HAKIM–HAKIM 17 - Allah Wene Fano Wene Hupla Inane

Hun Mikha nen tugwi kembu apne wanhi lagaikhe mene a'nogo

¹ Ap ekhe enu re Mikha, ebe o tom oba wilayah Efraim meneba andoma welagaikhe.

² Logolik linggene misik sambul he aren agaisaba ikhi logolik, ”Heisa, hat uang perak mene ebe 1.100 nen longgo ikhe sambul aremnogo an nen nesanggo holhugunemen he, heisa haren he ap hinate mene a'nogo homan fikhi lagen hiigi, nagaisa. Nagaisa ebe an nen hinatinggere uang ebe yi!” iluk isikhemo agaisa nen onggo ikhi logolik he, ”Namlogo, hebe Tuhan nen fanot hobagauwago!” iluk yagatikhe.

³ Andi isikhemo at Mikha nen uang a'nogo oak waganogo fei lagunem at agaisa nen ikhi logolik he, ”An nen namlogo hebe homan hobagagi mene andi oba asinogore, an nen perak Tuhan obaget fuluk e mene agut ilirenggerogo re perak inom saplirogo wusigin nen fikhi lagi. Enggere uang ari re nekhengge hat hoba fei waga lagi,” iluk yagatikhe.

⁴ Andi isikhemo at Mikha nen he uang agaisa nen oak waganogo wogetikhemo, at agaisa nen he uang aremnogo mene 200 nen wanhikhesik ap tukang perak elalharek mene oba wogetikhe. Wogetikhemo at tukang a'nogo nen he alik waganek ekhe perak inom misikwe inom seberogo elaluageluk wogetikhe.

⁵ At Mikha onggwaregen kembu apne wanhunem andoma ogore obalik fena welagaikheat. Aren he kembu alik hilingik miren mene hakhogo inom su efod misik inom hilingitikhesik he, at amlogo misik ekhe imam logouwageluk menfesikhe.

⁶ Andem huli it inunggulenu Israel meneba re, ap raja ekhe welagaukwa lek. Ma re, afuni inendawimo nen fano anggugu mene a'nogo nek hilingiti lagaukwa.

⁷ A'nogo hilingitunem he andem huli ap alage mene unggulenu Lewi mene ekhe welagaikhe. Attak he at ebe o Betlehem wilayah Yehuda meneba andoma welagaikhe.

⁸ Oba nen he, hobugen at o kota omanogo herakfuluk o ebe logogin oba ale'ma herarik lagaikhe. Herarik laga lagaikhesik hiling-hiling he o hun Mikha aiba wilayah it Efraim mene inandom oba andoma asi lagaikhe.

⁹ A'nogo asi lagaikhemo, at Mikha nen heinok wokhikhi logolik he, ”Nagailak, hat he hawi koma mene?” iluk heinok wokhasikhe. A'nogo heinok wokhasikhemo, ap a'nogo nen onggo ikhi logolik he, ”Neisena, an he nebe Lewi mene o, o Betlehem Yehudaba omanogo nen wagi. Nen, an nebe o werek oba faget herarik wagarigo,” iluk yagatikhe.

¹⁰ Andi isikhemo at Mikha nen ikhi logolik he, ”Hat hebe nit komotninafu mene agik, nen yabu imam mene hilingitik ikhi logoinogen he, an ninom yoma logouwogo, an nen he tahun ebe lombok andoma uang perak 10 nen inom, su labetu mene inom, nunggu mene inom wokheti logogin o,” iluk yagatikhe.

^11-12 A'nogo yagatikhemo ap alage Lewi mene a'nogo nen andi fano iluk anggasikhemo re, at Mikha nen he at obaget imam logouwageluk menfesikhe. Nen, at ebe re Mikha awi werek oba re, at Mikha nen he at omalik onggwaregen tago mene hakhogo hilingik welagaikhe

¹³ A'nogo hilingik were'ma at Mikha nen ikhi logolik he, ap Lewi mene misik ekhe an nobaget imam werek engge re, Tuhan nen an noba fanot nobagakhi logogino,” iluk isikhe.