GALATIA 3 - Allah Wene Fano Wene Hupla Inane

Ninendawinggen Allah oba himbiret fugunem he, wene ninoba mene korogo wokhaluk hobuk at ninom hunogo ninobagaikherek wene

¹ Hit afuni o Galatia mene hinendawinggen lek hilingiti lagep andi ri! Yesus Kristus ebe eba menfuluk watukwa wene a'nogo hineilhanemat furogo yagahisasugu meneat he, wene hobuk sa nen hinendawimo kagalhemo a'nogo hilingiti lagep.

² Wene Allah nen komotninafikhe wene a'nogo higithogo hilingiti lagagip andiba Allah Areagun wokhisasikhe a? Athe, niren fano wene yagahisasugumo holhigipsik he, ”Eberogoat,” iluk hinendawinggen Kristus oba himbiret fesigip andiba wokhisasikhe a. Wene misigat andiat yagane'ni o.

³ Yabu attak fakhagarek hak, Allah Areagun oba fakhasigipsik meneat he, yogondak ya hinendawinggen mondok lek a'luk hinonggwarek hinomameba katokhogo hilinglasi logoin nogo? Elo'lego.

⁴ Allah nen mondogat a'nogo hilinghinafunem hasigip mene andi, we tulemat alomat lasigin nogo? Elo'lego.

⁵ Halok he, ninggi'nogo ugun. Hiren wene Allah nen komotninafikhe wene a'nogo higithogo hilingiti lagagip oba, at Areagun hokhorogo wokhisigik, hilingisu lek mene elalinat hilinghinafik, ili'logo nogo a? Athe, niren fano wene yagahisasugumo holhigipsik, eberogoat iluk, hinendawinggen Kristus oba himbiret fesigip andiba wokhisili'logo nogo a.

⁶ Wene andi hangge, at Abraham endawinggen Allah oba himbiret fesikhemo re, at Allah nen he, ”Hat hobabut higithogo hilingiti lagen hak, hendawinggen noba himbiret fegenma, wene hoba mene korogo wokhigirik hambotkwe nemberek hunogo hobagagi andi aro,” iluk yagatikhe.

⁷ Andi nenat, hit hinendawimo nen he, Abraham againafuri ebe mene re, it afuni inendawinggen Allah oba himbiret fuluk welagaikharek mene andi aro, iluk, futfogoin o.

⁸ Attagat wene ebe a'nogo oan hilinglagi'lek werek kwelegat, it afuni endakwe mene inendawinggen Allah oba himbiret fugunem, aren he, ”Wene hinoba mene korogo wokhaluk ninom hobuk hinambotkwe hunogo hinobagagin o,” iluk, wene fano wene oan yagaisigi'lek logolik, Abraham tak wene abok mel iluk yagatikhe: ”Yi afuni ti afuni mondogat an nen fanorinabigin andi, ero hararo,” iluk isikhemo, lisu palogo fesukwa.

⁹ Abraham endawinggen Allah oba himbiret fesikhemo, aren fanot fesikhe hak, it afuni ekhe inendawinggen Allah oba himbiret fagarek mene halok inom higithogoat fanorinaferegaro.

¹⁰ Nen, Allah nen mel isikhemo lisu palogo fesukwa: ”Wene an nen komorinafigimo lisu palek werek andi mondogat afuni inesanggo holfuluk he, higithogo hilingitarek lek halok, inebe lombok homan inobagagin werego,” iluk isikhemo, lisu palogo fesukwa hak, it afuni ekhe nen wene Allah nen komotninafikhe wene a'nogo higithogo hilingisuogeluk, inendawinggen andiba himbiret fuluk welagaikharek mene halok, Allah nen homan inobagagin weregaro.

¹¹ Allah nen he, ”Hinendawinggen an noba himbirik logogun andiba, an nen wene hinoba mene korogo wokhambik ninom hobuk hinambotkwe hunogo hinobagagin mene halok hineluk mondok logogun o,” iluk, isikhemo lisu palogo fesukwa andi nen, wene Allah nen komotninafikhe wene andiba nit mondogat wene ninoba mene korogo wokhambik hobuk ninom hunogo ninobagagin legaro, iluk, enegat agaikhe.

¹² Afuni nen, wene Allah nen komotninafikhe wene a'nogo fisogo welagaikharek andi, ero faget he, lisu yi'nogo palek werek: ”Wene andi hologo logolik, higithogo hilingiti logogun mene halok hinebe lombok, wene andiba hineluk mondok logogun o,” iluk isikhemo, lisu palogo fesukwa andi. Mene re, inendawinggen Allah oba himbiret fagarek andi, hunogo aro.

¹³ Allah aneba lisu palogo fikhi logolik he, mel isukwa: ”Inebe eba menfisaluk inoasumo, it inebe wa'lasugun mene andi, Allah nen homan inobagagin werego,” iluk, lisu palogo fesukwa hagat, wene Allah nen komotninafikhe wene andiba re, homan inoba feigiluk were'ma, at Kristus nen ninonggo palogo telninabigeluk wene nit ninoba mene korogo at oba fakhasikhe andi.

¹⁴ At Allah nen he, Abraham fanot fesikhe hak, yi afuni ti afuni mondogat Kristus Yesus inom hunetunem fanorinabuageluk, Yesus wa'lagaikhe andi. At a'nogo wa'lagaikhesik oba nen, Allah Areagun wokhisagain iluk abok tak yaganisasikhe a'nogo, ninendawinggen At oba himbiret fugunem wo'nisikherek andi.

Allah nen Abraham tak abok yagatikhesik komotninafikhe wene

¹⁵ Nerugwi nagaila'lak. Nit afuni hilingitorek mene ekhe oba lirogo yagahisak. Afuni inebe pire nen, ”Yi'nogo hilingisuok,” iluk hombuk palogo ugu halok, it ekhe nen munenhik, wene hunogoat mene ekhe oba mangoratik, agarek mondok lego.

¹⁶ Wene andi hak he, at Allah nen Abraham yagati logolik he, ”Hat yi'nogo wokhetik, nen, haren tagongge mene ekhe yi'nogo wogisigik, igin o,” iluk, abok yagatikhe andi. Inebe hokhorogo faget u hak he, ”Haren tagongge mene ekhe yi'nogo wogisagain,” iluk, igi'lek. We, ap ebe misigat mene faget, ”Haren tagongge mene ekhe yi'nogo wogosigin,” iluk, abok yagatikhe andi ebe re, Kristus ebe faget isikhe.

¹⁷ Wene andi mel faget igi. Allah nen he, ”Yi'nogo wokhesigin,” iluk, abok tekhogo isikhesik, 430 tahun welagaikhesigen, wene komotninafikhe mene hobugen andiba, wene attak mene andi munenogo legetfigi'lek.

¹⁸ ”Yi'nogo wokhesigin,” iluk, Abraham abok tak yagatikhe mene andi, aren wene Allah nen komotninafikhe wene a'nogo higithogo hilingiti lagaikheba woge'lepma re, abok yagatikhe a'nogo, we onggo legat wogetikhe iluk ilep lek. Oba nen he, Allah obabut fano nen Abraham abok yagatikhe andi nenat, ebe we onggo legat wogetikhe andi.

¹⁹ Halok he, Allah nen komotninafikhe wene andi re nenahalok wo'nisasikhe nogo? Nit afuni weak hilingitu welagagu mene andi faguageluk komotninafikhe andi. Mene re, wene andi Abraham en tagongge mene ekhe wogosigin iluk, abok yagatikhe a'nogo, at Kristus oan ta'lagi'lek werek kwelek elama faget wene komotninafikhe wene a'nogo, malaikat en Musa yagatunem at ebe hulisanem logolik afuni yagaisoageluk he, malaikat inayonggo fuluk lakfisa wagaikhe andi.

²⁰ Afuni pire minggilogo huli warek were'ma re, ap ekhe hulisanem logogun aro. A'nogo meneat he, At Allah onggwaregen pikhit wene abok yaganisikherek andi nen he, At alegaren wene onggo lek yaganisikherek andi.

”Nenahalok wene Allah nen komotninafikhe,” iluk yagaisasikhe wene

²¹ Halok he, wene Allah nen Abraham, ”Wokhesigin,” iluk, abok yagatikhesigen, hobuk komotninafikhe mene andi re, afuni ekhe inom limamit palharek hak hilinglasigin ugun nogo? Mondok lego. Wene komotninafikhe wene a'nogoba ninelugetninabigeluk wo'niselepma re, wene andibaat wene ninoba mene korogo wokhaluk, Allah ninom hobuk ninambotkwe hunogo ninobagailep andi.

²² Allah aneba lisu palogo fikhi logolik he, ”Afuni hinebe mondogat weak hilingiti lagep mene andiba, hinenggi hele homago hangge welagep,” iluk, yaganisasikhe andi, nit ninendawinggen Yesus Kristus oba himbiret foumo, Allah nen abok isikhe mene a'nogo re, nit ninendawinggen at oba himbiret fogoin mene halok wo'nisageluk isikhe andi.

²³ Ninendawinggen Kristus oba himbiret fogoin higit asi lagi'lek werek kwelek, hobuk wene andi weinametfagain andi higithogo ninendawinggen at oba himbiret fouwageluk, afuni hele warogo ferinarek welagaikharek hak, wene komotninafikhe wene a'nogo nen hele warogo ferinarek welagaikhe.

²⁴ Nit ninendawinggen Yesus oba himbiret fugunem, wene ninoba mene korogo wokhaluk, Allah ninom hobuk ninambotkwe hunogo ninobagaigeluk he, Kristus oan ta'lagi'lek werek kwelek, wene komotninafikhe wene a'nogo nen fetninarek logouwageluk isikhe andi.

²⁵ Mene re, yogondak ninendawinggen Yesus oba himbiret fogoin arat higit asi wagaikhemo andi nen he, wene komotninafikhe wene andi nen hobuk fetninarek werek lek.

²⁶ Hit hinendawinggen Kristus Yesus oba himbirik welagep andi nen hinebe mondogat he, Allah againafuri welagep andi.

²⁷ Nen, Kristus hinom hunesuogeluk ima pisigip mene hinebe mondogat, su labetarek hak Kristus obabut wanhigip andi.

²⁸ Wanhigipsik, hobugen he, hit mondogat he, Kristus Yesus hinom hundik logolik hinebe misigat mene welagep andi nen he, hit fena Yahudi mene, fena Yunani mene igik, fena inamingmingengge mene, fena inale'ma mene igik, fena hemi, fena ap igik, ikhi logogun lek.

²⁹ Hit hinebe Kristus mene halok he, hinebe Abraham en tagongge mene welagep. Halok, Allah nen Abraham abok yagatikhe mene a'nogo, hit wokhisagain higiraro.