HAKIM–HAKIM 10 - Allah Wene Fano Wene Hupla Inane

Ap Tola nen hilingitikhe wene

¹ Abimelekh ebe arat wa'lagaikhemo, Tola hun Pua amlogo a'nogo it Israel mene telogo fisoageluk melalinafi lagaikhe. At ebe re hun Dodo omba unggulenu Isakhar mene o Samir it Efraim inandom oba andoma welagaikhe.

² Aren he it afuni Israel mene 23 tahun huli melalinafu welagaikhesik at ebe wa'lagaikhemo, o Samir salhukwa.

Ap Yair en hilingitikhe wene

³ At Tola a'nogo mondogat wa'lagaikhemo re, at Yair en afuni Israel mene melalinafi logolik werek kwelek enek 22 tahun hilingitikhe. At Yair ebe o Gilead mene.

⁴ At amlogomi ap mene re inebe 30 nen welagaukwa, nen it inanggo keledai amboloba hu'la'luk lagaikharek mene lambukhogo re 30 nenat welagaikhe. O sili andoma re at Yair awi sili ikhi lagaukwa.

⁵ Nen at Yair ebe ogore wa'lagaikhemo o Kamon salhukwa.

Ap Yefta nen hilingitikhe wene

⁶ Afuni Israel mene nen he Tuhan ane holhi'lek nen apne wanhi'lek hilingiti logolik he, iren Tuhan elokhoma weak hilingiti lagaukwa. Iren he tugwi kembu Baal inom, Asytoret inom, ap inunggulenu Siria inom, Sidom inom, Amon inom, Moab inom, Filistin mene inom inangge omanogoba apne wanhi lagaukwa.

⁷ Andiba re, Tuhan nen afuni Israel mene inoba a'mage fesikhesik, ap inunggulenu Amon mene inom, Filistin mene inom inawe a'ma logouwageluk herakfisasikhe.

⁸ A'nogo herakfisasikhemo re afuni Israel mene o Gilead it Amori mene inaiba i Yordan aik fena mo liabi wagarek fikhit werek mene omanogo re, ap inunggulenu pire mene andemen 18 tahun logolik he inoba enggin-fenggin hokhorogo fugu welagaukwa.

⁹ A'nogo hilinginafi logolik it Amon inaben he it inunggulenu Yehuda mene inom, Benyamin mene inom, Efraim mene inom, inoasuogeluk i Yordan palogo laluk inoasi lagunem he afuni Israel mene omanogo wiik weakhogo mondok hikhi lagaukwa.

¹⁰ A'nogo hikhi logolik he, iren Tuhan oba inane kweti logolik, yi'nogo isukwa, ”Nineisena Allah, niren tugwi kembu Baal oba apne wanhi logolik, Hat hane holfigi'legengge hilingitoba, niren Hat helokhoma weak hilingito,” iluk yagatukwa.

^11-12 Andi isukwama Tuhan nen onggo yagaisikhi logolik, ”O attak he hit inunggulenu Mesir mene inom, Amori, Amon, Filistin, Sidon, Amalek mene inom, unggulenu Maon mene inomen, enggin-fenggin hinoba fikhi logolik sebelhinarek welagaukwa. Ariginik welagaikhe andem huli hiren An nen lebethinabuageluk yaganetigip a'nogo wenggelhani o, it andoma sebelhinarek were'ma nen An nen hinagap telhigi lek nogo a? Hinagap telhinafigiat anggigi.

¹³ A'nogo hilinghinafigi oba nen he, hiren An hinambot wo'ne'luk tugwi kembu omanogo apne wani laga lagepma re, yogondak An nen hit telhinafu aplere mondok nabiro.

¹⁴ Hirogo tugwi kembu wenakfakhaluk obaget hilingiti lagep mene andoma ambit lani! Laluk he hiren it andoma inenu hombuk palhunem he, hit enggin-fengginhogo were'ma andoma iren lebethinabuago,” iluk yagaisasikhe.

¹⁵ Oba nen he it afuni Israel mene nen Tuhan oba ikhi logolik he, ”Tuhan, nit mondogat weak hilingitoma re, Hat hendawimo hilingisigin hamolo anggegen mene andiat hilingisin. We nit he yogondak yi sambul haren lebetninabigin andiaro,” iluk isukwa.

¹⁶ Andi isukwasik he, iren inanggembu alik waganek mene omanogo hugisasukwasik Tuhan apne wanhukwama re, it enggin fengginhogo logolik hilingiti lagaukwa mene a'nogo Allah nen isasikhesik endawi ou hasikhe.

¹⁷ Andem huli re ap Amon inap weim yabi logoin iluk fikfougeti lagaukwa. A'nogo hilingfuluk he it Israel menere inebe o Mizpa, Gilead oba inawi sabu sali wagaukwa.

¹⁸ Sali wagaukwasik andoma nen he, it Israel inap holhu mene inom, inunggulenu lombok melalinafarek mene inom, omanogo yi'nogo isukwa, ”Ap ambong serogo sikhe ha'luk ap unggulenu Amon inap ari inom weim yabi lagain mene re werega, lega? Nen, afuni Gilead mene mondogat melalinafu mene sa asigin,” iluk heinok wok-wok aga lagaukwa.