HAKIM–HAKIM 6 - Allah Wene Fano Wene Hupla Inane

Gideon nen hilingitikhe wene

¹ A'nogo yagaisasikhesik hobuk it afuni Israel mene Tuhan ane sagalogo weak hilingiti lagaukwama afuni Median mene nen inawe a'ma sebelinarek logouwageluk herakfisasikhemo 7 tahun welagaukwa.

² A'nogo logolik he afuni Israel mene afuni Midian mene inoba mondok inailo nen he oumokwe inom, tomkwe inom afuni nen ineilenggen isa lekwe inom andoma hinago welagaukwa.

³ A'nogo hinago logolik he it Israel mene nen yabu waganogo yi mene ti mene yatunem he ap Midian mene inom Amalek mene inom ap amu mene o leikwe werek mene omanogo inom seberogo re it Israel mene inoasugun iluk wagaukwa.

⁴ Wagaukwasik he it inawi tenda re kweang it Israel mene inoba omanogo wutukwasik he, it ineabu awi yago mene omanogo hunggul warik abel selatan fikhit o Gaza maserogo andomaba fei lagaukwa. Ekhe re it Israel mene inanggo sapi, domba, keledai omanogo ogo helaluk lagaukwa. Iren he endebengge iluk ogo ekhe herakfisasukwa le'ma re afuni Israel mene inamburu nunggu mene mondogat legagaikhe.

⁵ Afuni omanogo re inebe esa-esangge inanggo inom, inawi sabu salhu mene inom, inenggi wenasu mondok elo'lekhogo helaluk wagaukwasik he, iren afuni Israel mene inanggweang oba mondogat weaget fikhi lagaukwa.

⁶ A'nogo hilingitunem afuni Israel mene nen it inoba yi'nogo ti'nogo iluk ekhe hilingfisa re, elo'lek aga lagaikhe.

⁷ A'nogo aga lagaikhemo, it afuni Israel mene nen he, Afuni Midian mene andi mabenet fisouwogen he Tuhan nen lebetninabin o iluk, kino yagatukwa.

⁸ Kino yatukwama, Tuhan nen it inoba nabi misik ekhe lakfei wagaikhemo, nabi a'nogo nen ikhi logolik he, ”Afuni Israel mene ineisena Tuhan Allah a'nogo nen he yi'nogo ikhe, afuni Mesir mene nen sebelhinarek were'ma An nen fikhalogo wulak hinobagai wagagi o.

⁹ An nen he, hit afuni Mesir mene nen hinoasugun iluk ugunemen telogo hinobagagik, nen afuni o kweang yi mene hit hinoasugun iluk mene andoma inoba nen telogo hinobagagik, isigi. A'nogo hilingitigisik he hiren afuni yoma mene inoasugun iluk hilingitunem he, An nen it mugisigik, nen kweang iren mene re hit wokhisigik, isigi andi.

¹⁰ A'nogo wokhisagain iluk hilingiti logolik he, An nen attak yi'nogo yagahisasigi a'nogo, An nebe re hit hineisena Tuhan Allah hilingi'mo re, hiren he afuni Amori mene inoba re yogondak welagep oba ari nen kembu dewa oba apne wanhi logogun lego, iluk yagahisigi. Oba nen he hiren An nane hologo hilingisu mondok hinabit welagep andi, iluk Tuhan nen yagahisikhe,” iluk nabi a'nogo nen yagaisasikhe.

¹¹ Linggene ekhe sambul he malaikat Tuhan ekhe o kota Ofra andoma wagaikhesik he, e patie hun Yoas agayo unggulenu hakhogo Abiezer mene a'nogo eroma andoma hurek welagaikhe. Hurek were'ma he at Yoas amlogo enu Gideon a'nogo re afuni Midian mene nen ineil neanogoluk andoma hinago logolik anggur enggen perelhunem omanogo anggur enggen lologo pelafik, asinagap ibilhik ikhi lagaikhe.

¹² A'nogo hilingitu were'ma malaikat Tuhan a'nogo at elokhoma menlasi wagaikhesik yagati logolik, ”Ap alage hambongsiserek homalik yi namlogo e, Tuhan hinom hundik welagebo,” iluk yagatikhe.

¹³ A'nogo yagatikhemo Gideon nen he, ”Andiba nen he Noe! Ibi eberogo Tuhan nit ninom werek halok he wene mondogat oma nenahalok nit ninoba ari'logo? Nit nineisugwi nen he, Tuhan nen yi wene ti wene mondok elalin mene hilingiti logolik o Mesir en wo'ninarek wulibi wagaikhe iluk tindelhi lagaukwa. Oba nen he, Aren yogondak nit obogetnisaluk afuni Midian mene nen sebelninarek logouwageluk it inenggiba ninobagaikhemo welago yi ri!” iluk yagatikhe.

¹⁴ A'nogo yagatikhemo Tuhan nen wene melalek yi Gideon oba yagatikhe, ”Afuni Israel mene ap Midian mene ina'ma werek mene andoma re, hat homame werek mene andem mondogat oba fikhalogo wulaginabi lanogen iluk, An nen lakhobagakhi lagi o,” iluk yagatikhe.

¹⁵ A'nogo yagatikhemo at Gideon nen onggo ikhi logolik, ”Tuhan neisena, nenahalok an laknobagaigeluk ikhi lagen? Afuni Midian mene nen nit Israel mene sebelninarek were'ma, an nen telinabumo eloga? Nit ninunggulenu Manasye mene afuni fenakwe re inomame endep werek oba nen he, inunggulenu akhogo mene an nunggulenu mene re ninomame mondok lek. Nen, an nunggulenu mene andi fenakwe higitsek oba nen an enek he mondok elo'lek mene welagi o, neisena,” iluk yagatikhe.

¹⁶ A'nogo yagatikhemo, Tuhan nen ikhi logolik he, ”An nen hat lebethabigin enggere, eberogo nen harenek he elok! Hat hamu nen enek he it afuni Midian mene andi inebe hokhorogo werek oba nen he, we siserogo ap misik mene omame leget fou hakhogo inomame leget fisambik, wolelenggenhogo fisagain o.

¹⁷ A'nogo yagatikhemo at Gideon nen ikhi logolik he, ”Tuhan neisena, haren an noba hendawimo wute halok he, wene andi Tuhan nen yaganete iluk, an fut fagain nen he enegengge ekhe hilingfein o.

¹⁸ Hat hebe an nenangot niikhi logolik, were'ma an nen he hat hobaget sumburu ekhe wani lambik wokhesi wesumo lanogen he arem logoin o,” iluk yagatikhe. A'nogo isikhemo Aren he, ”Fano. An he, hat hambotkwe wagen halok layogen he. ya nenangot hiikhi logolik logogin o,” iluk isikhe.

¹⁹ A'nogo isikhemo, at Gideon a'nogo sugulogo ailoba lagaikhesik he, kambing oan mene ekhe wanhikhesik, tepung 10 kilo oba re, roti fitungge ragi legengge weratikhe. A'nogo hilingitikhesik wam isago a'nogo si ugu meneba kwalogo figik, i wam isago agai a'nogo waruk oba keralogo figik, isikhesik abirengge a'nogo waluk at ebe e patie a'nogo eroma nenangothikhi logolik were'ma wogosi wagaikhe.

²⁰ Malaikat Allah a'nogo nen ikhi logolik, ”Wam isago inom, roti werago inom he helep yiba fembik he, wam isaten mene agai ari re ambolebene kweisalin o,” iluk yagatikhe. A'nogo yagatikhemo re Gidion nen he isikhe mene aremnogo higithogo nek hilingitikhe.

²¹ Andi nen he malaikat Tuhan a'nogo enggimo tomuk fisogo welagaikhengge a'nogoba wam isago a'nogo inom roti a'nogo inom oba watfesikhe. A'nogo hilingfesikhemo re helep a'nogoba nen he endu amulok kulung hikhi logolik wam isago inom roti omanogo inom mondogat nasikhe. A'nogo hilinglagaikhemo nen malaikat a'nogo koma kwe laga heat longgo isikhe.

²² A'nogo hilinglagaikhemo at Gideon a'nogo nen he, andi re malaikat Tuhan ebeat nambit wagama higi, iluk fut fesikhe. A'nogo hilingitikhesik at Gideon a'nogo ailo nen ikhi logolik, ”Neisena Tuhan Lego Mondok welagen mene, an he malaikat Hat mene andoma ekhe ninom ambi agosik ninelokhe wuthogo yet-yet ago andi nen, An nebe alomat lasigin higi!” iluk yagatikhe.

²³ Andi yagatikheba nen Tuhan nen he, ”Hailo agun o. Hendawinggen hambukhogo, hebe wa'lasigin lek,” iluk yagatikhe.

²⁴ A'nogo isikhemo Gideon nen mezbah ekhe wutikhesik enu re, ’Tuhan andi re neluk faget fanot nobagali'lago mene ero,’ iluk salhikhe. Mezbah andi re o yogondak ogo re o Ofra afuni Abiezer mene inawi kota andiba werek.

²⁵ Hup andi sambul Tuhan nen wene ekhe Gideon yagati logolik mel yagatikhe, ”Hat heisena nen wam sapi ai mene mondok fano mene umur 7 tahun oba mene halok ekhe wanino. Wanimbik he heisena nen kembu Baal faget yi mene ti mene nolhu mene faget mezbah wutikhe mene andi moluluk isigik, kembu alik waganek dewi Asyera andi inom moluluk isigik ino.

²⁶ A'nogo hilingfuluk he molulukhogo lakfagain mene andem amboloba re mezbah heisena Tuhan Allah nobaget mondok fanorogo wu'no. Wut fembik he wam sapi ai mene a'nogo ebe abirengge Tuhan nobaget nolnetu mene iluk nolne'no, e timuk liabek mene kembu Dewi Asyera alik waganek mene haren mululukhogo lakfisagain mene andi re, e nolhu mene faget wurogo nolino,” iluk yagatikhe.

²⁷ A'nogo yagatikhemo Gideon nen he amingmingengge inebe 10 nen wenagaisogo fisasikhesik he Tuhan nen yi'nogo hilingi'no iluk isikhe mene aremnogo higithogo hilingisi lagaikhe. A'nogo hilingitikheba nen afuni at ogogwi agoromi inom, o kota at werek oba andoma mene inom inebe ailo nen linggene hilingiti'lek hubanggo mondok hilingitikhe.

²⁸ A'nogo hilingitikhemo afuni o kota andoma mene hubet ineluk agaukwasik kwelakhasukwa re Baal faget mezbah a'nogo inom kembu he Dewi Asyera ilirengge hilingik mene mendek a'nogo inom mondogat talorogo wengik were'ma re, obali'mo andem no mezbah misik ekhe wuri'mo re sapi ai mene Tuhan endawimo agaiyek hoageluk warogo nolhikhemo welagaikhe.

²⁹ A'nogo hilingik welagaikhemo it-it heinok wok-wok aga logolik, ”Yoma re sani nen hilingita? Iluk heinok woginabik lagunemen he at Yoas amlogo Gideon a'nogo nen hilingite o,” iluk isukwa.

³⁰ Andi isukwama iren Yoas oba ikhi logolik he, ”Hat hamlogo nen he mezbah Baal a'nogo inom, nen e timuk he Dewi Asyera alik waganek menegeisogo liabek mene mezbah fena fikhit werek mene a'nogo inom tukhumhogo lakfikhe. Ma re yogondak yaat hat hamlogo ari waluk wulibi me o. At ebe wasugun o!” iluk isukwa.

³¹ A'nogo isukwama Yoas nen it ap Gideon wasugun iluk isukwa mene a'nogo inoba ikhi logolik, ”Hit he kembu Baal ebikhit agepsik elele wanhi logolik ikhi lagep ari a? Ap sa nen Baal ebikhit aga halok he yogondak yaat at andi ebe mondogat wasugun. Nen, Baal andi re eberogoat Allah halok he mezbah moluluk ikheba andem en onggwaregen agap teloago,” iluk yagaisasikhe.

³² At Yoas nen ikhi logolik, ”Baal faget wam warogo noletuba mezbah a'nogo at Gideon nen moluluget fesikhemo re, at Baal enat Gideon ebe wasuago,” iluk isukwama aremnogoat, at Gideon enu re Yerubaal iluk salhukwa.

³³ Andem sambul he afuni inunggulenu Midian mene inom Amalek mene inom afuni inunggulenu ekhe o ilingage leimo i Yordan fena mo liabi wagarek fikhit andoma werek mene inom mondogat kabogetukwa. Kabogetukwasik i Yordan palogo wagaukwasik he inawi tenda o Yizreel tonggoma andoma wutukwa.

³⁴ A'nogo wutukwaba nen he Allah Areagun Gideon oba agaikhesik, ap inunggulenu Abiezer werekwe mene at inom andogosi wesuageluk wolinafi logolik, trompet ane fut hasukwa.

³⁵ A'nogo wolinafukwama aren nin yonggo re it inunggulenu Asyer mene inom, Zebulon mene inom, Naftali mene inom, Manasye mene i Yordan ima nen mo liabi wagarek fikhit inom, mo ubuk ikherek fikhit werek mene inom mangosi wesuageluk yonggo lakfisasikhe. A'nogo lakfisasikhemo re it inebe mondogat andi re at Gideon lebethouwogeluk ambit wagaukwa.

³⁶ Wagaukwama, at Gidoen en Allahba ikhi logolik he, ”Tuhan neisena, Haren an yaganeti logolik, afuni Israel mene fikhalogo fisanogen hayonggo figi o, iluk yaganeten a'nogo,

³⁷ eberogo nen halok he, kweang an welagiba ya re niren gandum enggen lolhi lagoba welagi. Ma re an nen domba esi palek yi arem fikhi lagi. O hobit hubet ambi lilengge nen domba esi ariba kulumak fikhe halok he, an nen afuni Israel mene fikhalogo fisoageluk eberogo nayonggo fikhe iluk futfagain o,” iluk yagatikhe.

³⁸ A'nogo yagatikhe aple a'nogo eberogo agaikhemo re, at Gideon nen hubet siakhogo eil ha lagaikhesik he domba esiba lilsi'norek mene a'nogo agai perelogore waruk misik mene elema ele sophogo keralogo fesikhe.

³⁹ A'nogo keralogo fesikhesik Allah oba ikhi logolik he, ”Tuhan neisena, an nen wene hobuk ekhe yagaheti lagimo wena'nesu fuk neisena. An nendawinggen wenggelogo re domba esi yiba hobuk walhagain, a'nogo walhugunemen domba esi palek mene yiba lilengge nen kulu lagalhi'lek tombonse'ma nen kweang enek minsek halok he, an nen fut fagain o,” iluk yagatikhe.

⁴⁰ A'nogo yagatikhemo o hup a'nogo sambul Allah nen he Gideon nen kinotikhe mene a'nogo higithogo hilingitikhemo ohealek hubet he domba esi a'nogo tombonsek kwelek, kweang enek he lilengge nen minet fesikhemo hasikhe.