HAKIM–HAKIM 11 - Allah Wene Fano Wene Hupla Inane

Yefta eisena Gilead inomen hilingitukwa wene

¹ Hun Yefta andi re asikhe werek agun logolik ailo legengge ambong siserogo hilingiti lagaikhe agun welagaikhe. At ebere o Gilead andoma welagaikhe. Eisena re enu Gilead, oba nen agaisa re yanani hilingirik nikhi lagaikhe mene welagaikhe.

² Eisena andi re amlogomi agagwi attak femhogo waganek mene nen tago mene werek kwelek amu mene nen tago mene ogo welagaukwaat. Omalik omanogo inebe inalue agaukwasik he, at Yefta ebe inaiba nen mugusogo wulak fisasukwa. Iren ikhi logolik he, ”Hat hebe re, he amu mene nen tago mene welagen ma re nit nineisena alolegengge hat ekhe helagain lego,” iluk yagatukwa.

³ Andiba re, at Yefta a'nogo agaila'lak herakfisaluk he wulibi lagaikhesik o Tob andoma welagaikhe. Andoma logolik he ap ina'mage weak mene inom mangotukwasik he iren ap inangge teli lagaukwa.

⁴ Eil misik welagaukwasigen he, afuni Israel mene inoba Amon inaben weim sineli lagaukwa.

⁵ A'nogo sineli lagaukwa sambul andem he, ap Israel mene kaindek omanogo nen at Yefta o Tob herakfuluk wesuageluk hondosi lagaukwa.

⁶ Iren ikhi logolik, ”Afuni Amon mene ari ninom weim yabugun en he, hat he nit ninoe asimbik melalninabino,” iluk yagatukwa.

⁷ Oba nen at Yefta nen ikhi logolik, ”Hiren an hinali'norogo hilingnarek welagep lek nogo? Hiren an neisena aiba nen mugusogo wulak nobagasigipsigen yogondak hit enggin-fenggin hikhi logolik nenahalok an nambit wagep?” iluk yagaisasikhe.

⁸ Andi isikhemo iren ikhi logolik, ”Nit wago andi re, yogondak yaba haren afuni o Gilead werek mene mondogat andi lirinarek ap inunggulenu Amon mene inom weim yabugun ninendawimo anggikhi logolik wago o,” iluk yagatukwa.

⁹ Andi isukwama, at Yefta nen ikhi logolik, ”Hiren an hondok nabi wagepma an sugulogo o Gilead laluk afuni Amon mene ninom weim yafunem Tuhan nen nit ninebikhit asimbik ninomamet ninobagagu halok he, an hit hinobaget hinoe kain logolik fethinarek logogin o,” iluk yagaisasikhe.

¹⁰ A'nogo yagaisasikhemo re, iren onggo ikhi logolik, ”Tuhan eilenggen logolik esanggo holek werek kwelek enggere, andi re niren fano anggogo,” iluk yagatukwa.

¹¹ Andi isukwama at Yefta a'nogo ap Gilead inap melalinafu mene omanogo inom lagaukwa. Lagaukwama re, it inebe afuni Gilead mene nen he awe a'ma fetninarek logolik melalninafi logouwak iluk menfesukwa. A'nogo menfesukwama o Mizpa andoma nen Tuhan eilhanem at Yefta nen he afuni Gilead mene inoba re yi'nogo ti'nogo hilingnobagakhi logogun iluk wene inoba fesikhe.

¹² A'nogo hilingitukwasik he, at Yefta nen ap yonggo raja Amon mene oba yi'nogo yagasi loageluk lakfisasikhe, ”Niren weak ninggi'nogo hilingitoma hiren nit ninanggweang yiba weim yabi waga lagep?” iluk lakfesikhe.

¹³ A'nogo lakfesikhemo at raja afuni inunggulenu Amon mene inoe a'nogo nen ap yonggo waluk lagaukwa mene omanogo inoba onggo ikhi logolik he, ”Afuni Israel mene o Mesir en waga logolik he, iren nit ninanggweang o Arnon nen he i Yabok ima nen pikhit i Yordan huliba mene hilingik engge omanogo it mondok helasukwa. Ariginhukwangge a'nogo re, yogondak hiren he hinendawi fanoba nit ninanggweang andi ninonggwarek wo'nisani,” iluk yagaisasukwa.

¹⁴ A'nogo isukwama, at Yefta nen ap yonggongge ekhe raja Amon meneba wene onggo yi'nogo yagasi loageluk lakfisikhi logolik he,

¹⁵ yi'nogo isikhe, ”Afuni Israel mene nen he kweang it afuni Moab mene nen ogo, Amon mene nen ogo ekhe telogo helasukwa lek.

¹⁶ It Israel mene o Mesir herakfuluk wulibi wagaukwasik he, o Bini leikwe nen he Teluk Akaba fikhit lagaukwasik andoma nen he o Kades oba asi wagaukwa.

¹⁷ Andem huli asi wagaukwasik he, iren ap raja o Edom meneba wene lakfei waga logolik at awilokwe anggweang andoma kwe nen logoin nen he, aren fano iluk yaganisoageluk kino aga. andi nen wene misik mene andi re iren ap raja Moab meneba ogo kino agaat, oba nen he aren anggweang kwe andoma nen lani iluk yagaisasikhe lek. Andiba re afuni Israel mene o Kades welagaukwa.

¹⁸ Welagaukwasik it a'nogo o leikwe ilingage bene nen wagaukwaba nen he, iren afuni Edom mene inom Moab mene inom inanggweang kwe nen wagaukwa lek, athe kwe maserogo wagaukwasik he, i Arnon fena fikhit o Moab en mo liabi wagarek fikhit andoma asi wagaukwa. Iren inawi sabu andoma salhukwaba nen he, kweang andoma re wilayah Moab mene hilingi'mo re i a'nogo palogo wulibi lagaukwa lek.

¹⁹ A'nogo hilingi'luk he afuni Israel mene nen ap wene waluk hun Sihon raja Amori inap faget o Hesybon welagaikhe mene a'nogoba re, nit ogo ninawi ninanggweang ninonggwaregen sekwe laga lagosik he, o kweang afuni Amori mene inanggweang kwe andoma logoin nen fano in, iluk kinotukwa.

²⁰ Oba nen hun Sihon nen he it andi re we kwe lagu aple faget enek he fuk, iluk endawimo menenei ebetikhesik he elele wanhikhe. A'nogo hilingitikhesigen he aren agoromi sikhe fisogo mene lirisasikhesik he, o Yahas kabogesi lagaukwasik, afuni Israel mene inom weim yafukwa.

²¹ Oba nen it afuni Israel mene ineisena Tuhan Allah nen he hun Sihon inom agoromi sikhe fisogo welagaukwa mene inom inenggiba nen inalonget fisasikhe. Arigin fisasikhemo re, afuni Israel mene nen kweang it afuni Amori mene inanggweang andoma mondogat it mene agaukwasik welagaukwa.

²² Iren he wilayah Amori mene nen oba re, abel a'ma selatan fikhit he o Arnon oba andoma nen he abel ambolkwe utara fikhit he i Yabok oba andomaba hilingik, nen mo lagai wagarek fikhit he i Yordan ima nen mo ubuk ikherek fikhit andoma huliba hilingik.

²³ Arigini'mo re, afuni Israel mene ineisena Tuhan Allah nen he, it Israel mene inobaget ogo re afuni Amori mene andoma mugusogo wulaginafikhe.

²⁴ Oba nen yogondak yi re haren nekhengge helagain iluk ikhi lagen a? Kweang hat handugwi kembu enu Kamos nen hat wokhetemo andoma nek he hit hinangge hilingik logogin andi fano. Oba nen he nit nineisena Tuhan Allah nen nit ninobaget wo'nisikhe mene andoma re nirogo ninghogo fisogo logogun.

²⁵ Haren anggikhi logolik he, at Balak hun Zipor amlogo raja Moab mene a'nogo re weak hangge, nen an enek he fano welagi iluk anggikhi logolik ikhi lagen a? At Balak en ane wurik agik, nit ninom weim yafik igi'lek.

²⁶ Afuni Israel mene nen he o Hesybon inom Aroer inom o sili maserogo werek mene andoma mondogat inom, nen o i Arnon esanggokwe kota werek mene andoma inom he 300 tahun huli welagaukwa. Nen, it a'nogo logolik andoma nenahalok haren oak helagain iluk hilingiti lagagin lek?

²⁷ Lego, niren he hat hoba weak ekhe hilingito legat. Haren enek he nit ninoasi waga lagen andiba nek he weak hilingiti lagen. We, At Tuhan enek he wene nit Israel mene ninom it inunggulenu Amon mene inom ninoba wene katokhogo tegetu mene werek,” iluk lakfesikhe.

²⁸ Oba nen he at raja Amon mene a'nogo nen he Yefta nen wene lakfesikhe mene a'nogo faget ambumet fesikhe lek.

Allah omame Yefta oba louk isikhemo hilingitikhe wene

²⁹ Andi nen he at Yefta Tuhan Areagun oba louk isikhemo re omame agaikhesik at Yefta ebe o afuni Gilead mene inom Menasye mene inom kwelagisilik lagaikhesik ambotkwe o Gilead en Mizpa omanogo wagaikhe. Andoma nen at ebe hiling-hiling he o afuni Amon mene inawi wilayah ba asi lagaikhe.

³⁰ Lagaikhesik at Yefta nen Tuhan oba wene wati logolik he, ”Neisena Tuhan, Haren an afuni Amon mene mabenet fisoageluk anggikhi lagen halok he,

³¹ it inomame leget fisaluk an nebe nagap telek naiba wesigin halok he, ap ekhe fem attak-attak an wagunem nelokhoma nawiloba nen wulibi lagain mene andi re, Tuhan hendawimo hagaiyekhogo iluk warogo nolhetu mene wokhesigin o,” iluk yagatikhe.

³² A'nogo hilingitukwasik he, at Yefta a'nogo i Yordan palogo re ap Amon mene inoasigiluk lagaikhemo Tuhan nen omamet fesikke.

³³ At Yefta nen it a'nogo o Aroer oba nen he o Minit horokhogo andoma inom mondogat he kota 20 nen mene mondogat eil homologo inoarik lagaukwasik he, o abel Keramim en yatma andomaba fisa lagaukwa. A'nogo inoatukwama re, afuni Amon mene hokhorogo wa'lagaukwama, it inebe afuni Israel inoba nen inomame lek agaikhe.

Hele silerik hun Yefta a'logo nen hilingitikhe wene

³⁴ A'nogo hilinglagaikhemo at Yefta a'nogo sugulogo o Mizpa wagunemen he, at a'logo silerik mene hele andi re we misik masik enek engge a'nogo eisena elokhoma no rebana kwengerik abunugerik waga lagaikhe.

³⁵ A'nogo wagunem at Yefta nen eilenggen yethasikhesik he, at Yefta endawimo mondok heiselhu nen he asu tilip-talaphogo herak fesikhesik ane ikhi logolik he, ”Yegei na'logo e, an heisena nendawimo mondok warigi o! Nenahalok haren an nendawimo waroageluk hilingiten? An nen Tuhan oba mondogat hombuk palhimo re nane oak waganogo wanu lek hago!” iluk isikhe.

³⁶ Andi isikhemo hele a'nogo nen Yefta oba ikhi logolik he, ”Neisena haren Tuhan oba mondogat hombuk palhenma re, Tuhan nen afuni Amon mene neisena haselei mene andoma nen inaniniba ninoari'lagwi mene omanogo unggulmo fei loageluk hobagaikhe. A'nogo hobagaikhenggere, neisena haren hane hombuk palhen mene andi re higithogo nek hilingisin o,” iluk yagatikhe.

³⁷ Andi isikhesik hele a'nogo nen ane ekhe inomat ikhi logolik he, ”We misik enek kino yagahesik, An nebe ap inagap nonggorengge wa'lasiginmo re, ekhe an negebi inom o tomkwe andoma nikhi logolik nebeba hilinglasigin aple faget nonggwarek nouwak le yakhilik nikhi logogin nen he, tugi pire wo'nom o,” iluk yagatikhe.

³⁸ A'nogo isikhemo eisena nen he, fano iluk isikhesik, hele a'nogo loageluk oboget hasikhemo re, hele a'nogo ebe agun heligi'lek nen omalik takhigi'legat ebe wa'lasigin andi nen, egebi omanogo inom tomkwe inonggwarek inouwak le arik nikhi logouwogeluk lagaukwa.

³⁹ Le arik nugu kwelek tugi pire agaikhemo re, at ebe eisena were'ma ambotkwe wagaikhemo, eisena nen he Tuhan inom wene watukwa higithogo hilingitikhe. Andiba re hele tugum a'nogo ap agap onggorengge welagaikhesik ebe wa'lagaikhe. A'nogo hilingitukwa andi nen he helime tugum it Israel mene nen he tahun hundik-hundik oba re

⁴⁰ linggene 4 en oba hele hun Yefta a'logo tugum andi faget inendawimo ebethikhi logolik o Gilead andoma le agu welagaukwa.