HAKIM–HAKIM 3 - Allah Wene Fano Wene Hupla Inane

Afuni inunggulenu lombok o Kanaan kweang oba femhogo welagaukwa wene

¹ Afuni Israel mene o Kanaan oba andoma nen weim yafu aple inonggot mene andoma inobabut palinabigin iluk he, Tuhan nen ap inunggulenu miren mene hakhogo re o kweang andiba herakfisasikhe.

² Tuhan nen a'nogo hilingitikhe andi re it Israel mene inoba nen ap ta'laga logolik ket salhu mene omanogo weim yafu aple melalinabigin iluk hilingitikhe, nen wene ebe tukhumhogo re it weim yafu aple inonggot mene inobaget hilingitikhe.

³ Ap inunggulenu kweang andiba welagaukwa mene andoma re, it inunggulenu Filistin mene fuaben aremnogo inanggele'ma welagaukwa mene re, unggulenu Kanaan mene inom, Sidon mene inom, Hewi mene tom Libanon ebene welagaukwa mene inom, Tom Baal-Hermon oba nen he kwe o Hamat lagaikharek mene andiba huli andoma werek mene inom welagaukwa.

⁴ It inunggulenu andoma re it Israel mene faget inobabut palengge hakhogo welagaukwa. A'nogo hilingik welagaikhe andiba re, afuni Israel mene andi nen he wene melalek Tuhan nen Musa bene it inambu inombalak wogisasikhe mene a'nogo higithogo hilingiri'lagwi a, lega, iluk enek aga lagaikhe.

⁵ Andiba re ap Kanaan mene, Het mene, Amori mene, Feris mene, Hewi mene, Yebus mene re kweang andiba afuni Israel mene inom seberogo femhogo welagaukwa.

⁶ Afuni Israel mene nen he it inunggulenu lombok andoma mene inom nanggelek hanggelek inagagwi, inaguni wok-wok aga logolik he, it inom kembu dewa omanogo apne wanhi lagaukwa.

Otniel en hilingitikhe wene

⁷ Afuni Israel mene nen he it ineisena Tuhan Allah a'nogo elokhoma weak mondok hilingiti lagaukwa. Iren he At oba inonggot a'luk he kembu Baal inom, Asyera inom oba apne wanhi lagaukwa.

⁸ Andiba re, Tuhan nen afuni Israel mene inoba anini fesikhesik he, afuni Israel mene andi at raja Kusyan-Risyataim awi Mesopotamia mene andi nen inomame leget fisoageluk herakfisasikhe. Herakfisasikhemo 8 tahun he raja andi nen ferinarek welagaikhe.

⁹ Andi nen afuni Israel mene nen he, ”Tuhan lebetninabin o,” iluk kinotukwama, it fikhalogo fisoageluk Tuhan nen Otniel wogisasikhe. (Otniel andi re Kaleb agot hun Kenas a'nogo amlogo.)

¹⁰ Tuhan Areagun Otniel oba louk isikhemo re, at Otniel it Israel inap wene melalinafu mene agaikhe. Aren weim yabi lagaikhe mene re, ap raja Mesopotamia agun andiba nen Tuhan nen at omamet fesikhe.

¹¹ Andiba re 40 tahun nen he, o kweang a'nogoba weim abok legengge fano lioksek welagaikhe. Andi nen hobugen Otniel ebe wa'lagaikhe.

Ehud en hilingitikhe wene

¹² Afuni Israel mene nen he nekhengge weak hilingitukwama, Tuhan nen ap raja Moab mene hun Eglon a'nogo it Israel mene inoba nen mondok omame asuageluk hilingfesikhe.

¹³ Raja Eglon andi nen he ap inunggulenu Amon inap inom, Amalek inap inom sebetukwasik he, it Israel mene inomame leget fisaluk o Yerikho, kota e kurma eroma andiba sebelasikhe.

¹⁴ Sebelhikhesik 18 tahun andi re ap Eglon andi nen it Israel mene sebelinarek welagaikhe.

¹⁵ Oba nen he, it Israel mene nen lebetninabin o, iluk Tuhan enu hombuk palhukwama re, it fikhalogo fisoageluk Aren Ehud wogisasikhe. Ehud andi re enggi hare agun, nen at ebe re hun Gera amlogo, unggulenu Benyamin mene, at andi nen it Israel mene nen raja faget onggo fugu mene omanogo waluk hun Eglon a'nogo wogosi laga lagaikhe.

¹⁶ Linggene misik sambul at Ehud en he pisok ekhe enggat fena-fena felfelenggerogo magaisogo ambisang merenghogo uanhogo re setengah meter hilingisogo fougetikhe. Fougetikhesik he, pisok a'nogo ouwa'ma enggi pikhit fikhit asu laberek mene nen salogo kwelakfesikhe.

¹⁷ A'nogo hilingitikhesik he afuni Israel mene nen raja Eglon faget onggo fesukwa mene omanogo waluk lagaikhe. raja andi re ebe mondok hokho logolik asei enek hoporek agun welagaikhe.

¹⁸ Onggo fesukwa mene omanogo wogetukwasik, Ehud en ap uang emas mene waluk lagaukwa mene omanogo loageluk yagaisasikhe.

^19-20 Oba nen at Ehud enek he o Gilgal horokhogo helep hesesengge waganek mene were'ma omanogo kamo isikhesik sugulogo hun Eglon ambit wagaikhe. Andem sambul he, at Eglon a'nogo re awi istana senggelek sap pirenek meneba eil mondok sakhi-sakhore'ma omanogo welagaikhe. Were'ma wagaikhesik at Ehud en hun Eglon oba ikhi logolik he, ”Neisena kain hanggiluk welagen mene! An hamingmingengge nen he neisena hat hobaget wene hinagaisogo yagahesu hak mene ekhe waluk wagi o,” iluk yagatikhe. Andi isikhemo raja nen ikhi logolik he, ”Po'logoin,” isikhesik aren he at amingmingengge omanogo we it Ehud inom enek inamu fisaluk wulibuageluk yagaisasikhe. Andi nen at Ehud a'nogo raja hurek werek oba aremnogo era'lu hophogo asi lagaikhesik, ane ikhi logolik, ”Allah nen wene neisena hat hobaget ikhe mene ekhe werek!” isikhe. A'nogo ugunem holhikhesik raja a'nogo siakhogo menlagaikhe.

^21-22 Aremnogoat pikhit at Ehud en he angge pisok a'nogo enggi hare fikhiren ouwa'ma abel pikhit fikhiren lilisa aplere hun raja a'nogo al tulem talogo fesikhe. A'nogo warogo fesikhemo re karok a'nogo aik mondogaren pikhit ayoba ubukhogo kwisikhemo re, pisok a'nogo ebeba taungsek kwelek,

²³ at ebe kwe enggen watfuluk wulibi lagaikhe.

²⁴ A'nogo hilingitikhemo at raja amingmingengge omanogo wagaukwasik kwelakhasukwa re kwe sou ambe a'nogo ninghogo yagarek were'ma hasukwasik he, iren anggikhi logolik raja ebe o elonggoma werek oba nen he amisema kwikhemo hea iluk anggasukwa.

²⁵ It a'nogo nenangot hikhi logolik aninurogoat welagaukwasigen, at raja a'nogo kwe hutu legen he, inobakheindok palagaikhemo kunci wanhukwasik he kwe a'nogo hurogo kwelakhasukwa re hun a'nogo ebe warek o hulumo elengakse'ma hasukwa.

²⁶ Nen it ariginhu kwelek a'nogo re at Ehud a'nogo helep hesesengge waganek werekwe a'nogo nen he heise o Seiraba asi lagaikhe.

²⁷ At a'nogo it Efraim mene inandom kwe nen omanogo asi lagaikhesik weak-weak he, ap Israel mene weim yabi wesuageluk trompet futhasikhe. It a'nogo wagaukwama re aren it hondoginapluk o tom oba omanogo nen pi wagaukwa.

²⁸ Pi wagaukwasik aren it inoba ikhi logolik, ”Tuhan nen hit hinaselei mene ap Moab mene a'nogo hit hinobaget inomame leget fisikhe enggere, an nombo'ne we'ni o,” iluk yagaisasikhe. Andi isikhemo re, it Israel mene a'nogo at Ehud en helagerogo re tom oba nen pi wagaukwasik, iren he ap Moab mene nen i Yordan palogo wulifarek oba a'nogo sebelhukwa. It inaselei mene a'nogo re ap misik iluk ogo ekhe polokhogo wulibi loageluk herakfisasukwa lek.

²⁹ Weim yafukwa mene andiba re ap Moab inap sikhe fisogo mene mondok ebendek mene nek he inebe 10.000 nen inoatukwa; misik iluk ogo ekhe wulifukwa lek.

³⁰ Linggene andi sambul he, Israel inap oba nen Moab mene inomame lek agaukwama, kweang andiba 80 tahun andi re weim abok legengge liolek mondok welagaukwa.

Samgar en hilingitikhe wene

³¹ Inoe wene melalinaferek mene ombo'ne menlagaikhe mene re Samgar hun Anat amlogo andi. Aren ogore amurururogo hilingitikhesik he it Israel inap telogo fisasikhe. Tomuk wam lembu silinarek laga lagaikhe meneba re, aren ap Filistin mene inebe 600 nen inoatikhe.