogo hilingiri'lagwi lek andi. At ebe re omalik fou we horok yogondak ta'lasigiluk ikherek oba nen agaisa alabutmo nen wulibi wagi'lek welagarek andi higit werek.

¹⁴ Unggulenu ari mene arire wa'lagaikharek mene omameba nen An nen telinabigin mondok lego. Wa'lagaikharek mene yi, ou enggin mene andoma sagarogo lakfei me o! Hat heabu inebe legetfisikhi lagen mene a'nogo hilingisin o. An nen afuni inunggulenu yi mene hobuk nendawirinabigin mondok nabiro.

¹⁵ Israel mene re kweang muli fanoma engga mondok muli welagarek andi hak, fano mondok werek meneat he, An nen sogoi aganhan hokho mene o leimo mo liabi wagarek fikhiren inoba lakfei wesigin o. A'nogo lakfei wesumo, sogoi andi nen i elesi wiliferek mene inom, i mogo habulikwe yenggelek mene andoma inom mondogat firok ilik lagunem, yi mene ti mene onggo hokho mene andoma mondogat lek arik lagain o,” ikhe.