HOSEA 11 - Allah Wene Fano Wene Hupla Inane

Tuhan nen At againafuri At ane sagalogo hilingitarek mene andi inebe endawirinafikhe wene

¹ Tuhan nen ikhi logolik mel ikhe, ”An nen at Israel ebe oan obaat ayonggo fesigisik nendawiratigi. nen ebe oan obaat ayonggo fesigisik, o Mesir en wulibi wesuageluk yagatigi andi.

² Oba nen An namlogo andi ekhe inom woletu were'ma re ekhe inomat At ebe an noba nen hebekhogo nobagaluk eil uan arik laga-laga. Aren he wam, yi mene ti mene tugwi kembu Baal faget inom, kembu ekhe mene faget inom, warogo noletik, amben fano mene dupa noletik, ikhi laga.

³ A'nogo hilingiri'lagoba nen At Israel ebe loageluk he An nenat yagatik, nendawirogo ebe nagaumo felikhogo wanhik, fisogo welagik, ugu kwelek meneat he, aren he, Neisena Tuhan nen fano hilingnabi'lago, iluk pakhogo u re, abit mondok welaga andi.

⁴ An nen at ebe nendawirati lagarik, noba lomborogo logouwageluk fei wagagisik, oba enggin-fenggin were'ma An nen lebethigik, nendawi sakhoregen at nunggungge ninggi logouwageluk wogotik, ikhi lagi meneat he,

⁵ it afuni Israel mene andi inobabut hebela'luk inambotkwe an noba wesu re, inabit mondok welagaikharek. Andi nen he, it hobuk inambotkwe o Mesir loago. A'nogo lamo, it afuni Asyur mene inoe raja nen ferinarek logogin o.

⁶ It afuni Israel mene inonggwarek inendawimo anggaluk hilingiri'lagwi andiba re, ap tentara nen inoasuogoluk it inaiba kota kwi we'luk, inebe inoatik, inaleget pa'leget ambe palek omanogo mondok weaget figik, ugun o.

⁷ It an hera'nobagaluk inomamerogoat wulifunem he, afuni ekhe nen yi enggin ti enggin hilinginafunem, telinabuagaluk, inane hokhorogo kweti logogun oba nen, it ekhe nen inane holimbik telinabugun mondok lego,” iluk ikhe.

⁸ A'nogo isikhesik, Tuhan nen mel yagaisasikhe: ”Hit afuni Israel mene yi. An nen hit hinebe mondok-mondok herak hinobagaluk lagik igin nogo? Mondok elo'lego. An nen afuni Adma mene inebe mondok legetfisasigi andi hak, legethinafik, afuni Zeboim mene hilinginafigi andi hak hilinghinafik, igin nogo? Mondok lego. An nen hit hinebe nendawi hundik mondok hokho meneba hilinghinarek welagi andi nen he a'nogo hilinghinabigin lego!

⁹ An nebe Allah aro. Afuni hanggere lek, andi nen he An nen na'mage hit hinoba het-periluk, wene hinoba figirek andi hak fagain lego. An nebe tegelek mondok welagirek mene a'nogo hinebe fethinarek mondok logolik, na'mage hinoba het-perikhi logogin lego,” iluk yagaisasikhe.

¹⁰ Tuhan ane ikhi logolik, ”An nen singa ane kouwaterek hak it inaselei mene inailot fisagain sambul he An nagainafuri andoma An nombo'ne logoin o. An nagainafuri re mo ubuk ikherek fikhiren An napne wanuogeluk weak-weak wesugun.

¹¹ It he sue nen tarogo lagarek hak o Mesir en weak-weak wesugun, nen o Asyur en he sue fibe nen elang paluk lagarek hak wesugun. A'nogo wagunem he An nen it inebe sugulogo woginarek it inonggwarek inailoba fisa lagain, iluk An Tuhan nen nane mondogat igi o,” ikhe isikhe.