HABAKUK 1 - Allah Wene Fano Wene Hupla Inane

¹ Tuhan ane Habakuk en yagaiagaluk oba fugunem abikanggoba yethasikhe re, yi.

”Weak hilingninafu kwelek henggi miren oba hera'ninobagambik logogin nogo?” iluk Allah yagatikhe wene

² Tuhan, eige neisena! Afuni inobabut weak mene nen weagetninabi'lagwi andi nen, telninabinogen iluk hayonggo fikhi lagi mene yi re mera huli nen nane hesanggo holigin nogo?

³ Inobabut mondok weak hilingitunem neilenggen kwelaginarek logouwageluk hera'nobagakhi lagen andi nenahalok? Hat hane sagalogo weak a'nogo hilingitu kwelek meneat he, heilenggen isaluk hafe morogo welagen andi nenahalok? An nera'lukwe elima yoma mondogat weagerinafik, ina'mageba ninghogo hilinginafik, yei liafik, minggit- manggathogo hilinginafik, ikhi logolik, mondok weakhogo hilinginafu werek andi.

⁴ A'nogo hilingitu kwelek welagen andiba re, weak mene nek hilingiti logolik wene melalek sagalogo mabenet figik, higithogo hilingitarek awene faget omamerati'lek welagik, afuni tiphogo nek hilingitarek mene omanogo sebelogo fisikhi logolik he iren weak hilingitarek mene omanogo omameratu werek andi. A'nogo hilingiri'lagwi andiba re, fano higithogo hilingitarek awene a'nogo hebekhogo re weaget fili'lagwi o.

Tuhan nen Habakuk onggo yagatikhe wene

⁵ A'nogo yagatimo, At Tuhan nen he, againafuri yagaisoageluk, wene mel yaganete: ”Afuni inunggulenu lombok o hit hinera'lukwe ekhema-ekhema welagaikharek mene andoma, yogondak An nen ekhe hilingisigin enggere, hineilenggen logolik fogerasugun o. Andi re tindelhunem ogo hiren eberogo iluk anggogoin lek mene ekhe o horok hit welagep yaba hilingitunem hambik he, hinendawinggen youk imbik, eigi nailo e,” iluk fogerasugun mene welagebo.

⁶ It afuni o Babel mene inobabut mondok weak het-petsek welagaikharek mene andi re, inomame asuagaluk An nenat hilinginabigin o. A'nogo hilinginabumo, inailokwe nen wulibi wesimbik, esa logalogo re, afuni inunggulenu lombok o yi awi ti awi welagaikharek mene andoma iren telogo woginabuogeluk wesugun o.

⁷ A'nogo wagunem he, o ekhema-ekhema inailo nen inaleik wasugun; it inobabut he inonggwarek foget fakhiki logolik, iren he wene melalek werek mene a'nogo sebelogo fuluk, inawonok oba re it inendawimo anggili'lagwi mene nek hilingiti logogun.

⁸ It inangge kuda uarek lagunem he no posi hangge enu macam tutul andi eisok lek oba nen he mondok furung warogo lagarek. Nen anini re mene olomene ambe nele nen hubanggo wagarek andi obabut endebat fano hangge meneat he, it inanggo kuda andoma re obabut mondogat weak. It ap andi inaiba yatma nen kuda amboroba lagaluk uarek wagunem he sue pim en at nunggu mene hikheresik indu-wandunggwe sebeli pikherek andi hak, inoasi kwi wesugun o.

⁹ It inagoromi tentara inom esa logalogo ina'mage mondok het-pethogo waga logolik, yi afuni ti afuni mondogat mabenet fisilik wagunem he, afuni mondogat inailo a'luk ina'li'liphogo kwelagisikhi logogun. A'nogo hilinginafi logolik, inomame legetfisaluk inenggi hele warogo woginapluk laga logogun mene andoma re wenaginabu mondok elo'lek logogin.

¹⁰ Iren he inogogwi raja omanogo inane asegen waganogo re, it inagoromi pegawai yabu legoma logolik hilingitarek mene omanogo endo yagaisogo piliphogo pelaginafi logogun. Nen o leget omamerogo uanhogo waganek mene omanogo inendawimo seramet fuluk he, kweang habulogo kabogerik lagaluk, leget waganek mene a'nogo bene esia'le harogo pin kwikhi logogun.

¹¹ A'nogo mabenet fisa kuluk he, o sogoi weak-weak funhogo lagarek andi hak, it inebe inonggwarek inomameba himbirik welagaikharek inap andi weak-weak hela logoin o,” iluk yagaisasikhe.

”Afuni inobabut mondok weak hilingitu kwelegat he, hobakhe nene herakfisikhi lagen andi nenahalok,” iluk Allah yagatikhe wene

¹² Tuhan neisena. O eroba nen engge Hat he an neisena Allah at welagen o. Hat an neisena Allah hebe horek logolik hetok mondok welagen. Hat hebe re Tuhan, Allah at logolik, an ha'ma sebelnarek welagen. It inunggulenu Babel mene andi re, Harenat wenaginafendik he, it inomamet fisegenma nit wene ninoba fouwogeluk ili'lagwi andi.

¹³ A'nogo meneat he, it ap inobabut mondok weak logolik, ning-nanghogo lalinafarek mene andi inoba heilenggen isikhi logolik meneat he nenahalok hafe morogo welagen nogo? Hat hebe horek mondok logolik, it ekhe weak hilingitunem heilenggen logou hak nogo? Nen it ekhe higithogo hilingitu le'ma, Haren hebak hafe asu lek hak nogo? Andi nen he, it ap inobabut weak mene andi nen it inobabut fano mene omanogo weagerinafu kwelek meneat he, nenahalok hafe morogo welagen nogo?

¹⁴ Nit ninebe afuni meneat he, Haren nit ikan i laut elema inom nen eluk-elugengge inom inoe kain mene le'ma welagarek andi hak hilingninafi lagen andi nenahalok nogo?

¹⁵ It ap Babel mene andi nen, afuni meneat he ikan heaba, mata kail oba hamborogo su yoge elema kwalogo waluk lagaikharek andi hak, woginarek laga logolik, inendawimo inagaiyegen a'mit suphogo hilingiri'lagwi andi.

¹⁶ Iren he, ”Ninasu yiba nen fano mene saburogo ninggik, heligik, ikhi lago,” iluk he, inasu andi oba inendawinggen himbirik logolik, anggo waretik, amben fano mene noletik, hilingiri'lagwi.

¹⁷ It ap andi nen karok lisogo inoatik, afuni inunggulenu lombok inebe inendawirinafi'lek inoatik, agarek andi re u higiroba hilingitu mondok werek nogo a? iluk Allah yagati.