HOSEA 12 - Allah Wene Fano Wene Hupla Inane

Israel mene inom Yehuda mene inom unggum inoba fagain mene faget isikhe wene

¹ Tuhan nen ikhi logolik he, ”It afuni inunggulenu Israel mene nen he An nebe haningisogo kwelaknarek logolik, ineranhogo wene nek igik, inunggulenu Yehuda mene re An Allah nebe horek mondok logolik tiphogo nek hilingiti lagi mene a'nogo nane sagalogo hilingitik, ugu mondok logolik lalogo nobagali'lagwi.

² Yi'nogo ti'nogo ap Israel mene nen huberen pikhit hubanggo hilingiri'lagwi mene andoma re, alomarogo nek hilingiri'lagwi, obaburugwi re sogoi timur fikhiren furogo legetfikherek hak hilingitik, inobabut haferogo nek inaniniba hilingitarek mene andi it inanggele'ma nen hokhoabet fili'lagwi. Iren he it afuni Asyur mene inom sebe'luk, ninom hundik logouwogo iluk wene wat-wat uogeluk enegengge re minyak wokhagaresik o Mesir logoin iluk hilingiri'lagwi,” ikhe.

³ Tuhan he wene unggulenu Yehuda mene inom werek, Aren it Israel mene ogo it inobabut oba unggum wogisagain. Nen Arenat it inobabut hilingitarek oba ambisangma hilingfisigik igin.

⁴ Attak at Yakub agaisa alabutmo werek kwelek andem he at agailak emberek inebe pire hulipmio logolik mene re sebelogo fesikheat. Nen at Yakub ebe mondogat souge agaikhesik mene ogore Allah inom yei hambok-hambok agaukwa.

⁵ Aren ap malaikat mene ekhe inom yei hambok-hambok agaukwaba nen he at omame agaikhe. A'nogo hilingitikhesik le aga logolik, fanot nobagain o, iluk kino yagatikhe. Andi nen o Betel andoma At Allah Yakub ambit wagaikhesik, nit ninambu andi inom wene ane isukwa.

⁶ Allah andi re Tuhan ekhe mene-ekhe mene hilingisu hagenek mene a'nogo. At enu re Tuhan andi. At endawimo nen he afuni nen An nobaget fogetnafi logouwak anggikherek.

⁷ Arigini'mo re, hit Yakub ambisangma mene yi sani, Hineisena Allah ba hinendawinggen tibet fuluk, sugulogo At ambit waga logoni o. Hit hinebe hineluk logolik he, hinendawinggen hundik hilingitik, higithogo nek hilingitik, hilingitu logolik hinendawinggen hambuk haluk hineisena Allah nen hilingisigin iluk nenangotu logoni.

Israel unggum wogisagain mene faget wene hobuk isikhe wene.

⁸ Tuhan nen it inunggulenu Israel mene inoba ikhi logolik he, ”It afuni Kanaan mene nen weak hilingiti lagaukwa hak hiren ogo a'nogoat hilingiti lagep. Hiren mene hinangge onggo palhik, hunitik ikhi logouwageluk fisikhi lagep mene omanogo nen he it ekhe inom kam warogo yi mene ti mene inoba hunitarek mene omanogo inoba re ilirengge taganhogo walet hagaresik lalogo wogisili'lagwi.

⁹ It inane ikhi logolik he, ”Nit yogondak ninenggi werek ago, niren lalogo helikhi lago mene andiba re ninenggi werek aga lagoma re, ap ekhe nen ninenggali wasu lekhago, ili'lagwi.

¹⁰ Oba nen he An hineisena Tuhan Allah, hit wokhinarek o Mesir en wulibi wagagi mene a'nogo nen he hit attak o sabuba salhigik were'ma An hinambit wagunem welagagip hak ekhe logobagaigeluk inobagagin o.

¹¹ An nen it nabi-nabi ninom nane mondogat igi, inabikanggo hagarek hakhogo wene hokhorogo wogisigik, nen it inebene nen An nen hit An nagainafuri hinobaget wene kagalogo welagi mene omanogo mondogat yagaisigik, isigi.

¹² Ariginik kwelek he, o Gilgal andoma tugwi kembu nek fogerati logolik mezbah amboloba sapi warogo nolhik ugu mene fena welagaikharegat. Oba nen he it ap tugwi kembu fogeratarek mene andoma re wa'lasugun. Nen mezbah o Gilgal werek mene andoma re yabukwe helep huguloak wurogo liabek mene asigin,” ikhe.

¹³ Yakub nit ninambu a'nogo re weak-weak o Mesopotamia lagaikhesik at agwe helagain mene faget he, ap andoma mene inamingmingengge agaikhesik logolik ap inanggo domba halhi lagaikhe.

¹⁴ Tuhan nen ap nabi misik ekhe ap Israel o Mesir hele warek were'ma nen woginarek wilibimbik halinafi logouwageluk lakfesikhe.

¹⁵ Ap Israel mene nen Tuhan a'mage hokho mene lagauwageluk hilingfikhi lagaukwa. It inobabut hilingiti lagaukwa mene andi higithogo re unggum wogisagain andi fano. Tuhan nen it hobuk unggum wogisagain andi re iren hilingik enggeba nen afuni amu mene nen Tuhan a'mage lagauwageluk hilingfikhi lagaukwa andiba re unggum wogisagain.