HABAKUK 3 - Allah Wene Fano Wene Hupla Inane

Habakuk en Allah ayonggo fesikhe wene

¹ At Habakuk Allah ane yagaisikhi lagaikhe mene a'nogo nen Allah ayonggo fesikhe mene re yi:

² ”Tuhan neisena, Hat hobabut hilingiti lagen mene andoma nesanggo holhiresik he, nendawimo nen Hat hobaget hilingisu hagenek hilingnabi'lago o. Attak hilingiti lagagin andi hak, yogondak ekhe hilingitik, weinamet figik, ino. Ha'mage lagakhi logoligat he, hendawit ninabin o.

³ An neilenggen hiugunemen he neisena Allah Hebe Mondok Tegelek welagen mene a'nogo o Teman fikhiren wagik, nen o Paran tom fikhit andoma nen wagik ugunem hiigi o. Nen Hat hebe agaugwet hafarek mene a'nogo pogoroba mondogat sagare'ma re, kweangma yi awi ti awi mondogaren ogore Hat faget wuniba fogethafu welagaikharegat andi.

⁴ Hat hebe wagunem he hombak-bak yararet hilik waga lagen, nen Hat henggiba nen he hasinandi amulit tibelenggeri'lago. A'nogo tibelenggeri'lagoba andoma re Hat homame a'nogo hinago welagen.

⁵ Harenat, ou weak mene Hat helokhoma attak loageluk lakfigik, nen wa'lagaikharek mene hombo'ne wesuageluk hilingitik, ikhi lagenat.

⁶ Hebe menlasi wagunem he, kweang abolok igik, heilenggen nayo hayo ugunem he, afuni inunggulenu lombok inoagelekwe leigetik, agarek. Tom isa attagaren etok mondok welagarek mene omanogo re sunuk-sanakhogo lobaget figik, punukwe inom, alokwe inom, o endamaren werek mene omanogo wolelenggenhogo legetfigik ikhi lagen, Hat o attagaren heisok filik-filik nikhi lagen kwe mondogat tamuk-tamakhogo lobaget figik, hilingiti lagen andi.

⁷ An neilenggen isugunemen he it afuni Kusyan mene omanogo inailo mondok hilinglagik, Midian mene re inoak leigetik, ugunem isigi.

⁸ Tuhan neisena, Hat ha'mage lagali'lago andi re i laut werek andi nen a? Athe, i lagu agai werek andoma nen wene palhendek nogo a? Kuda ba lagaluk weim wagaikharek andi hak Hat hebe ohenaba wagik, kuda nen kereta ba lisogo woginarek weim wagaikharek andi hak pogot muli meneba wagik, isigindik, hagainafuri inomamerinabi wagagin andi.

⁹ Hasikhe re mondogat enggela salogo fegen, nen handok he enggelaba fegendik pising hageluk fangsek welagen. A'nogo logolik Haren kweang mondok pakhogo hilingfugunem he i lagu agai mene lagarek andi.

¹⁰ Hebe wagunem, tom en eilenggen healuk he abolok igik, pogoroba nen i kweangma houwalanghogo pelabi wagik, i kweang elema nen eindep ane hokho mene igik, i ha'labu esinggen foinalogo hugesi lagai wagik, ikherek.

¹¹ Handok pisingethugunem ombak-bak he furung warogo lagik, harigeba fangetunem amulit yabelanget higik, ugunem he, mo inom, tugi inom, lagi'lek aloksek werek andi.

¹² Hanini mondok hambu-hambarogo re o kweangma mondogat haningirik lagik, nen ha'makwe het-peruluk he afuni inunggulenu lombok heisogen alperelinafik, egendek andi.

¹³ Haren at raja wenatigin mene a'nogo ili wanhi logolik inom, Hat hagainafuri fikhalogo fisageluk waga logolik inom, ap inogogwi melalinafarek mene inobabut mondok weak mene omanogo inoati lagen. Nen it inom seberogo lagaikharek mene omanogo re, Haren mondok felelenghogo legetfisikhi lagen.

¹⁴ Nit telfol nisogoin iluk wagunem, Hat handogen nit ninom weim palek mene esa logalogo weri'lagwi mene omanogo it sikhe fisogo mene tentara re sogoi sielu hakhogo wagu kwelek he, inanggele'ma pisinghogo kwelafi lagen. It afuni ekhe nen he samik-samok afuni inangge lek inelagaik mene sebelogo fisagarek mene hangge inagaiyegen endo ari'lagwi.

¹⁵ Hanggo kuda amboroba lagaluk i laut yenggelek agum ebene wagunem, i ha'labu hilingiti logolik wesilagap langgi wap langgi hilingirik wagendek andi.

¹⁶ A'nogo hilingitunem wene andi nesanggo holhirik he, nendawinggen abolok igik, nambe lei'leik igik, ikhi logolik he, noak yeli agul hangge kuluk-kalak igik, noak elekwe helela igik, igirek meneat he, it ap ninoasuogoluk weri'lagwi mene andi, Allah nen weagerinabi wesigin o, iluk he nafe morogo nabolo'legat logogin o.

¹⁷ E ara enggen ugu lek kwelek oba nen, e anggur enggen ugu mene lek kwelek oba nen, e zaitun enggen palhu sambul palhu mene lek kwelek oba nen, yabukwe gandum enggen itu le'ma nendawimo weak agu kwelek oba nen, wam domba ogo mondogat wa'lagu kwelek oba nen, wam awi senggelek kwe somong arik lagu kwelek oba nen,

¹⁸ an telnaferek mene re neisena Tuhan Allah werego, iluk, nendawimo nagaiyek hikhi logolik wuniba Allah fogerati logogin.

¹⁹ Tuhan Allah neisena, Harenat nomame wo'neti lagen. Wam rusa eisok wurikhogo fuluk lagarek andi hak, an neisok wurigetnafik, an nebe tomkwe lagunem fanorogo loageluk Harenat wo'narek lagik, ikhi lagen o, neisena,” iluk samban isikhe.