HAKIM–HAKIM 14 - Allah Wene Fano Wene Hupla Inane

At Simson inom hele yenggerek aiba Timna mene inom emberegen hilingiti lagaukwa wene

¹ Omame a'nogo wogetu kwelek, at Simson enggi ekhe sambul he, o Timna lagaikhesik, hele yenggerek Filistin mene andoma were'ma eilenggen hasikhe.

² A'nogo haluk ambotkwe aiba wagaikhesik, eisena agaisa inom yi'nogo yagaisasikhe: ”An hele yenggerek Filistin mene o Timna were'ma neilenggen higi o. Ma re, an nagwe andi wani lambik i'nesubagaigen iluk yagahisigi o,” iluk yagaisasikhe.

³ A'nogo yagaisasikhe meneat he, iren he, yi'nogo yagatukwa: ”Hemi nit ninonggwarek mene ogo? Ekhe nit ninunggulenu Israel mene ogo, elok woginabu meneat he it afuni Filistin mene inebe Tuhan inonggot mene inagainafuri woginabi lagain iluk ikhi lagen omare nenahalok?” iluk yagatukwa. A'nogo yagatukwama, at Simson nen he, eisena mel yagatikhe: ”A'nogo egen meneat he, an nagwe Filistin mene andiat namolo nen i'ne'nogen iluk yagaheti o,” iluk yagatikhe.

⁴ A'nogo hilingitukwa andem sambul he, afuni Filistin mene nen Israel mene ferinarek welagaukwa andi nen, At Tuhan nen he, ”Afuni Filistin mene andi ninggi'nogoba nen inoa'le e,” iluk anggikhi logolik, ”At Simson nen a'nogo hilingisuak,” iluk endawimo kagalhu kwelegat Simson isikhe meneat he, at eisena onggot welagaikhe.

⁵ A'nogo isukwasik, at Simson eisena agaisa inom o Timna lagaukwa. Laga logolik, yabu anggur yabu ekhe we re'ma andoma lagaikhe hak he, at Simson olomene singa ebe oan mene ekhe ane kweagan wagunem emberek ambi agaukwa.

⁶ A'nogo emberek ambi agaukwasik, at Simson Tuhan nen omame aremnogoat wogotikhemo, wam kambing wasu hakhogo, singa a'nogo enggi nen libik-labakhogo watikhe. A'nogo watikhesik, aren he, ”An yi'nogo hilingiti,” iluk eisena agaisa yagaisigi'lek, afe motfisasikhe.

⁷ A'nogo afe motfuluk, at Simson hele yenggerek a'nogo oba lagaikhesik emberek weneane ikhi lagaukwasik, ebe amoloat anggasikhe. A'nogo hilingitukwasik aiba ambotkwe wagaikhe.

⁸ Wagaikhesik, enggi endebat ekhe welagaikhesigen hele yenggerek a'nogo ebe ikhagaluk he lagaikheat. Laga logolik, mene singa watikhe mene a'nogo eilenggen hagaluk kwe kwanirogo ha lagaikhe. Lagaikhesik, kwelakhasikhe re, singa warek a'nogo elonggoloma re kin hokhorogo eisele'ma amusu inom were'ma eilenggen hasikhe.

⁹ A'nogo hasikhesik, kin amusu omanogo enggi nen felelenghogo wanhikhesik ebekwe laga logolik nilik lagaikhe. Lagaikhesik, kin amusu fena omanogo re eisena agaisa wogisa lagaikhemo nasukwaat. A'nogo wogisasikhemo nasukwa meneat he, ”Kin amusu yi re singa warek mene elonggolema fikhemo keralhi mene,” iluk eisena agaisa yagaisasikhe legat.

¹⁰ Ariginhukwasik, at Simson eisena hele a'nogo aiba lagaikhemo, it andoma ap alage nen inetokhogo hilingiti lagaukwa higithogo re, at Simson seni isagaisogo pesta hilingitikhe.

¹¹ A'nogo hilingitikhemo, it afuni Filistin mene nen ap alage mene inebe 30 nen at Simson agaila'lak inom logouwageluk wenagaisogo fisasukwa.

¹² A'nogo fisasukwama, at Simson nen it mel yagaisasikhe: ”An nen henarogo wene ekhe onggo yaganesubagaigen yagahisagain o. An nen yagahisugunem, hiren onggo heratep halok, an nen onggo hinebe lombok su kain lenan eil sakhorek mene misik inom, nen hinebema mene inom, hineisokwe mene inom, wurethigik, wokhisagain o. Halok he, pesta yi hilingitu werek kwelek, hinenggi 7 hari yaba logolik hiren wene onggo u mene herati logombigen, ebe yaganesubagaigen iluk hinoba figi o.

¹³ A'nogo meneat he, hiren wene ebe onggo yaganetep lek halok, hit hinebe lombogen su kain esi puselek fano enu lenen palek mene misiktek inom, nen su fano mene inebema mene inom, ineisokwe mene inom, wurethigik, wo'nesubagaigo,” iluk yagaisasikhe. A'nogo yagaisasikhemo, it ap Filistin mene omanogo nen he, mel yagatukwa: ”Higiro. Halok wene andi ebe yaganisan o,” iluk yagatukwa.

¹⁴ A'nogo yagatukwama, at Simson nen he, ”Yi mene ti mene nenggerek mene andi elonggoma nen, ebe nenggarek meneat wuliferek. nen, omame hokho mene elonggoma nen he, enduk mondok fano mene wuliferek andi, ebe nena mene nogo?” iluk yagaisasikhe. A'nogo yagaisasikhemo re, it ap omanogo wene andi onggo inenggi 3 hari heratukwa meneat he, ebe yi'nogo mene faget ikhe, iluk heratukwa mene re, mondok elo'lek agaikhe.

¹⁵ A'nogo hilinglagaikhemo, inenggi ekhe 4 meneba re, Simson agwe a'nogo mel yagatukwa: ”Hat hagun nen wene andi onggo ebe yaganisoagen he, endawimo kagalin o. Haren yagati'lek kamo egen halok he, hat hebe inom, afuni heisena aiba welagaikharek mene mondogat inom, hinebe mondogat endu fagaisogo hinoasugun o. Haren ninayonggo fegen andi re nit mene ninangge yi mene ti mene mondogat legasuageluk hiligiten ma heogo o!” iluk yagatukwa.

¹⁶ A'nogo yagatukwa andi nen, at Simson agwe a'nogo agun oba le arik lagaikhesik he, mel yagatikhe: ”Haren an nebe hendawi lek habit andi an nelu o. Haren wene andi an nerugwi nen ebe herasuagaluk yagaisegen meneat he, ebe yi'nogo mene faget igi, iluk an yaganeten lek halok, haren an nebe habiren hilingnabigin o,” iluk yagatikhe. A'nogo yagatikhemo, at Simson nen he, ”Po'logoin. An neisena nagaisa mene ogo re, emberek yagaisigi'lek welagi meneat he, nenahalok harenek yagahesuagaluk ikhi lagen,” iluk yagatikhe.

¹⁷ A'nogo yagatikhemo, pesta a'nogo hilingitu inenggi 7 hari logolik, at Simson agwe a'nogo le agu mondok welagaikhe. A'nogo logolik, agun oba limamit falogo le agu mondok logolik, ”Yaganom o,” iluk ninghogo ugu welagaikhemo inenggi ekhe 7 meneba nek he, ”Wene andi ebe yi'nogo mene faget yaga isigi o,” iluk fakhogo yagatikhemo, at hele a'nogo nen it ap Filistin mene omanogo yagaisasikhe.

¹⁸ A'nogo yagaisasikhemo, it ap kota andi mene omanogo nen, o mo oan ubukhogo kwigi'lek werek kwelek Simson mel yagatukwa: ”Kin amusu enduk fano meneat he, enduk mondok ebe fano mene ekhe welagarek nogo? nen, mene singa omame werek meneat he, omame mondok hokho mene ekhe welagarek nogo?” iluk yagatukwa. A'nogo yagatukwama, at Simson nen he, ’Hiren an nagwe endawimo kagalilep le'ma, wene an yagahisigi mene andi ebe, Yi'nogo mene faget egen, iluk yagane'lep legaro,” iluk yagaisasikhe.

¹⁹ A'nogo yagaisugu kwelek aremnogoat, at Simson Tuhan nen omame wogotikhemo omame agaikhesik he, o Askelon lagaikhe. Lagaikhesik, ap inebe 30 nen inasu fano laberek mene inoatikhe. A'nogo inoatikhesik, inasu omanogo ap inebe 30 nenat wene onggo heratukwa mene omanogo wogisa wagaikhe. A'nogo hilingi'luk he, at Simson a'mage mondok het petsek logolik eisena aiba wagaikhe.

²⁰ A'nogo wagaikhemo, at Simson agwe a'nogo eisena nen he ap hunogo mene Simson agwe ebe iti logolik welagaukwa mene omanogo ekhe wogotikhe.