HAKIM–HAKIM 20 - Allah Wene Fano Wene Hupla Inane

It afuni Israel mene Benyamin mene inom weim yafukwa wene

¹ Andiba re afuni Israel mondogat mene o Dan abel utara fikhiren he o Bersyeba selatan fikhit oba nen, o Gilead mo liabi wagarek fikhit andoma nen he it inebe misik seberogo yonggo fesukwa mene a'nogo hologo o Mizpa Tuhan elokhoma andogotukwa.

² It kabogetukwa mene andoma inebe mondogat he 400.000 nen, ap sikhe fisogo mene ineisok oba laga lagaukwa inap andogerinafukwa. Nen, it inunggulenu lombok omanogo nen he inogogwi melalinafu mene ogore andoma kabogetukwaat.

^3-4 It a'nogo kabogetu kwelek he inunggulenu Benyamin mene nen holhugunemen he it inunggulenu Israel mene fenakwe omanogo re o Mizpa kabogeri'lagwi ugunem holhukwa. Ma re it Israel inap a'nogo nen he ap Lewi mene agwe watukwa agun a'nogoba heinok wokhiki logolik he, ”Wene mondok kwanirek mene andi re ninggi'nogo hilinglagama, nit ninoba tindel nisan!” iluk isukwama. Ap Lewi agun a'nogo nen onggo ikhi logolik he, ”An nebe inom, nagwe heihe mene nagweap erasigi mene a'nogo ninom he o Gibea ap Benyamin mene nen wilayah ba omanogo asi wagosik he andoma nogogo.

⁵ Andi nen he ap Gibea mene andoma o hubanggo an hera'nabik wagaikhasik he iren an nebe noasuogeluk he o an kwigirik nogokhi lagiba a'nogo labesi wagaikha, oba nen he hobuk an nagwe heihe mene nagweap eregi mene a'nogo inomame nen ninghogo inom nogogama nen he ebe wa'laga o.

⁶ Ma re an nen at ebe warek a'nogo waluk wagarik he, palhigik hilingfigirik nit ninunggulenu 12 mene aremnogo werekwe, unggulenu misik faget he kurik misiktek higik lakfilik lagi andi. An nen a'nogo hilingiti andi re, ap Israel mene inanggele'ma nen mondok kwanirek mene hilingita andi nen hilingiti o.

⁷ Hit ya welagep mene arem he hinebe Israel hinap enek welagepma re yogondak hiren wene yi faget lekhigik-mekhigik ubagaigen iluk kino yagahisikhi lagi o!” iluk yagaisasikhe.

⁸ Andi isikhemo re, ap ando-ma kaboksek welagaukwa mene omanogo inebe ambine menlagaukwasik inane ikhi logolik he, ”Nit ninebe mondogat he ninailoba iluk ogo, nen ninawi sabumo iluk ogo ekhe logoin lego.

⁹ Niren he yi'nogo hilingisugun: Niren he ap Gebia inap andi inoasi logoin mene re sa-sa iluk ninenggi walhambik he,

¹⁰ ap Israel mene ap mene nek inebe sepersepuluh nen he it fik-fougesugun. Nen, fenakwe re it Gibea inaben nit ninanggele'ma nen mondok kwanirek mene hilingita mene andi faget o Gibea inoasi kwimbik unggum inoba wogisogoin,” iluk isukwa.

¹¹ Andi isukwasik it Israel inaben inebe misik agaukwasik Gibea inap a'nogo inoasi lagaukwa.

¹² It afuni Israel mene nen ap wene waluk it wilayah Benyamin mene omanogo inoba lakfikhi logolik, ”Hit hinoba wene kwanirek mene re ningginik mene aga?

¹³ Nit afuni Israel mene ninanggele'ma nen wene kwanirek mene aga mene andi legabesuogen he, ap Gibea mene inobabut weak mene andoma niren inoasuogen he nit ninenggiba wo'nisani,” iluk wene lakfesukwa. Oba nen it Benyamin mene nen he it Israel mene fenakwe nen isukwa mene a'nogo holhi'legengge sagalogo herakfisasukwa.

¹⁴ A'nogo herakfisaluk he, it wilayah Benyamin a'ma werek mene andoma, Israel inap fena inom weim yabuogeluk he o Gibea kabogesi wagaukwa.

^15-16 Linggene andi sambul he it inawi kota omanogo nen he it ap sikhe fisogo inap inebe 26.000 nen kabogerinafikhe. Andem werek kwelek it Gibia inonggwarek mene nek he ap inebe wenago mene 700 nen tegelogo fisasukwa. Ap abirengge andem he inenggi hare mene nek helebenggen kwelakfuluk hugesi lagunem he, endephogo iluk ekhe taganet fagarek lek inap.

¹⁷ Nen, it ap Israel inap fenakwe inebikhit he ap sikhe fisogo inap milil-malalhogo hilingik inap enek he inebe 400.000 nen kabogetukwa.

Ap Benyamin mene inom weim yafukwa wene

¹⁸ Tentara Israel mene omanogo re o Betel wene kabogetunem omanogo lagaukwasik Allah heinok wokhiki logolik, ”Tuhan nineisena, nit ninanggele'ma nen he it inunggulenu mene tak ap Benyamin mene andi inoasi logoin a?” iluk heinok wokhasukwama re, Tuhan nen onggo ikhi logolik, ”Ap inunggulenu Yehuda mene tak loago,” isikhe.

¹⁹ Andi isikhemo ohealek hubethogo re it a'nogo lagaukwasik o Gibea tenda sali lagaukwa.

²⁰ Lagaukwasik he it ap weim yafu mene a'nogo o kota a'nogo elokhoma asi lagaukwasik weim yabi kwisukwa.

²¹ Ma re it Benyamin inaben weim yafarek inap omanogo re it inebe wulifi logolik he, it Israel inap weim yafi lagaukwa mene a'nogo inom yafukwaba nen he linggene a'nogoba re ap Israel mene inebe 22.000 nen inoatukwa.

^22-23 It inomame lek agaukwa andiba re, it Israel inap wene kabogetunem omanogo lagaukwasik Tuhan oba le agu werek kwelek enek he o arat hubagaikhe. Iren Tuhan heinok wokhiki logolik, ”Tuhan nineisena, niren nit ninagaila'lak Benyamin mene andi ninom nekhengge weim yabi logoin hea,” iluk isukwa. Andi isukwama Tuhan nen onggo yagaisikhi logolik, ”Fano o, lani o!” iluk yagaisasikhe. Andi yagaisasikhemo it Israel inap weim yafarek mene a'nogo nekhengge inagaiyek agaukwasik, iren inagoromi sikhe fisogo mene omanogo attak hilingitukwa hakhogo esa logalhukwa.

²⁴ A'nogo hilingitukwasik he inenggi pirenek meneba re ap Benyamin mene a'nogo inom weim yabi lagaukwa.

²⁵ Nen, inenggi pirenek mene andiba re it Benyamin inap weim sineli kwikhi logolik he, it Israel inap sikhe fisogo inap inebe weim yafu mene faget inelu-pinelu mene nek 18.000 nen inoatukwa.

²⁶ Andiba re it Israel inap a'nogo nekhengge o Betel lagaukwasik Tuhan oba le asi lagaukwa. Andoma nen he it inebe sumburu ninggi'lek heang werek kwelek enek he o hubagaikhe. Nen, iren wam Tuhan nen fanot ninobagauwageluk warogo nolhu mene inom, wam Tuhan ninom sebesugun iluk warogo wogetu mene inom wogetukwa.

^27-28 Andem sambul he, Peti Wene Warek a'nogo re o Betel were'ma re, at Pinehas hun Eleazar amlogo Harun omba a'nogo imam welagaikhe. Ma re it Israel inaben Tuhan oba heinok wokhikhi logolik he, ”Tuhan nineisena, niren nit ninagaila'lak andi inoba weim sineli louwoga? Athe niren it ninom weim yabi lagu aple andi herakfisouwoga?” iluk heinok wokhasukwa. Ma re Tuhan nen he, ”It inoba weim sineli lani o! Hobit he it andi inoba nen An nen hit hinomamet hinobagagin,” iluk yagaisasikhe.

²⁹ A'nogo Tuhan nen yagaisasikhe mene inesanggo holhukwasik it Israel inap a'nogo nen he, tentara iren mene omanogo it inebe o Gibea horok-horokwe hinagokwe omanogo hou salek-palek hilingfisilik lagaukwa.

³⁰ A'nogo hilingfuluk linggene henaganek mene re it Benyamin mene sikhe fisogo inap iren attak hilingitukwa a'nogo hakhogo inelokhe o Gibea fikhit hilingfesukwasik weim sinelhukwa.

³¹ Nen, it Benyamin inaben ogore o kota nen wulibi weri'lagwi anggoageluk he, weim inoba wulifukwa. Wulifukwasik attak hilingitukwa hakhogo re iren ap Israel mene o kota endakwe fikhit kweang heale'ma ebekwe o Betel lagik, Gibea lagik agarek oba andoma ap inebe 30 nen welagaukwa.

³² Andiba nen it Benyamin inaben anggikhi logolik, ”Attak hilingito hakhogo it Israel mene inomame leget fisogo,” anggasukwa. Oba nen he it tentara Israel mene omanogo nen wene mati logolik, ”Nit he Benyamin inap andi nineranhogo lisogo woginarek he o kota ba andoma nen uanhogo kwe hokho meneba andoma lirinarek wesuok,” isukwa.

³³ A'nogo isukwasik he it Israel mene esa lirinabi lagaukwa mene a'nogo lirinarek he. o Bal-Tamar lagaukwasik omanogo esa foli lagunem he, ap tentara it mene fena o Gibea horok-horokwe salhukwa mene omanogo o kota endakwe fikhiren siakhigik wulibi wagaukwa.

³⁴ It andoma re ap Israel inap mondogaren ap wenago mene nek inebe lambulogo re 10.000 nen omanogo wulibi wagaukwa. Nen, it ap 10.000 a'nogo nen he weim o Gibea sineli kwisukwama re weim elokhe mondok weakhogo yafukwa. It Benyamin mene re welagi'legat inomame legasugun a'nogo re inonggorat welagaukwa.

³⁵ Tuhan nen it ap Israel mene a'nogo it ap Benyamin mene inoba nen inomamet fisasikhemo re linggene andi sambul it ap Israel mene nen he tentara Benyamin mene inebe 25.100 nen inoatukwa.

³⁶ Andiba nen enek he it Benyamin mene a'nogo nen he nit ninomame lek ago iluk inelu agaukwa. It Israel inap esa hokhoba omanogo re it inagoromi o Gibea horok-horokwe salek mene omanogo inoba inendawi himbirik logolik he ineranhogo it Benyamin mene a'nogo lirinarek wagaukwa.

Israel mene inomame agaukwa mene ero a'nogo

³⁷ Nen it ap salek welagaukwa mene omanogo re weak-weak o Gibea hobet ha kwikhi logolik o kota elonggoma omanogo ekhema-ekhema irenek saga ikhi logolik, afuni o andoma welagaukwa mene omanogo mondogat inoatukwa.

³⁸ Oba nen he oan oba omanogo inane seberogo mati logolik, o kota andi tulem en endu hule mone'luk lagagu halok he,

³⁹ ap esa hokhoba lirinabugun mene omanogo re lagokhogo inambotkwe waga logolik, hobuk inaselei mene andi inoarik we'no, isukwasik he andem sambul ap Benyamin mene nen it Israel mene inebe 30 nen inoatukwasik iren anggikhi logolik he, ”Attak hilingitukwa hakhogo afuni Israel mene inomame legaphogo fisasukwa,”

⁴⁰ oba nen he ferekhogo aremnogo o kota Gibia tulem andoma nen endu hule mone'luk lagasikhemo re, it omanogo inambothan yethasukwa re it inawi kota a'nogo endu nunggunem hasukwasik he youk lagaukwa.

⁴¹ Nen aremnogoba re, ap Israel mene esa ebe mene a'nogo lagokhogo waga logolik he, Benjamin inap inoba hou wulibi wagaukwama re, it Benyamin mene a'nogo nen he, ”Nit mondogat ninomame lek asugun higi,” iluk inendawi fitukwa.

⁴² Andiba nen he, it a'nogo ap Israel mene inoba nen heise re o leikwe fikhit andoma logoin iluk lagaukwaba nen he, it inebe wulifu aple mondok elo'lek agaikhe. It inebe re ap Israel mene esa hokhoba wagaukwa mene a'nogoba nen hilingi'luk, nen it esa ekhe salhukwa mene o kota fikhiren kwisukwa mene a'nogoba nen hilingi'luk tulem omanogo abunget isasukwama, inafekwe nong-hong isukwa. It Benyamin inap fikhit he mondok mabenet fisasukwama re, anggolo eberogo hasukwa.

⁴³ Ap Israel mene nen he, it siginarek-muginarek lagaukwasikhe o Gibea nen mo lagai lagarek fikhit obalik misi'mo andoma fisa lagaukwama re,

⁴⁴ ap Benyamin mene weim yafarek inelu-pinelu inap mene inebe 18.000 nen inoatukwa.

⁴⁵ Nen tentara Benyamin mene omanogo re sugulogo o leikwe nen he o helep unggul Rimon oba omanogo lagaukwa. Lagaukwaba nen he, ap inebe 5.000 nen mene omanogo re ebekwe lagu kwelek inoatukwa. Nen, fenakwe re muginarek o Gideom oba andoma lagaukwa. Ap andem menere inebe 2.000 ekhe inomat inoatukwa.

⁴⁶ Arigini'mo re, tentara Benyamin mene linggene andi sambul inoatukwa mene inebe re 25.000 inoatukwa. Ap andoma re sikhe mene nek inoatukwa.

⁴⁷ Oba nen he, inanggele'ma andoama nen ap fena o leikwe nen o Rimon helep unggulkwe lagaukwa mene omanogo polokhogo wulibi lagaukwa menere inebe 600 nen. It inebe re o Rimon andoma tugi enggaminogo welagaukwa.

⁴⁸ Andi nen he it Israel inap nekhengge inambotkwe laga logolik he ap Benyamin mene omanogo inoba weim sineli lagaukwasik he Benyamin inap fena welagaukwa mene omanogo ap inom, hemi inom, yenggerugwi inom, inanggo mondogat inoatukwa. Nen it inawi kota a'nogo re mondogat endu nolhukwa.