HAKIM–HAKIM 5 - Allah Wene Fano Wene Hupla Inane

He Debora inom, ap Barak inomen wuni watukwa wene

¹ A'nogo legetfisasukwasik, o andi sambul he Debora inom ap Abinoam amlogo Barak inomen wuni yi'nogo watukwa.

² Afuni Israel mene inogogwi kaindek omanogo weim yabugun iluk sikhiphogo aga, ap inebe mondogaren inendawinggen oba nenat yabi logoin aga andi nen, nineisena Tuhan fogerasuogo.

³ Nit afuni Israel mene nineisena Tuhan Allah a'nogo faget wuni wati lagi yi, hit ap hinenupogot hinagoromi kaindek hinomen hinesanggo holini o.

⁴ Nineisena Tuhan hat hebe tom Seir oba nen wulipluk wagunemen, hat hebe o wilayah Edom oba nen herakfisaluk wagunem, kweang abolok igik, nen pogoroba nen i anggwe halogo pelabi wagik, ohenaba nen meiso kweisalogo pelabi wagik, ikhi lagen mene o.

⁵ Nineisena Tuhan handom Sinai eisewerek mene, Israel mene ineisena Allah helokhoma yi tom ti tom mondogat abolok ikhe.

⁶ Samgar hun Anat amlogo welagaikhe andem oba inom, nen he Yael werek oba inom he, kwe bene afuni inelokhe welagaukwa lek, we, kwe endep kwe nen kwanirogo laga lagaukwa.

⁷ Israel mene inawi kota-kota omanogo afuni mondok le'ma, hat Debora afuni Israel mene inagaisa asigiluk hendawinggen hundik mene wagen,

⁸ Israel mene nen tugwi kembu faget nineisena ebe yi aro, iluk inendawinggen oba himbiret faga, fagasik fogerasuogeluk ugunem naiba weim kagal laga. Ap weim inanini mene inebe 40.000 mene inanggele'ma nen ogo, ap misik ekhe nen sikhe wanhi'lek.

⁹ Ap Israel mene inogogwi kaindek weim awene agarek mene inom, afuni holhu mene inomen inendawimo nen anggaluk weim yabugun aga andi, Nendawilage, iluk hai wathinafi lagi o, Tuhan enek fogerati logouwok!

¹⁰ Hit ap wam keledai kut mene amboloba talfuluk laga-lagep mene andi inom, hit hinasu wam oroa'ma talfuluk laga-lagep mene andi inom, Nen hit afuni ekhe hineisok oba laga lagep mene andi inom ninomame ago wene andi yagaisilik laga logoino!

¹¹ A'nogo yagaisilik lagunem, afuni i mogo habuli'mo wuni watu mondok logolik, nineisena Tuhan nen ninaselei mene mabenet fesikhemo, At againafuri Israel mene ninomame agosik, iluk agap sagalogo yagaisilik laga logoino. O kota leget ambe palekwe erathigik weri'lagwi.

¹² Wesimbik he Debora hebe menlame o, menlasimbik wuni ero wulabin. Hat Barak Abinoam amlogo yi, hebe siakhogo menlasimbik he, haselei mene inenggi hele warogo woginarek lan, ili'lago.

¹³ Tuhan faget weim yabugun iluk, ap ekhe inafe hebelek mene, linet fisaga mene inogogwi melalinafu mene inoba lagaikha.

¹⁴ It he o Efraim en he tonggoma it inelokhoma Benyamin mene esa logale'ma andoma paga. O Makhir en he ap sikhe fisogo mene inogogwi panglima pi wagaikha, nen o Zebulon oba nen he inogogwi sikhe fisogo mene perwira weinam agaikha.

¹⁵ It Isakhar mene inogogwi re, Debora inom wagaikha o. Ap Isakhar mene andi re, an Barak nombo'ne lagaikha. It he an nombo'ne tonggoma paga. Oba nen he, it inunggulenu Ruben mene re inane misik lambulhi'lek andi nen he, lagi'lek kamo aga andi.

¹⁶ Domba inanggelekwe kamo aga andi nenahalok? Ap anggo halherek mene nen anggo woletu mene ane holugun iluk kamo aga a? It ap Ruben mene andi re inane misigat agasik he lagi'lek kamo aga andi.

^17-18 It Zebulon mene inom Naflati mene inom weim ambeba inaninirogo hilingitu kwelek, it ap Dan mene re, inangge kapal herakfuluk lagi'lek welagaikha. Andi hak he Gad mene ogo re, i Yordan aik elikwe timur fikhit kamo agaat. Ap Aser mene inawi i laut esanggokwe werek mene ogo re, wulibi lagi'lek, kamo agaat andi.

¹⁹ Ap raja-raja mene re, o Taanakh I Megido ima horokhogo andoma weim yabi lagaikha, Nen it raja-raja Kanaan mene re weim inomamerogo yafa. Meneat he, hugulengge perak mene ogo ekhe helaluk wagaikha lek.

²⁰ A'nogo yafu kwelek, it hesagal pogoroba mene re it inebe werekwe andoma laga logolik, ap Sisera wasuogoluk, it inom weim yafaat.

²¹ I Kison he fu waga logolik, selei mene woginarek laga. I fu fonyalik-lenggalik lagarek andi hak an nomamerogo hilingisin iluk nendawignggenma nen ninghogo yaganeri'logo.

²² Ap inomame werek mene re, weim heise louwogeluk, inangge kuda silhugunem aninirogo laga logolik ineisok abolok telim-telim lili'lagwi.

²³ It ap Meros mene andi inom, ap Tuhan obaget inamurururogo weim yafarek mene nen hilingitarek hakhogo weim yafunem leberisa wagaikha lek andi nen he, malaikat Tuhan nen ikhi logolik, o andi inom afuni o andiba werek mene inom Allah nen homan fisoago, iluk ikhe.

²⁴ Ap Heber aiba Keni mene andi ogore, at agwe Yael andi re, it hemi o tenda sale'ma werek mene andoma inanggele'ma nen he, at Yael enek he Allah nen hokhorogo fanot fouwago.

²⁵ Sisera nen i kino ikhe meneat he, sapi eilak amusu wogote. It raja-raja nen inagai oak fano meneba keralogo nenggarek andi hak, susu hinagaisogo wogote.

²⁶ At he Yael en he, e kabuksek mene inom, posiemanggen telhu meneba inom Sisera tungethasikhemo, ungguloak halokhogo wate.

²⁷ at ebe he Yael elokhoma talorogo weing lagama re, kweangma warek were'ma haga.

²⁸ At Sisera agaisa nen he, jendela lekwe nen eilenggen wu'lasi lagik ikhi logolik he, kereta Sisera mene weri'lago lek andi re ninggi'nogo nen he, Sisera anggo kuda eisok abolok lumbu-lumbu ili'lago lek andi re nenahalok he, iluk hilingiti laga.

²⁹ Amingmingengge endawinggen mondok wenggelek mene nen, agaisa endawimo wenggel hasikhe mene onggo yagatikhe.

³⁰ It hugulengge wanha mene sumbut-sumbut agunem athe areng lek andi. Ap tentara inebe lombok helime yenggerugwi pirendek he a, misiktek he a, helugu kwelek he areng lek andi, Sisera asu unggulkwe mene onggo hokho mene wogota, Wogoti logolik hat hasiong fano mene inom wogheta. Muli figik, mola figik mene eil fano mene hat faget hobagaga, iluk yagate.

³¹ Nineisena Tuhan, at Sisera wato andi hak, afuni hat haselei mene ogo, a'nogo wa'lasuak. A'nogo meneat he, hat hagainafuri hendawi mene nek he, mo eil tilelek-walelek wagarek andi hak, it mondogat liarogo logouwago, iluk wuni watukwa. A'nogo hilinglagaikhesik oba nen, 40 tahun weim lek liolek fano welagaukwa.