HAGAI 2 - Allah Wene Fano Wene Hupla Inane

O Tuhan Awi ket wutukwa mene a'nogo alonghogo hilingik welagaikhe wene

¹ Tahun a'nogo mene tugi pirenek mene were'ma tanggal dua puluh satu ba werek kwelek, nekhengge Tuhan nen nabi Hagai bene nen wene yagatikhe.

² Tuhan nen Hagai mimingiti logolik he, hun Gubernur Zerubabel inom, Imam Agung Yosua inom, nen afuni we mene andoma inomat inoba yagaisoageluk yi'nogo yagatikhe,

³ ”Hit he An nawi yi o attak mondok fanorogo wurik welagaikhe mene a'nogo eberek welagep mene ekhe welageba? Hiren anggikhi logolik yogondak he ninggi'nogo hilingik anggikhi lagep? Hinendawimo anggalek hak hilingik lek nogo a?

⁴ Ariginik kwelek oba nen he, yago hit hinebe mondogat yoma re! Hiren inendawimo weak a'luk hilingiti logou fuk. An nen hundik lebethinafi logogin enggere, yabu hilingiti lagep mene andi hilingitu mondogat logoino.

⁵ Hit o Mesir en wulibi wagunem omanogo, An nen hit fethinarek logolik wokhinarek mondok nikhi logogin iluk wene wathisasigi mene a'nogo higithogo re yogondak ogo An nen nawe a'ma hinobagaluk fethinarek welagi hilingi'mo re, hiren hinendawi fisu fugo.

⁶ We eil misik wela'luk he An nen pogot inom, kweang inom, kweang ambuema inom ima inom mondogat erak-kwerak isagain o.

⁷ Yi afuni ti afuni inunggulenu lombok welagaikharek mene mondogat he An nen abologet hilik lambik he, it inangge yi mene ti mene werek mene andoma mondogat waluk wesumo re, An nawi wuri'mo oma mondogat he it inangge andoma nen peterek logogin.

⁸ Emas inom perak inom o kweangma welagarek mene andoma mondogat he An mene nek.

⁹ An nawi attak wurik welaga mene andi re we harek hak oba nen, ket wusugun mene andi nek he fano mondok logogin, nen, o andi re An nen hit hinendawinggen serogo logobagaigeluk hilingisogo hinobagagik, hit An nagainafuri hinunggulenu yi mene hinoba hinangge sik-pikhogo hilinghinobagagik, igin o,” iluk An Tuhan Nomame Mondok Hokho mene a'nogo nen nane mondogat igi o, yagatikhe.

Nabi Hagai inom it imam inomen hilingisun mene faget inane misik seberogo matukwa wene

¹⁰ At Darius raja menlagaikhesik ferinarek were'ma, tahun pirenek mene tugi sogo meneba tanggal dua puluh empat oba re, Tuhan Omame Mondok Hokho mene a'nogo nen nekhengge at nabi Hagai bene nen wene yagaisasikhe.

¹¹ Aren yagaisikhi logolik, ”Wene andi faget he it imam en sikhiphogo paluakhogo yagaisan o:

¹² Ap ekhe nen ambi wam warogo Tuhan obaget fuguba omanogo senggelek misik ekhe helaluk, asu pisarek mene endakwe labetu mene jubah wurep yinggilik meneba hinagaisogo helaluk lamo nen he, at asu jubah nen roti hea, athe amu mene isagongge hea, anggur hea, zaitun amusu hea, athe nunggu mene amungge meneba andoma hea, sen hamo nen he, andoma mondogat fano horek logou hak anggegeba?” iluk yagaisan o, yagatikhe. A'nogo yagatikhemo at Hagai nen it imam omanogo inoba heinok wogisasikhemo nen iren onggo ikhi logolik he, ”Lego,” iluk yagatukwa.

¹³ A'nogo isukwama re hobuk at Hagai nen heinok wogisikhi logolik, ”Ap ekhe nen ambi ap warek senetuba ap a'nogo emerek mene agunem, nekhengge at a'nogo nen nunggungge werek mene omanogo misik ekhe oba senhamo nen he, nunggu mene andoma ogo emerek mene u hak nogo a?” iluk heinok wogisasikhe. A'nogo heinok wogisasikhemo it ap imam omanogo nen onggo ikhi logolik, ”Andi re hilingisu hago!” iluk yagatukwa.

¹⁴ Andi nen at Hagai nen ekhe yagaisikhi logolik, ”Tuhan nen ikhi logolik he wene melalek andi re it afuni Israel mene o kweang yiba werek mene inom, nen iren yi mene ti mene ambisangma enggen palharek mene inom oba hilingitu mene faget werek. Enggere iren yi mene ti mene Tuhan obaget fuluk nolhuba mezbah ariba werek mene oma re emerek mene werego,” iluk yagaisasikhe.

Tuhan nen fanot hinobagakhi logogin iluk abok yagaisasikhe wene

¹⁵ Tuhan nen ikhi logolik, ”Hiren o yogondak linggene welago mene yi asi wagi'lek werek kwelek welagagu aremnogoba An nawi yi fano pugunhogo wurik le'ma agaikhe mene aremnogo fanorogo wenggel haluk futfeni o! Aremnogoba re hit hinebe ningginik welagagip nogo?

¹⁶ Hiren gandum enggen palek mene kabok lagagunem hinendawimo nen anggikhi logolik he 200 kilogram en helogoin iluk anggikhi lagagip oba nen he, we 100 kilogram enek aga lagaikhe. Nen, hiren anggur agai hinago were'ma omanogo nen 100 liter en hinakhogoin iluk laga-lagagip mene re we 40 liter enek welagaikhe a'nogo.

¹⁷ Hit hineabu yi mene ti mene yago mene andoma unggul wasuageluk An nen sogoi aganhan mene inom meiso helebenggen mene inom pelabi wagagi, oba nen hit he sugulogo An nambit wagu aplere hinabirat welagagip andi.

¹⁸ O yogondak linggene yi re, tanggal dua puluh empat tugi sogo meneba werek kwelek, An nawi ubule fugu mene mondogat fegep! Enggere yogondak huli yi nen hilinglaga logogin mene andi futfikhi logoino o.

¹⁹ We gandum enggen werek mene ogore mondogat lek, nen anggur inom ara inom, e delima inom e zaitun inom ogore, enggen oan iti'legat werek. Oba nen o yogondak yiba nen he An nen hit fanoabet hinobagakhi logogin o,” iluk yagaisasikhe.

Tuhan nen Zerubabel wene waretikhe wene

²⁰ Linggene andi sambul enek tanggal dua puluh empat oba tugi sogo mene werek kwelek Tuhan nen ane enggi pirenek meneba Hagai yagatikhe.

²¹ Yagatikhe mene andi re, at Hagai nen, hun gubernur Zerubabel yagasuageluk yagati logolik he, Tuhan nen yi'nogo ikhe, ”Eil misik logombik he An nen pogot inom, kweang inom, erak-kwerak isagain o.

²² O kerajaan-kerajaan werek mene andoma re An nen mondogat meisalogo lakfisambik it inalong werek mene re An nen wolelenggenhogo legetfisagain. It inangge kereta amboloba lagaluk weim yafarek mene inom, it waluk lagaikharek mene inom he, An nen enden-fanden isagain, inanggo kuda mondogat he wa'lasugun enek, nen, it ap amboloba lagaluk lagaikharek mene andoma re it-it wat-wat logoin.

²³ Linggene andi sambul, hat hamingmingengge Zerubabel he, An nenuba ferinarek logolik yagaisikhi logouwagen menfogoin. Andi re An nen hat wenakhafigimo a'luk hilingisigin, iluk Tuhan Omame Mondok Hokho mene a'nogo nen ikhe ino,” iluk yagatikhe.