HOSEA 1 - Allah Wene Fano Wene Hupla Inane

¹ Wene yi re Tuhan nen hun Beeri amlogo Hosea a'nogoba o kerajaan Yehuda ba andoma re ap inogogwi raja-raja Uzia inom, Yotam inom, Ahas inom, Hizkia inomen ferinarek were'ma. Nen, afuni Israel mene inobaget he Yoas amlogo Yerobeam a'nogo nen ferinarek were'ma, wene yi'nogo yagaisoagaluk yagatikhe mene palek werek.

Tuhan nen afuni Israel mene inobabut he Hosea agwe obabut inom higit iluk isikhe wene

² At Tuhan nen an Hosea nayonggo fikhesik wene afuni Israel mene yagaisoageluk attak-attak yi'nogo yaganete: ”An nagainafuri o yoma re An noba lombokhogo welagi'lek hera'nobagaluk wulibi'lagwi o. Andi higithogo re haren he yanani nilik nikherek mene andi waganogo hagainafuri at obabut hanggeat taginabino o,” iluk yaganete.

³ A'nogo yaganetemo an nen he, he Gomer Diblaim a'logo a'nogo wanhigi. Wanhigimo, he a'nogo omalik a'ma agasik he, namlogo manggusa re ap ta'lagaikhe.

⁴ Ta'lagaikhemo, Allah nen mel yaganete: ”At Yehu nen inebe hokhorogo o enu Yizreel andoma inamep wulagaisogo inoatikhe andi nen he, an nenggi welagi'legat wene Yehu Israel mene inoe raja werek andi oba fembik he, Yehu nen tagomangge mene re inebe raja menlaga logoinogo iluk, legetfisagain o. A'nogo hilingfisagain andi nen he, hamlogo ari enu re Yizreel salino o.

⁵ Andem sambul he, an nen afuni Israel mene, o Yizreel tonggoma andoma nen sikhe sige falelu hak inomame legetfisambik mabenetfisagain o,” iluk yaganetikhe.

⁶ A'nogo yaganetikhesik oba nen, he a'nogo hobuk eak a'ma agaikhesik he, omalik hele mene ekhe tatikhe. A'nogo tatikhemo, At Tuhan nen an yaganeti logolik, ”Hosea ao, An nen afuni Israel mene nendawirinabimbik, it weak hilingiri'lagwi mene sagalogo legetfagain mondok lego, andi nen he ha'logo andi enu re endawi hundik ninabi'lago lek mene iluk, Lo-Ruhama, salino.

⁷ Oba nen he, An Tuhan, it ineisena Allah nen afuni Yehuda mene andi nendawirinabimbik telinabigin o. A'nogo meneat he, sikhe oba inom, karok oba inom, weim yafarek mene ekheba inom, ap tentara kuda ba lagaluk yafarek meneba inom, telinabigin lego,” iluk yaganete.

⁸ A'nogo yaganetesik oba nen, an hemi eak Lo-Ruhama eilak palogo re, omalik ekhe a'ma agasik, omalik ebe abengge takhikhe.

⁹ Takhikhemo re, Tuhan nen yaganeti logolik, ”Hit An nagainafuri legat. Nen, An hit hineisena legat andi nen he, hit An nagainafuri lek iluk u hak he, enu Lo-Ami salin o,” iluk yaganete.

Afuni Israel mene fanorinabigin mene faget abok wene yagaisasikhe wene

¹⁰ A'nogo yaganetesik he, ekhe mel yaganeteat: ”Meneat he, hobuk An nen he, afuni Israel mene inebe ial i laut hokho yenggelek mene era'lukwe inenggi wenatik, iwak elema kwelagaisogo kilo walhigik, u mondok elo'lek andi hak, inebe mondok hokhorogo hilingisogo fisagain o. Yogondak An nen he, Hit An nagainafuri lego, iluk yagaisigirek aro. A'nogo meneat he, hobuk, hit An Allah neluk mondok welagirek mene nagainafuri o, iluk yagaisagain oba werego.

¹¹ A'nogo yagaisambik, afuni inunggulenu Yehuda mene inom, Israel mene inom, hobuk inambotkwe lambulogo misi'mo fisugunem, iren inoe kain raja misik mene nen ferinarek logouwagaluk menfogoin o. A'nogo menfembik inaiba andoma were'ma, inebe hokhorogo sik-pik igik, inenggi werekhogo welagik, ugun o. O andi sambul he, An nen afuni Israel mene inebe sumburu awi kweang fano heisele'ma yatarek hak yaginabigin, iluk u hak he, hari enu Yizreel igi andi esin mene asigin o,” iluk yaganete.