HAKIM–HAKIM 19 - Allah Wene Fano Wene Hupla Inane

Ap Lewi mene inom he heihe mene inomen hilingitukwa wene

¹ It Israel inap inoe raja oan menlagi'lek kwelek o ap Efraim mene inandom oba andoma ap Lewi mene misik ekhe welagaikhe. Logolik he aren agwe o Betlehem mene misik ekhe he heihe hakhogo helasikhe.

² Oba nen, he a'nogo nen wene wenagetikhesik he nekhengge eisena aiba o Betlehem lagaikhe. Lagaikhesik he, he a'nogo tugi enggaminogo welagaikhemo re,

³ ap Lewi mene a'nogo ombo'ne lagaikhe. At laga logolik he amingmingengge misik ekhe inom eiso'marogo re wam keledai pire inom waluk lagaukwa. Lagaukwasik andoma asi lagaukwama re hele a'nogo nen ap a'nogo hondo'luk he eisena ambit lagaikhe. Ma re hele a'nogo eisena nen ap Lewi mene a'nogo hasikhesik agaiyekhogo wanhikhesik he,

⁴ haiba lagain lek iluk elele wanhikhe. Andiba re at enggi henagan andoma logolik, i ninggik, sumburu ninggik, nen he heihe mene agweabet erasikhe mene a'nogo inom nogogik isikhe.

⁵ Nogosukwasik he linggene henaganek meneba re, it inebe hubet-habethogo logoin iluk fik-fougeti lagaukwa. Oba nen he hele a'nogo eisena nen ap Lewi mene a'nogoba ikhi logolik he, ”Hit hinomamerogo lobagaigen he sumburu tak isasimbik naluk lobagaigo,” iluk yagatikhe.

^6-7 Ma re, ap Lewi mene a'nogo hu'lagaikhesik hele a'nogo eisena inom i ninggik, sumburu ninggik, isikhe. Oba nen he a'nogo hilingitukwasik a'nogo logoin iluk menlagunemen he hele eisena a'nogo nen elele wanhi logolik he mel isikhe, ”Hinagaiyek-hinagaiyek aple andoma hilingisimbik hinebe yoma nogoni” iluk isikhe. Ma re ap Lewi mene a'nogo enggi ekhe inomat andoma welagaikhe.

⁸ Linggene fuap meneba re, at a'nogo hubet-habethogo menlagaikhesik lagain iluk hilingitunemen he hele a'nogo eisena nen he, ”Sumburu naluk hobuk halok lagain,” iluk yagatikhe. Ma re it pire aremnogo sumburu ninggi logolik inebe andomok-andomok aple hilingitunemen he mo heai lagaikhe.

⁹ ”Andi nen he ap Lewi mene a'nogo amingmingengge inom, hele agweaberasikhe mene a'nogo inom he logoin iluk ugunemen hele eisena a'nogo nen ikhi logolik he, ”O mondok hup asigiluk ili'lago enggere hit hinebe yoma hinagaiyekhogo nogoni. Ohealek enek he hit hinebe hubethogo menla'luk hinaiba lobagaigen o,” iluk yagaisasikhe.

^10-11 Oba nen ap Lewi mene a'nogo re andoma logou aple abiren he, at ebe inom agwe a'nogo inom amingmingengge a'nogo inom anggo keledai hu'lagungge pire aremnogo inom wilipluk wagaukwa. Wagaukwasik o arat hubasigiluk ugu kwelek aremnogo o Yebus (andi re Yerusalem agare'ma) aremnogo asi wagaukwa. Asi wagaukwasik he amingmingengge a'nogo nen eisenaba ikhi logolik he, ”Hunai, nit he ap Yebus mene inawi kota ba yoma nogo ikhuogo,” iluk yagatikhe.

^12-13 Oba nen he eisena a'nogo nen onggo ikh logolik he, ”Lego. Nit he afuni Israel mene inebe lekwe halok he andoma nogo ugun lek. Nit he laga logombigen o Gibea ogo, athe o Rama ogo nogogun engge re louwogo,” iluk yagatikhe.

¹⁴ Andiba re it a'nogo o Yebus kwigi'legengge waga lagaukwasik he, it inebe o Gibea afuni Benyamin mene nen wilayah ba andoma asi wagaukwa hak he mo mondogat ubuk isikhe.

¹⁵ Ubuk isikhemo re, it inebe andoma nogo uogeluk o kota silimo omanogo kwi lagaukwasik he hurek welagaukwa. Oba nen he ap misigen iluk ogo ninom nogouwogen iluk hondogoisogo kwelaginafukwa lek.

¹⁶ Ma re it inebe aremnogo hurek were'ma nen he, ap yaman mene ekhe yabumo nikhi lagaikhesik he wagaikhe. Hun andi re ebe ap Efraim mene inandom oba omanogo meneba nen he andem oba re o Gibea andoma welagaikhe agun. (Afuni Gibea mene andoma fenakwere Benyamin inap welagaukwa.)

¹⁷ Ap yaman mene a'nogo wagaikhe re ap Lewi mene a'nogo o silimo omanogo hurek were'ma wagaikhesik, heinok wokhikhi logolik he, ”Nagailak. Hat he koma nen wagen, nen hebe koma lageluk?” iluk heinok wanhikhe.

¹⁸ Heinok wokhasikhemo aren onggo ikhi logolik he, ”Nit he yogondak o Betlehem Yehudaba omanogo nen wagosik he ninaiba o Efraim mene inandom oba omanogo nen abel endakwe fikhit louwogeluk wagosik welago. An nebere andoma nagun. Nit he ap o kota yi nen ap misigen ogo ekhe an ninom nogouwogen iluk hondok ninafa le'ma welago.

¹⁹ Nit he ninangge nunggu mene weregenego. Ninanggo keledai faget he yelengga inom nunggu mene inom he werek, nen an inom an nagwe yi inom an namingmingengge yi inom nunggu mene faget he roti inom anggur inom weregaro,” iluk yagatikhe.

²⁰ Andi isikhemo ap yaman mene a'nogo nen ikhi logolik he, ”Hinendawi fitubo. An nen lebethisagain enggere, o silimo yoma nogogun lego,” iluk yagaisasikhe.

²¹ A'nogo yagaisasikhesik aren it a'nogo hondoginarek at aiba lagaukwasik he, it inanggo keledai omanogo nunggu mene wogisasukwa. Nen ap pok mene omanogo re ineisok sobalhukwasik sumburu nasukwa.

²² A'nogo hilingiti logolik inagaiyekhogo werek kwelek he, ferekhogo aremnogo ap inobabut weak mene o kota andi mene nen o a'nogo labesi lagaukwasik iren kwe sou henambik telhi logolik he ap yaman mene a'nogoba re, ”Ap haren hondoginarek haiba fisa wagen mene andi niren hilingisuogen he nit wo'nisan o,” isukwa.

²³ Andi isukwama ap yaman mene a'nogo wulibi lagaikhesik it inoba ikhi logolik he, ”Nagaila'lak a'nogo re lego! At yi re an nambok hilingi'mo re, hiren hilingisu lek mene mondok kwanirek mene andi re hiren a'nogo hilingisugun lek iluk kino yagahisikhi lagi.

²⁴ Hobuk an nen he, at heihe agweap erikhe mene ari inom, an na'logo tugum mene inom wokhisamo hit hinebe aganhan hinabi'lago mene andi it inoba nen leget fogoin o. Oba nen he hiren mondok weak mene andi an nambok andi inoba hilingfisogoin lego!” iluk yagaisasikhe.

²⁵ Oba nen he ap inobabut weak mene omanogo nen ning-nanghogo ugunem he ap Lewi mene a'nogo nen he at agwe heihe mene a'nogo tamakhogo wulakfesikhemo re iren he a'nogoba inomameba hilingitu-hobalhu werek kwelek enek he inoba nen o arat wei isikhe.

²⁶ O hil mogolhu kwelek aremnogo re, he a'nogo wagaikhesik he ap yaman mene awi solombonma at agun nogokhi lagaikhe higithogo ebekhalem aremnogo wagaikhe hak he, eil furuk tung isikhe.

²⁷ O hubet a'nogo sambul he at eluk agaikhesik logoin iluk kwe hut ha wagaikhe re, at agwe heihe mene a'nogo enggi kwe sou fisogo logolik solombonma aremnogo wengik welagaikhe.

²⁸ Ariginik welagaikhemo re aren he a'nogoba re, ”Nit louwogen he menlame o,” iluk yagatikhe. Oba nen he, he a'nogo mondogat wa'lagaikhesik a'luk he ane isikhe lek. Ariginhikhemo re, aren he a'nogo hambogoisogo anggo keledai amboloba liak fesikhesik inaiba wesuogeluk wagaukwa.

²⁹ Oloba asi wagaukwasik he, inaiba kwisukwasik weim waganogo re he warek a'nogo palhigik he 12 nen hilingfesikhe. A'nogo hilingfesikhesik he aren kurik a'nogo afuni inunggulenu Israel mene 12 nen omanogo werekwe unggulenu misik meneba re kurik misik higik lakfilik lagaikhe.

³⁰ A'nogo hilingitikhemo re, hilingitikhe mane andi faget aben ineil hasukwa mene nen he, ”Afuni Israel mene o Mesir en wulibi wagaukwa huli nen he a'nogo ekhe hilinglaga mene werek lek. Enggere nit he alokhogo logogun lek. Niren ogo hilingisugun mene faget wene kabogesimbik ninane masuogo,” iluk isukwa.