HAKIM–HAKIM 1 - Allah Wene Fano Wene Hupla Inane

Ap inunggulenu Yehuda mene inom Simeon mene inomen Adoni-Bezek fakfesukwa wene

¹ Yosua mondogat wa'lagaikhemo re, afuni Israel mene nen Tuhan heinok wokhikhi logolik, ”Tuhan unggulenu ki mene tak lambik weim ap Kanaan mene inoba sineli kwigin nogo?”

² Iluk heinok wokhasukwama re, Tuhan nen onggo yi'nogo yagaisasikhe, ”O kweang andoma teli kuageluk An nen it inunggulenu Yehuda mene inenggiba figimo re, iren tak sineli kugun o,” iluk yagaisasikhe.

³ A'nogo yagaisasikhemo, it inunggulenu Yehuda mene nen it inagaila'lak inunggulenu Simion mene inoba yagaisikhi logolik, ”Lebetnisa waga logoni o, hit ninom o Kanaan andi weim kwi lambik nineisena Tuhan ane ikhe mene higithogo o wilayah nit wo'nisikhe kwe andoma sebeli kuogen he nit ninoba mangosi we'ni o. Nen hiren a'nogo lebetnisogoin halok niren ogo o wilayah hit logogun oba hineisena Tuhan nen wokhisikheba andoma ninomenat weim kwimbik sebeli kugun aro,” iluk isukwama inunggulenu Simeon mene inom,

⁴ Yehuda mene inom, mangorogo lagaukwasik weim sineli lagaukwama re, Tuhan nen ap Kanaan mene inom Feris mene inom omanogo it inenggiba fesikhemo mabenet fisasukwa. Nen ap tentara it inaselei mene andoma re inebe sepuluh ribu nen o Bezek andoma inoatukwama wa'lagaukwa.

⁵ Iren he hun Andoni-Bezek awi Bezek mene andi inoe raja welagaikhe agun a'nogo herarik lagaukwasik he iren ebe wasugun iluk huget fesukwa.

⁶ Huget fesukwama nen he at ebe heise lagaikhe oba nen he iren murok senesi lagaukwasik he, at enggi fuap inom eisok fuap inom tegetukwa.

⁷ Tegetukwama, at Adoni-Bezek en yi'nogo isikhe, ”Attak he it ap inogogwi raja inebe 70 nen mene, an nen inenggi fuap inom ineisok fuap inom tegerinafigimo logolik, it inamburu an nambe abu'ne pugu mene tolhigik ninggi lagaukwa a'nogo. Nen yogondak he an nen it hilingfisasigi mene a'nogo ambisangma re Allah nen an noba a'nogoat hilingnobagaikhe yi o,” iluk isikhe. Andoni-Bezek ebere hobugen waluk o Yerusalem lagaukwama andoma nen at ebe wa'lagaikhe.

It inunggulenu Yehuda mene nen o Yerusalem inom Hebron inom sebelhukwa wene

⁸ Ap Yehuda mene re o Yerusalem weim wulifi logolik he o kota andi endu oba fagaisogo afuni o andi mene inebe mondogat inoatukwa.

⁹ A'nogo hilingfuluk it ap Kanaan mene tom-tom werek mene andoma inom, punukwe, alokwe werek mene andoma inom andi nen kweang iringik kwe abel a'ma selatan fikhit werek mene inom,

¹⁰ nen o kota Hebron andi enu attak he Kiryat-Arba ikhi lagaukwaba a'nogo inoasi lagaukwa. Andoma ap Yehuda mene nen he ap Sesai inom Ahiman inom, Talmai inom inomame leget fisasukwa.

Otniel en kota Debir sebelhikhe wene

¹¹ O Hebron nen he ap Yehuda mene omanogo laga logolik o kota Debir, andem oba enu Kiryat-Sefer iluk ikhi lagaukwaba andi pin talogo kwi lagaukwa.

¹² Ap unggulenu Yehuda mene misik ekhe enu Kalep andi nen ikhi logolik he, ”Ap sa nen o Kiryat-Sefet andi sebeli kugu halok he ap andi re an na'logo hele Akhsa wogosigin o, isikhe.

¹³ A'nogo isikhemo Kaleb agot Kenas amlogo Otniel en okota andi sebelhikhemo re, Kaleb en a'logo Akhsa a'nogo Otniel agwe heloageluk wogetikhe.

¹⁴ Linggene it lambulinafukwa sambul he Otniel en agwe Akhsa ane ninghogo eisenaba kweang huli misik ekhe kinosuageluk yagatikhe. Yagatikhemo re hele Akhsa anggo keledai amboloba nen pi wagaikhemo, at Kaleb en he nenamene hamolo iluk heinok wokhasikhe.

¹⁵ Heinok wokhasikhemo at Akhsa nen yagati logolik he, hunai haren kweang wo'neten kwe aremnogo re iringik kwe nek hilingigen he, i elesi miren hakhogo ekhe wo'nesigin namolo o, iluk yagatikhe. Andi isikhemo re Kaleb en he i elesi wuliferek mene ambut fikhit mene ekhe inom elesi fikhit mene ekhe inom wogetikhe.

Yehuda mene inom Benyamin mene inomen inomame arik waga lagaukwa wene

¹⁶ Musa eamal eisena ambisangma mene re ap Keni inap, it Yehuda mene inombo'ne o Yerikho o kota Kurma eroma a'nogo nen wulipluk lagaukwasik he, o Yehuda meneba nen o Arad en he abel a'ma selatan fikhit kweang esi le'ma aloba andoma lagaukwa. Andoma lagaukwasik he it ap Amalek mene were'ma inanggele'ma andoma welagaukwa.

¹⁷ Andi nen he, it inunggulenu Simeon mene inom Yehuda mene inom seberogo lagaukwasik ap Kanaan inap o kota Zefat werek mene andoma weim kwikhi logolik inoasi lagaukwa. Iren he o kota a'nogo homan fesukwasik mondogat wolelenggen hogo fesukwa, arigin fesukwasik o a'nogo enu re Horma salhukwa.

^18-19 Tuhan nen ap Yehuda mene leberinafu kwelek a'luk he, iren o tomkwe werek mene omanogo sebelik lagaukwa. Oba nen iren mugusogo wulak fisasukwa lek mene re o Gaza, Askelon, Ekron inom, nen o era'lukwe andoma inom he inunggulenu i esanggokwe werek mene andoma re inangge kereta weim yafarek mene re posiemanggen mene fetaluk welagaukwama nogo nen he, andomaba ap Yehuda mene nen it mugusogo wulaginabu elo'lek agaikhe.

²⁰ Attak Musa nen wene melalinafikhe mene higithogo re o kota Hebron he Kaleb wogetikhe. Andi re attak ap unggulenu Enak mene nen ap unggulenu akhogo henagan welagaukwa mene re at Kaleb en o kota andiba mugusogo wulak fisasikhemo a'luk wogetikhe.

²¹ Unggulenu Benyamin mene nen ap unggulenu Yebus mene o kota Yerusalem en mugusogo wulak fisa elo'lekhogo hilinglagaikhe. Andiba re ap Yebus mene re ap Benyamin mene inom seberogo welagaikharek andi.

Yusuf en tagoma mene nen, o Betel sebelhukwa wene

^22-23 Hun Yusuf ambisang mene Efraim inom Menasye inom aremnogo nen he o kota Betel andem oba enu Lus ikhi lagaukwa aiba a'nogo weim kwi lagaukwama re, Tuhan nen it leberisasikhe. Iren ap ineil penesuageluk o kota andiba lakfisasukwa sambul he,

²⁴ ap misik ekhe o kota andiba nen wagunem it inom ambi agaukwa. Ambi agaukwasik iren ap a'nogoba yagati logolik he, ”Niren o kota yiba kwi loageluk haren nit lebetninabigin halok he, niren hat hebe fanorogo hal hobagagun o,” iluk yagatukwa.

²⁵ A'nogo yagatukwama ap a'nogo nen he kwe o kota andiba kwi lagaikharek mene a'nogo yagaisasikhe. Ma re ap Efraim mene inom Manasye mene inom he o kota a'nogoba kwi lagaukwasik he afuni andoma werek mene omanogo mondogat inoatukwa, we ap a'nogo inom at eisok erokwe mene inom enek he inoati'lek loageluk harakfisasukwa.

²⁶ At a'nogo hobugen he it afuni Het mene inaiba andoma lagaikhesik andoma nen he o kota misik ekhe halogo kwisikhesik he o a'nogo enu Lus salhikhe. O kota andi re yogondak huli nen ogo enu andiat agarek.

It afuni Israel mene nen inunggulenu lombok wulakfisasukwa lek mene a'nogo

²⁷ Unggulenu Manasye mene nen he afuni o kota Bet-Sean mene inom, Taanak mene inom, Dor mene inom, Yibleam, Megido mene inom, o sili-sili esanggokwe welagaukwa mene inom mugusogo wulak fisasukwa lek. Andiba re, it afuni Kanaan mene re o andoma femhogo welagaikharek.

²⁸ It Israel mene inomame hokho agaukwasik he ap Kanaan mene re it inobaget yabu hilingi'ni iluk inomameba yagaisikhi lagaukwa. Oba nen he iren ogo ap Kanaan mene o andoma nen eberogoat he mugusogo wulak fisikhi lagaukwa legat.

²⁹ O kota Gezer oba nen it inunggulenu Efraim mene nen he ap Kanaan mene afuni andoma o andiba welagaukwa mene mugusogo wulak fisasukwa lek andiba re, afuni Kanaan mene re it inom seberogo andoma welagaukwa.

³⁰ It inunggulenu Zebulon mene nen he ap o kota Kitron mene inom Nahalol mene inom mugusogo wulakfisasukwa le'ma re ap Kanaan mene re it inom seberogo andoma welagaukwa. Oba nen afuni Kanaan mene andoma re it inobaget hilingisuageluk inane ning nanghogo yagaisikhi lagaukwa.

³¹ It inunggulenu Asyer mene nen he o kota Ako, Sidon, Ahlab, Akhzib, Helba, Afek inom, Rehob inom, ogore mugusogo wulak fisasukwa legat.

³² Andiba nen he ap Kanaan inap o andoma inonggwarek inap he ap Asyer mene inom seberogo welagaukwa.

³³ At unggulenu Naftali mene re afuni o kota Bet-Semes mene inom, Bet-Anat mene inom andoma mugusogo wulakfisasukwa lek. Andiba re ap Kanaan inap o andoma inonggwarek inap he ap Naflati mene inom andoma seberogo welagaukwa. Oba nen he it andi re afuni Naftali mene faget yabu hilingisuageluk inane ninghogo yagaisikhi lagaukwa.

^34-35 Ap inunggulenu Amori mene inom Ayalon mene inom Saalbim mene inom, Tom Heres oba inom, andoma femhogo welagaukwa. Andi re it inunggulenu Dan mene re it andi nen kweang tonggoma andoma pi wesinogo iluk o tom fikhit andoma higilisa lagunem andoma welagaukwa. Andiba nen he unggulenu Amori mene andi re it Efraim mene inom Manasye mene inomen sebelinarek logolik he yabu inomameba it inunggulenu pire andem ineabu hilingisuageluk yagaisikhi lagaukwa.

³⁶ Ap Amori mene andi inawi huli-hulire o Sela abel utara fikhit o Akrabim lagagarek oba andomaba welagaikhe.