HAKIM–HAKIM 18 - Allah Wene Fano Wene Hupla Inane

Ap Mikha inom inunggulenu Dan mene inomen hilingitukwa wene

¹ Andem huli re afuni inunggulenu Israel mene inoba ap inoe raja ekhe welagaikhe lek. Nen, it inunggulenu Dan inap he it inunggulenu Israel inap amu mene omanogo inom seberogo inanggweang it ekhe wogisasukwa le'ma re, o kweang wilayah it asugun mene herati lagaukwa.

² Andiba re, iren he ap it inunggulenu mene akhogo inebe mondogat inanggele'ma nen o Zora inom, Esytaol inom, werek mene omanogo ap inobabut hibil-hebelsek mene nek inebe fuaben wenagaisogo fisasukwasik o andoma ineil penesi loageluk yagaisasukwa. Ma re ap aremnogo lagaukwasik he, o tom oba wilayah Efraim mene nen omanogoba asi lagaukwa. Lagaukwasik andoma nen he it inebe hun Mikha aiba nogo isukwa.

³ It inebe hun Mikha aiba a'nogo kwi lagunemen he, ap souge Lewi mene a'nogo ane ugunem iren ane unggut enegengge holhukwa. A'nogo nen he it inebe at ambit lagaukwasik heinok wokhiki logolik he, ”Nenahalok hat hebe yoma welagen? Ninggi'nogo mene hilingiti lagen? Nen, hat hebe sa nen wokharek waga?” iluk heinok wanhukwa.

⁴ Andi iluk heinok wanhukwama ap souge Lewi mene a'nogo nen onggo ikhi logolik he, ”An he yoma at Mikha ninom welagi o. At faget an nebe imam logouwageluk mennobagaikhesik he, arenat an yabu hilingiti lagi mene onggo wo'neri'lago,” iluk yagaisasikhe.

⁵ Andi isikhemo iren at oba ikhi logolik he, ”Ariginik halok he, nit ninobaget lebetnisan. Nit wago mene yi faget ambisangma tibigin a, lega, iluk Allah heinok wokhan o,” iluk yagatukwa.

⁶ Andi yagatukwama at imam a'nogo nen onggo ikhi logolik he, ”Hit wagep mene ari faget he Tuhan nen fano anggikhenggere hinendawi fitubo,” iluk yagaisasikhe.

⁷ A'nogo yagaisikhemo re, ap inebe fuaben aremnogo o Lais lagaukwa. Lagaukwasik he afuni o andoma werek mene omanogo futfisasikwama, it inobabut he, afuni o Lais andoma welagaikharek menere, afuni inunggulenu Sidon mene nen welagaikharek mene inom he higitsek welagaukwa. O Lais andoma re o Sidom inom yathogo hilingi'mo re, weim abok legennge, it ekhe mene inom yi wene ti wene hilingiti'lek yi mene ti mene sik-pikhogo were'ma inoba homorogo nek welagaukwa.

⁸ A'nogo were'ma isaluk he, it ap inebe fuaben mene aremnogo sugulogo re it inunggulenu meneba o Zora inom Esytaol inom omanogo wagunem en he, iren hasukwa mene omanogo tindel isoageluk kinotukwa.

^9-10 Iren ikhi logolik he, ”Nit he o Lais andoma lagosik nineil hogoma re, kweang mondok fanorek welaga. Nen, o elonggo mondok heale'ma re yi mene ti mene mondok werek enek hilingik welaga. Nen lek mene ekhe welaga fuk. Enggere, niren o Lais andi weim sineli kwi louwogo. Nit he o yoma nek logolik yi'nogo ti'nogo hilingiti'lek wonghogo nek logogun lek. O kweang andoma At Allah nen nit ninoba wo'nisikhe anggikhi lagoma re, weak-weak o andoma lambik teli louwogo. O andoma hiren hineilenggen hogoin he, afuni andoma werek mene re ap en ninoasi wesugun anggigi'lek wonghogo werek a'naga o,” iluk yagaisasukwa.

¹¹ Andiba re ap inunggulenu Dan inap o Zora inom Esytaol inom omanogo nen he inebe 600 nen mene inasikhe inom fik-fouk etukwasik,

¹² it inebe o Kiryat-Yearim wilayah Yehuda meneba nen mo ubuk ikherek fikhit andoma lagaukwasik inawi sabu andoma sali lagaukwa. Andiba re o andem enu re Dan Awi Sabu salhukwaba, iluk agarek.

¹³ Andem en he it a'nogo hiling-hiling he, ap Efraim mene inandom oba andoma nen he at Mikha awi werek huli asi lagaukwa.

¹⁴ Ap fuaben mene it tak ineil penesi lagaukwa mene aremnogo nen he, it inagaila'lak inoba yagaisikhi logolik he, ”O misik ekhe andomaba re tugwi kembu no perak oba agut hilingisogo hilingita mene werek engge andi re hinelu a? Ekhe amu mene alik hilingik inomat werek, nen no efod ogo andoma weregaro. Enggere niren ninggi'nogo hilingisugun iluk andi re hinendawinggen ebe'no,” iluk yagaisasikhe.

¹⁵ Andi isukwama re, at Mikha aiba ap Lewi mene ebe souge mene a'nogo were'ma lagukwasik at ebe hilingik aple heinok wokhasukwa.

¹⁶ Andem oba re it inunggulenu Dan mene inebe 600 nen inasikhe mondok lik-louksek inap aremnogore o kwe kwi lagaikharek oba omanogo mendek logolik kagalek welagaukwa.

¹⁷ Nen, it ap ineil penesi lagaukwa mene inebe fuaben aremnogore pikhit oloma kwi lagaukwasik, iren he e mene alik waganek mene perak inom, saplirogo hilingik mene a'nogo inom, alik waganek alek mene ekhe omanogo inomat, nen no efod inomat wanhukwa. Nen, ap alage Lewi mene a'nogo re ap sikhe fisogo mene inebe 600 nen omanogo inom o kwe kwi lagaikharek oba mendek welagaukwa.

¹⁸ It ap fuaben aremnogo o hun Mikha aiba a'nogo kwi lagaukwasik no efod inom, tugwi kembu alik hilingik mene inom, inenggi abisak wanhunem he, ap alage Lewi mene a'nogo nen heinok wogisikhi logolik he, ”Nenahalok hiren a'nogo hilingiti lagep?” iluk heinok wogisasikhe.

¹⁹ Wogisasikhemo re, iren onggo ikhi logolik, ”Hane legame! Nit he heinok wo'ninafu lek. Hat he nit ninobaget imam logolik komotninafi logogin engge re nit ninom sebeime o. Ap misik mene eisok erokwe faget imam werek aple andi re elo'lego, herak fisan. Athe inunggulenu misik mene faget imam logogin andi nek he fano!” iluk yagatukwa.

²⁰ Andi isukwama re, ap Lewi mene a'nogo nen he wene isukwa mene a'nogo faget agaiyek anggasikhe. Andiba re aren efod inom, tugwi kembu alik waganek omanogo inom wanhikhesik he it inom lagaukwa.

²¹ Andi nen he ap esa a'nogo kwe louwogeluk he, yenggerugwi magendek mene inom, inanggo inom, inasungge inom he attagat lagaukwa.

²² Lagaukwasik it inebe pa'nakhogo hak asi lagaukwama nen he, ap Mikha nen afuni o era'lukwe welagaukwa mene omanogo hondoginafikhesik he inom seberogo afuni inunggulenu Dan mene omanogo muginarek lagaukwa. Lagaukwasik inoba horokhogo asi lagaukwasik,

²³ Mikha inom ap omanogo inomen he ngai-waiyengge it Dan mene inobaget hilingitukwa. A'nogo hilingitukwama re, it afuni Dan mene omanogo inelokhe hebelogo it inebikhit lakfesukwasik he Mikha oba heinok wokhikhi logolik, ”Nena mene weregen? Nenahalok afuni hokhorogo oma hinom wagep?” iluk heinok wokhasukwa.

²⁴ A'nogo heinok wokhasukwama at Mikha nen onggo ikhi logolik he, ”Haren an nanggembu alik waganek inom, ap andoma yabu hilingiri'lago mene imam inom waluk wulibi wagepma an nangge ekhe werek he lek oba nen, hiren ikhi logolik, nena mene weregen iluk ikhi lagep ari a?” iluk yagaisasikhe.

²⁵ Andi isikhemo, inunggulenu Dan inap a'nogo nen ikhi logolik he, ”Hambe te'me in. Hat hane ugunem he ap ari ina'mage lagambik hat hebe yei warogo hilinghinobagagunem he, hat hebe inom, heisok erokwe wagep mene oma mondogat inom wa'lagep hanogo,” iluk yagatukwa.

²⁶ A'nogo yaga'luk afuni Dan inap a'nogo louwogeluk lagaukwa. Lagaukwama at Mikha nen isasikhemo re it ap a'nogo re inomame mondok hokhore'ma re at enek he omame lek hak hilingik en he, at ebe sugulogo ambotkwe aiba wagaikhe.

^27-28 Afuni Dan inap a'nogo nen imam a'nogo inom yi mene ti mene kembu fogeratu mene iluk Mikha nen wutikhe omanogo inom, waluk laga lagaukwasik o Lais kota andi re afuni inebe inailo legengge fano mondok welagaikha awi a'nogo weim sineli lagaukwa. (Kota andi enu re kota Bet-Rehob inom tonggo misik mene andoma welagaikhe.) Ma re afuni Dan mene nen he afuni o andoma welagaukwa mene omanogo mondogat felelenghogo inoatukwasik he, inawi kota mondogat endu fatukwa. It inawi sili andoma re o Sidon nen ogore mondok yat pathogo hilingi'mo esanggoma hakhogo welagaukwama re, afuni Lais mene andoma afuni alek mene nen ogo ekhe leberinabi lagaukwa mondok lek. A'nogo hilingitukwasik he, it ap Dan inap a'nogo nen o andi nekhengge obali'mo wutukwasik inebe andoma welagaukwa.

²⁹ O kota Lais andi enu re iren enu amu mene hun Dan at Yakub amlogo a'nogo enu bene Dan iluk salhukwa.

³⁰ Kembu alik waganek iren waluk lagaukwa mene a'nogo re, iren o kota andiba wutukwasik he, at Yonatan Gersom amlogo, hun Musa omba a'nogo imam logouwageluk menfesukwa. At Gersom ambisangma mene andoma re it inunggulenu Dan inap faget imam werek kwelek enek he afuni Israel mene woginarek o kweang amu meneba huginabi lagaukwa.

³¹ Tuhan Awi Sabu a'nogo o Silo andoma welagaikhe huli re kembu alik hilingik Mikha nen wutikhe mene a'nogo ogo re, o Lais andomaat welagaikhe.