HAKIM–HAKIM 12 - Allah Wene Fano Wene Hupla Inane

Hun Yefta inom inunggulenu Efraim mene inomen hilingitukwa wene

¹ Andem huli unggulenu Efraim mene re weim yabuogeluk fikfouk etukwasik i Yordan palogo re o Zafon logoin iluk lagaukwa. Lagaukwasik iren Yeftaba ikhi logolik he, ”Hat afuni Amon mene hinom weim yabi lageluk at he, nenahalok nit ninelut fegen lek? Yogondak he niren hat hebe inom hat heisok erokwe mene mondogat inom endumo nolhinabuogeluk welago,” iluk yagatukwa.

² Andi isukwama at Yefta nen ikhi logolik he, ”Afuni Amon mene inom nit Gilead mene ninom he, weim palek hokho mene welago. Nen, ap Amon mene andiba nen telogo nobagauwageluk andi re an nen hit hinoba wolhinafigiba nen he, hit wagagip lek.

³ Andiba re, an nen anggikhi logolik he, iren he an lebetnea wesugun lek a'nogo re, iluk anggasigisik he, an nebe wesigin anggasigiba nen he an namurururogo afuni Amon mene andi ninom weim yabi lagi. Yabi lagimo re it ap andoma inenggi mo nen Tuhan nen an nomamet nobagasikhe. A'nogo mene at he yogondak hit nenahalok an noasuogeluk waga lagep?” iluk yagaisasikhe.

⁴ A'nogo isikhesik he, Yefta nen ap Gilead mene mondogat kaboget fisasikhesik he, afuni Efraim mene omanogo inom weim yafukwasik he mabenet fisasukwa. (Ap Gilead weim yafarek mene omanogo re, ap Manasye mene inom Efraim mene inom omanogoba nen wulibi lagaikha mene iluk iren inoba hikhibet isasukwa.)

⁵ Ap Gilead inap weim yafarek mene omanogo re, ap Efraim mene heise lagunem kwe palinabugun iluk i palogo wulibi lagaikharekwe omanogo menlarik lagaukwa. A'nogo menlarik lagaukwama re, afuni Efraim mene heise laga logolik i palogo logoin iluk inelut fugunem aremnogo re, afuni Gilead mene nen heinok wogisikhi logolik he, ”Hat ap Efraim mene a?” iluk heinok wogisugunemen, aren ikhi logolik, ”Lego,”

⁶ ugu halok iren at yagati logolik he, haneba, ”Syibolet in,” iluk yagati logogun. A'nogo yagatunemen aren ane andi mene ugu aple nonghoget fuluk ”Sibolet,” ugu halok he, iren at andi senfuluk he kwe i palogo wulibi lagaikharek oba aremnogo nen ebe pinggi wasugun. A'nogo hilingitu welagaukwa andem oba re afuni Efraim mene inebe 42.000 nen inoatukwa andi.

⁷ At Yefta re tahun falfalik en oba afuni Israel mene melalinafi lagaikhe. Andi nen at ebe wa'lagaikhemo re, at awi sili eroma o Gilead en kota Mizpa omanogo salhukwa.

Ebzan inom Elon inom Abdon inomen hilingitukwa wene

⁸ Yefta wa'lagaikhemo afuni Israel mene re at Ebzan o Betlehem mene andi nen melalinafi lagaikhe.

⁹ Hun Ebzan andi againafuri re amlogomi mene inebe 30 nen, a'logomi inebe 30 nenat welagaukwa. A'logomi omanogo re ap inunggulenu amu mene nen heloageluk wogisasikhe, nen aren he helime tugum mene inebe 30 nenat inunggulenu amu mene at amlogomi inagagwi igisasikheat. Nen, at Ebzan en afuni Israel mene ferinarek werek kwelek 7 tahun welagaikhesik,

¹⁰ ebe wa'lagaikhemo o Betlehem salhukwa.

¹¹ At Ebzan wa'lagaikhemo afuni Israel mene re, hun Elon unggulenu Zebulon mene andi nen 10 tahun ferinek logolik wene melalinafi lagaikhe.

¹² Andi nen at ebe wa'lagaikhemo o Ayalon wilayah Zebulon meneba omanogo salhukwa.

¹³ At Elon wa'lagaikhemo afuni Israel mene re at Abdon hun Hilel amlogo awi Piraton mene andi nen wene melalinafi lagaikhe.

¹⁴ At amlogomi inebe 40 nen welagaukwa, nen at ombawi ap mene nek he 30 nen welagaukwa. It inebe lombok he inanggo keledai ai mene 70 nen amboloba lagaluk lagu mene faget fisogo welagaukwa. At Abdon nen he afuni Israel mene 8 tahun ferinarek logolik melalinafi lagaikhe.

¹⁵ A'nogo welagaikhesik ebe wa'lagaikhemo re o Piraton wilayah afuni Efraim en mene ap Amalek mene inandom oba andoma salhukwa.