HAKIM–HAKIM 21 - Allah Wene Fano Wene Hupla Inane

Helime tugum it Benyamin mene inagagwi asugun mene fougetukwa wene

¹ It ap Israel inap o Mizpa kabogetukwasik iren Tuhan eilhanem inane menfikhi logolik, ”Nit nina'logomi misik iluk ogo ap Benyamin mene nen woginabugun mondok lek,” iluk inane huli pal fesukwa.

² Andi isukwasigen iren o Betel lagaukwasik he, Allah elokhoma omanogo nen inendawi ou en inendawimo heiselhi logolik he hurek welagaukwa. A'nogo logolik iren le agu werek kwelek enek o arat hubagaikhemo inane ikhi logolik he,

³ ”Tuhan Allah nit Israel mene nineisena, nenahalok a'nogo hilinglaga? It inunggulenu Benyamin mene andi re nit ninunggulenu mene omanogo nen unggulenu misik mene oba nen, mondok lek asu hak hilinglarik lili'lagwi andi,” iluk le agaukwa.

⁴ A'nogo hilingitukwasik ohealek hubet siakhogo re, afuni Israel mene nen mezbah wutfesukwasik he Tuhan ninom sebesugun iluk At endawimo agaiyek asuageluk mene inom, nen fanotninobagauwageluk mene inom warogo wogetukwa.

⁵ Andi nen he, it inunggulenu Israel mene a'nogo inanggele'ma omanogo nen it inunggulenu omanogo nen ekhe attak o Mizpa Tuhan were'ma lagaikharek oba omanogo lagaikha lek mene ekhe werek hea iluk ayo wutukwa. (Andem sambul iren hombuk palhi logolik, Ap o Mizpa wesuageluk wolinafa mene andoma ekhe lagi'lek kamo aga halok he ebe pinggi wasugun,) isukwa.

⁶ It afuni Benyamin mene nen he it inagaila'lak Israel mene faget inendawirinafukwasik he iren ikhi logolik he, ”Yogondak yi sambul nit ninunggulenu Israel mene a'nogo nen unggulenu misik mene ekhe pelak fogo.

⁷ Niren TUHAN oba hombuk palogo ikhi logolik, nit nina'logomi re it Benyamin mene inagagwi asugun lego, iluk ninane menfogoma re it Benyamin mene fena werek mene arem inagagwi logouwageluk he niren ninggi'nogo hilingisu hak?” isukwa.

⁸ Ma re iren inero misik mene ekhe it inunggulenu Israel meneba nen o Mizpa kabogesi lagunem a'nogo lagaikha lek mene ekhe werega, lega, iluk inareng palhukwama nen he, ap Yabes inap o Gilead mene omanogo nek he ap misik iluk ogo ekhe o Mizpa lagaukwa le'ma heraginafukwa.

⁹ Andi re iren inenu palek a'nogo kumurik lagunemen he andoma ap Yabes mene re ap misik mene enu iluk ogo ekhe welagaikhe lek.

¹⁰ Andiba nen he afuni o Betel kabogetukwa mene andoma nen he ap inailo lek mene nek inebe 12.000 nen mene afuni Yabes mene ap inom hemi inom inagainafuri inom inoasuageluk lakfisa lagaukwa.

¹¹ It andi miminginafi logolik he, ap mene inebe mondogat inom, hemi ap inagap inelu mene inom, mondogat andoma inoa'no, isukwa.

¹² Ma re hit afuni Yabes welagaukwa mene omanogo inanggele'ma nen he helime tugum ap inagap inonggot mene inebe 400 nen were'ma isasukwa. Isasukwasik he iren helime omanogo woginapluk he o Silo andi re o Kanaan kweang oba andoma o tenda sale'ma omanogo woginarek lagaukwa.

¹³ Andi nen, afuni Israel mene mondogaren he afuni Benyamin mene o Rimon helep unggulkwe wurik mene omanogo inoba ap yonggo lakfisikhi logolik he, ”Ninom sebesuogo,” iluk lakfesikhe.

¹⁴ Andiba re afuni Benyamin mene omanogo sugulogo wagaukwama re it afuni Israel mene nen he, helime tugum Yabes mene inoatukwa lek mene omanogo wogisasukwa. Oba nen he helime andoma re it Benyamin inap inom inebe higithogo agaukwa lek.

¹⁵ Nen Tuhan nen he it inunggulenu Israel inap inebe seberek werek kwelek a'nogo minggilu hak hilingitemo iluk, it Israel inaben he Benyamin mene inoba inendawirinafukwa.

^16-18 Andiba, nen he it ap kaindek-kaindek o Betel kabogetukwasik ikhi logolik he, ”Inunggulenu Benyamin mene inanggele'ma re hemi mondok werek lek. Oba nen he niren hombuk palogo ikhi logolik, ’Ap inebe lombogen he ina'logomi inaguni Benyamin mene woginabugun lego,’ iluk isugu mo re, ’Niren ninggi'nogo u hak nogo, nit he nina'logomi inoba hinaguni ap it mene helani,’ iluk yagaisa mo re elo'lego. Enggere, it fena aremnogo inagagwi logouwageluk he ninggi'nogo hilingisu hak? Nit Israel ninap ninunggulenu 12 nen omanogo unggulenu misik mene ekhe longgorek logogin andi re lego. Enggere, it inunggulenu Benyamin mene ari ogo ap inambisangma mene were'ma inaggweang abirengge fisogo logouwakhogo re niren heragaisogo fisouwogo,” iluk isukwa.

¹⁹ Andi isukwama iren ikhi logolik, ”Kwe misik werek mene re, Tuhan faget o Silo tahun hundik-handik kabogetu mene a'nogoba nen hilingisu hago,” isukwasik he, iren ikhi logolik (o Silo ari nen abel ambol fikhit he o kota Betel andi werek, nen mo ubuk ikherek fikhit he kwe o Betel mene nen o Sikhem lagaikharek mene werek, nen abel ambol kwe utara fikhit he o kota Lebona werek.)

²⁰ Isukwasik he, it ap kaindek o Betel kabogetunem kaboksek welagaukwa mene omanogo ap Benyamin mene fena andoma inoba ikhi logolik he, ”Hit he o Silo anggur yagokwe omanogo laluk he!

²¹ Hinebe hinago logolik andoma kagalek logoino. Hit hinago logolik were'ma nen helime tugum o Silo mene Tuhan faget tahun hundik-handik ebetarek mene andi wuni warogo wulibi wesugun a'naga o. Nen, it inebe wulibi wagu halok andi re hirogo anggur yagokwe andoma nen wulibi we'no. Wulibi we'luk he hit hinebe lombogen he helime tugum misik-misik palhigik helaluk he hit hinagagwi asuabagaigen helano. Helambik he o wilayah hit Benyamin meneba lano.

²² Helaluk lagunem hele andi eisena nen ogo nen erugwi nen ogo at faget hit hinoba wene fei wagu halok, hiren ikhi logolik he, ”It ari nit ninom logouwageluk herakfisobagaigen iluk kino yagahisikhi lago. Nit he weim oba re telogo wokhinabugun lek. Nen hiren nit wo'nisegep lek halok he hiren wene watigip mene a'nogo taganhogo hilingitigip lek. Enggere hit he weak hilingitigip lek, iluk yagahisogoin,” isukwa.

²³ A'nogo isukwama ap Benyamin mene omanogo it inoba yagaisasukwa mene omanogo higithogo nek hilingitukwa. It inebe lombok helime tugum o Silo wuni watukwa mene omanogo inanggele'ma mene palaluk he it mene wilayah ba omanogo lagaukwasik o kota omanogo nekhengge wuratukwasik omanogo femhogo welagaukwa.

²⁴ Nen, Israel inap amu mene omanogo ogore lagaukwasik he it inawi wilayah it inunggulenu inom, unggulenu akhogo hilingik mene higithogo inamu-inamu lagaukwa.

²⁵ Andem sambul he it Israel mene were'ma andoma ap raja ekhe welagaikhe le'ma re afuni inebe lombogen he it inendawimo nen fano anggugu mene omanogo nek hilingiti lagaukwa.