HAKIM–HAKIM 13 - Allah Wene Fano Wene Hupla Inane

Simson ta'lagaikhe wene

¹ Afuni Israel mene nen Tuhan ane sagalogo hobuk weak hilingitukwaat. A'nogo hilingitukwama, aren he, ”Afuni Israel mene yi re, it Filistin mene inawe a'ma 40 tahun ferinarek logonik he,” iluk inebe herakfisasikhe.

² Andem sambul he, ap ekhe enu Manoah, unggulenu Dan mene, o kota Zora welagaikhe. At andi agwe ebe abili welagaikhe.

³ A'nogo meneat he, o inenggi ekhe sambul malaikat Tuhan ekhe elokhoma menlasi wagaikhesik he, mel yagatikhe: ”Hat attagen pikhit yogondagen he, omalik ekhe taginafi'lek welagen. A'nogo meneat he, henggi welagi'legat omalik ha'ma asimbik, heak abat ekhe takhagain o.

⁴ Andi nen he, hafe hebelogo logoino o. I anggur amusu inom, lugulugwi paluogeluk nenggarek mene inom ninggik, yi mene ti mene nenggarek lek mene ekhe yugunat ninggik, ikhi logogun o.

⁵ Hat heak andi ta'lasigin huli nen, at Allah onggwarek faget logogin mene, u hak, Nazir mene logogin andi nen he, ebe ta'lagu halok, esi mondok palhi logogun lego. Ma re, hit afuni Israel mene re it afuni Filistin mene nen fethinarek were'ma, aren telhinabigiluk attagat ero fakfagain andi o,” iluk yagatikhe.

⁶ A'nogo yagatikhemo, at Manoah agwe a'nogo agun oba lagaikhesik he, mel yagatikhe: ”Noe, nineisena Allah agoromi yonggo lakfisa wagarek mene ekhe an noba wagasik. At andi ebe malaikat Allah mene hanggeat wagama, an nailo mondok aga o. An nen he, Hat hebe koma nen wagen, iluk heinok wokhigi legat, nen aren ogo re, An nenu ti, iluk yaganete legaro.

⁷ A'nogo meneat he, aren he, Hat heak ha'ma asimbik, ap takhagain o, iluk yaganetesik ekhe mel yaganete: Heak andi ha'ma asigin andi huli nen he, ebe hobuk wa'lasigin andi huli, ebe Allah onggwarek faget logogin andi nen he, hat i anggur amusu inom, amusu lugu lugwi paluogeluk nenggarek mene inom, yi mene ti mene nenggarek lek mene inom, ninggi logogin lego, iluk yaganete,” iluk yagatikhe.

⁸ A'nogo yagatikhemo, at Manoah esanggo holhikhesik he, samban oba Tuhan yi'nogo yagatikhe: ”Tuhan neisena. Niren omalik andi ta'lasimbik oba nen hilingiti logogun mene faget, senggerogo yaganisoageluk, hamingmingengge andi hobuk ayonggo fembik ninoba lakfei we'no aro, neisena,” iluk yagatikhe.

⁹ A'nogo yagatikhemo, Allah nen at Manoah ane esanggo holhikhe. A'nogo holhikhesik he, at agot malaikat Tuhan a'nogo lakfei wagaikhemo, at Manoah ebe le'ma, agwe nek yabumo hurek were'ma, oba wagaikheat.

¹⁰ Wagaikhemo re, agwe a'nogo agun oba humusek wagaikhesik, mel yagatikhe: ”Noe. Yethan! Ap attak noba waga mene a'nogo yogondak noba waga aro,” iluk yagatikhe.

¹¹ A'nogo yagatikhemo, at Manoah weak-weagat agwe ombo'ne lagaikhe. Lagaikhesik, ap a'nogo mel yagatikhe: ”An nagwe wene yagasi wagen andi re haren a?” iluk heinok wokhasikhe. A'nogo yagatikhemo, aren he, ”Eberogoat. Anen aro,” iluk yagatikhe.

¹² A'nogo yagatikhemo, at Manoah nen he mel yagatikhe: ”Hobuk haren wene egen andi hagat eberogoat hilinglagu halok, yenggerek andi nen ninggi'nogo hilingiti logogin nogo? Hobuk at ebe ninggi'nogo logogin nogo?” iluk heinok wokhasikhe.

^13-14 A'nogo yagatikhemo, at malaikat Tuhan a'nogo nen he, ”Hat hagwe nen he, i anggur amusu inom, amusu lugu lugwi paluogeluk nenggarek mene inom, yi mene ti mene anggur mene ekhe hilingitarek mene inom, yi mene ti mene nenggarek lek mene inom, ninggi logogin mondok lego. An nen, ’Hat yi'nogo ti'nogo hilingiti logoino,’ iluk yagati mene andi mondogat higithogo hilingiti logouwago. Andi ekhe hilingiti'lek herakfeinogo, iluk obabut hebelogo logouwago,” iluk yagatikhe.

¹⁵ A'nogo yagatikhemo, at Manoah nen he, mel yagatikhe: ”Niren hat hobaget wam kambing oan mene ekhe warogo isagaisogo wokhesi wesugun enggere, ya yetninarek logoinogeluk yagaheti o, noe,” iluk yagatikhe.

^16-17 A'nogo yagatikhe meneat he, malaikat Tuhan a'nogo nen he, mel yagatikhe: ”An hit yethinarek yoma logogin meneat he, haren an faget isasigin mene andi, nagain legaro. A'nogo meneat he, haren isasigin egendi'mo re, isasigin mene andi re Tuhan nolesugun mene faget isasimbik he, At fisanogo,” iluk yagatikhe. A'nogo yagatikhemo, at Manoah nen he, ”Andi re malaikat Tuhan nen yaganete,” iluk futfigi'lek andi nen he, mel yagatikhe: ”Wene haren yaganisegen andi hobuk eberogoat hilinglagu halok he, niren agaugwethafi logouwogen he, hat henu yaganom o,” iluk yagatikhe.

¹⁸ A'nogo yagatikhemo, at malaikat Tuhan a'nogo nen he, mel yagatikhe: ”An nenu andi re, elalin mene salek hilingi'mo re, nenahalok helu asigiluk heinok wo'neegen nogo?,” iluk yagatikhe.

¹⁹ A'nogo yagatikhemo, at Manoah wagaikhesik, wam kambing oan mene ekhe inom, gandum enggen endebengge ekhe inom, waluk lagaikhesik helep amboloba fesikhesik he, Tuhan yi mene ti mene elalin hilingiterek mene a'nogo fisasikhesik warogo noletikhe.

^20-21 A'nogo fisasikhesik noletikhemo, endu amulok andoma nen lagagu kwelek, at malaikat Tuhan a'nogo endu andi amulok anggelekwe nen pogoroba lagagunem, at Manoah agwe emberek ineilenggen hasukwa. A'nogo hasukwasigen, at Manoah nen he, ”Andi malaikat Tuhan meneat higi,” iluk futfesikhesik, agwe emberek ineindep awi yagaisogo inelokhe sagaum Allah fogeratukwa. A'nogo hilingitukwasik oba nen malaikat a'nogo hobuk ineilenggen higi'lek welagaukwa.

²² A'nogo hilingitukwasik, at Manoah nen agwe mel yagatikhe: ”Nit Allah nineilenggen hogo andi nen, ninebe eberogoat wa'lasugun higi,” iluk yagatikhe.

²³ A'nogo yagatikhemo, at agwe nen he, ”Tuhan nen nit ninebe ninoasigiluk logoilepma re, niren at faget fisogosik noleto mene andi wanilep lego. Nen, nit nineilenggen hoageluk hilingitemo hogo andi helo legaro. Nen, yi wene ti wene yaganisikhe andi, yaganiselep legaro,” iluk yagatikhe.

²⁴ A'nogo yagatikhesik welagaukwasigen, at Manoah agwe a'nogo eak ap takhasikhesik enu Simson salhikhe. A'nogo tatikhemo, omalik a'nogo alue agu kwelek, Tuhan nen ebe fanot fikhi lagaikhe.

²⁵ A'nogo werek kwelek, at ebe afuni inunggulenu Dan mene inaiba tenda meneba salogo o kota Zora honggolek, Esytaol honggolek, tulem andoma were'ma, At Tuhan Areagun nen omalik a'nogo omamet fikhi lagaikhe.