HOSEA 10 - Allah Wene Fano Wene Hupla Inane

¹ Israel he e anggur enggen mondok hokhorogo iterek andi higit werek. Angge yi mene ti mene enggi werek aga logolik, aren angge mezbah hokhorogoat wute. Yi mene ti mene sik-pik ikhi logolik he tugwi kembu aren fogeraterek kwe omanogo pugunhogo wurik lagaat.

² Yogondak he afuni henarogo hilingiri'lagwi mene andoma it inaweak onggo ambisangma hogoin. Allah nen he iren mezbah wuta mene andoma wolelenggenhogo lakfisambik iren tugwi kembu fogerari'lagwi kwe andoma meisalogo lakfisagain.

³ We horok eil misik wela'luk iren ikhi logolik, ”Nit he Tuhan oba ninailo anggogorek lek hilingi'mo re nit ninoe raja werek lek. Enggere nit ninobaget ninoe raja logagin andi re ninggi'nogaluk nogo?” ikhi logogun.

⁴ Iren he inane nen weregaberik lagik, ineranhogo weneba wene watik, wene watu mene andi eberogo mene re lek oba nen, hilingiri'lagwi. Wene melalek he iren agaum-fagaum hugunem katokhogo hilingitu mene a'nogo re yabu fano waganek enggeba omirik arikweak mene wiliferek hak sebelogo fili'lagwi.

⁵ Afuni o kota Samaria werek mene re inailo asugun; nen it inebe inom, imam omanogo inom o Betel oba andoma nen sapi emas mene obaget hilingiri'lagwi mene andoma re, iren kembu elokhe pugun-bagansek mene a'nogo mondogat legarik wagu nen he inendawi heiselhi logolik le asugun.

⁶ Tugwi kembu andoma re o Asyur ha'luk lambik raja lego mene a'nogo endawimo agaiyekhogo wogosugun nen iluk waluk logoin. Israel mene nen he hilingisugun mene iluk wene melalek werek mene a'nogo hilingisugun oba, it inenggali asimbik, sebelek mene asugun.

⁷ Samaria re monodgat wololenggenhogo asumo inoe raja re e asenggep mene i nen ha'luk lagarek andi hak waluk logoin.

⁸ O Betel punuba kembu awi wuri'mo afuni Israel mene nen fogerari'lagwi kwe andoma mondogat wolelenggen isogoin. Iren mezbah wurik mene ebene andoma re engga inom alok-alogengge inom wulibigin. A'nogo wulifunem iren inane tom andomaba kweti logolik, ”Nit salninabime o,” igik, nen punu-punukwe andomaba woleti logolik he, ”Nit sebelninabime o,” igik, ikhi logogun.

Israel mene unggum inoba fesikhe wene

⁹ Tuhan ane ikhi logolik, ”O Gibea ba hilinglagaikhe a'nogo huli nen engge, afuni Israel mene re An nane sagalogo weak hilingitu aple palfigi'lek hilingiri'lagwi. Andiba re o Gibea ba ogore weim inoba asi wesigin.

¹⁰ An nen afuni weak enek hilingiri'lagwi mene andoma inoasi kwikhi logolik unggum wogisagain. It inunggulenu amu mene re inebe misik sebe iluk it inom weim yafi logogun, nen it inebe re inaweak hokhorogo hilingiri'lagwi mene andomaba unggum wogisagain.

¹¹ Attak Israel he sapi ket souge mene hakhogo yanggulik mene hilingik logolik, gandum enggen loligin mene agaiyekhogo hilingik welaga. A'nogo hilingi'mo re An nen at oroak ebema andem pugetfuluk li'luk lagu aplere hebisigi. Oba nen yogondak he An nane ninghogo yagatu kwelek at yabu engginhogo hilingiti logouwageluk wene mondok tekhogo igi. Yehuda mene re kweang kusuageluk An nen mimingisigin, nen Israel mene re enggen taleluageluk yagasigin.

¹² An nen ikhi logolik, ”Hat Israel yi! Heabu ket mene senfuluk enggen awi yatu mene re katokhogo hilingitu mene andi yasin o, nen enggen palhu mene re haren hendawinggen An noba ibi-eberogo tibet fikhi logogin andiba fanot hobagagu mene palikhi logogin. Haren An heisena Tuhan hera'nabigin oba o arat horogasi waga. An wesimbik fanothinafirek mene a'nogo meiso pelabi wagarek hak pelakhisa wesigin.

¹³ Oba nen a'nogo hilingisu mene werek kwelek haren agaumhogo amu mene hilingiti lagen, haren weak aple hilingitu mene faget enek hilingiti logolik, enggen ugu hakhogo re katokhogo hilingitarek lek mene a'nogo palhi lagen. Hat he hane heranhogo ugu meneba enggen ugu palhigik, ninggik,” ikhi lagen. Tuhan nen ane nekhengge ikhi logolik, ”Yago hit hinunggulenu Israel mene yi! Hiren he inangge kereta weim yafi lagep mene omanogo inom, nen hinagoromi sikhe fisogo inap hokho-pokhorogo werek omanogoba inom, inoba himbiret fuluk logolik hilingiti lagep,

¹⁴ ma re afuni holhu mene yoma re weim hinoba asi wesigin o, nen hit hinoba himbirengge helep huguloak wurik mene andoma mondok wolelenggen isogoin. A'nogo hilingfoumo o andoma re raja Salma nen kota Bet-Arbel weim oba wolelenggenhogo fikhi logolik hemi ineagwi inom alperelogo fisasikhemo hilingik welagaikhe aremnogo hakhogo hilingik logogin.

¹⁵ Yago afuni o Betel welagep mene yi, hiren weak mondok hokhorogo hilingitep andiba re, hit hinoba re weak andem higit asi wesigin. O mo kwelabi wagarek andem oba weim yafu aple erorasimbik hilingitu kwelek andem hit hinoe raja re wa'lasigin o,” ikhe.