GALATIA 2 - Allah Wene Fano Wene Hupla Inane

Petrus lagen he, ”Paulus Kristus nen ayonggo fesikhesik lakfei wagaikhemo,” iluk yagatukwa wene

¹ A'nogo isukwama, nenggi 14 tahun welagagisigen hobuk Barnabas nemberegen at Titus ebe waluk he, o Yerusalem lagagu.

² A'nogo lagagu andi re, Allah nen, ”Hat o Yerusalem at logogin aro,” iluk nendawimo yaganetikhe andi nen lagagisik he, fano wene andi it afuni endakwe mene yagaisilik nigirek andi, ”Wene ebe yi'nogo,” iluk senggerogo yagaisigirik he, an attagaren, yogondak ya nen, ninghogo hilingiti lagi mene andi, we tulemat hilinglasinogo iluk he, it inogogwi mene inebe inale'ma fisaluk yagaisasigi.

³ At Titus andi re, ebe Yunani mene ninom lagagu meneat he, it inogogwi kaindek omanogo nen, ”Hagap henggalimo mene palugun,” iluk ninghogo yagati'lek.

⁴ A'nogo meneat he, it ekhe meneat he, ninagaila'lak Allah againafuri mene hak hilinglagaukwasik hinagaisogo kwi wagaukwasik he, agap enggalimo mene paluageluk isukwaat. A'nogo hinagaisogo kwi wagaukwasik he, nit Kristus ninom misigat a'luk ninale'ma logolik ninobabut hilingitorek mene andi, iren he, ”Ero ninggi'nogo nen hilingiri'lagwi,” iluk ero herasuogeluk kwi wagaukwa andi. A'nogo herakfuluk inawe a'ma ninobagasukwasik it hilingitarek mene andi hilingiti logouwageluk ineilenggen nisa kwi wagaukwa andi.

⁵ Mene re, wene fano wene andi hit faget fanorogo elele palogo fethinarek logouwageluk, iren a'nogo ugunem, niren it inane hologo ninenggi misigat oba ekhe, ”I o,” iluk, igi'legat.

⁶ It ekhe inendawimo nen he, ”Inenuwerek he, it andem,” agarek mene andi nen wene an yagaisilik nigirek mene a'nogo hobuk hunogoat yagaisilik nikhi logouwagen iluk yaganeti'legat. Allah nen afuni inagap endakwe nek eilenggen isilik he, ”Yi weak. Yi fano,” iluk ikherek lek andi nen, an it andi faget attagat inenuwerek welagaikha mene he a? Lek mene he a, iluk, menenei ebeti lagagi lek andi.

^7-8 At Allah nen, at Petrus afuni Yahudi inagap inenggalimo mene palek mene inoba elok loageluk ayonggo fesukwasik lakfigik, nen an he, afuni endakwe mene inoba elok loageluk nayonggo fesikhesik laknobagagik isikhe andi nen he, it ap inenuwerek andi inendawimo nen he, ”Allah nen, at Petrus nen fano wene nit afuni ninagap ninenggalimo mene palek mene yagaisoageluk ayonggo fesikhe hak, at Paulus nen fano wene it afuni inagap inenggalimo mene a'nogo pale'lek mene yagaisoageluk ayonggo fesikhemo hogo,” iluk enegat futninobagasukwa andi.

⁹ A'nogo futninobagasukwasik he, it Yakobus inom, Petrus inom, Yohanes inom, Allah againafuri nen he, ”Nit ninogogwi it werek,” iluk agarek mene nen he, ”Hiren he, wene afuni endakwe mene yagaisilik lano. Nen, niren he, afuni inagap inenggalimo mene palek mene faget yagaisilik logoin. Ninom hundigat hilingiti logouwok,” iluk he, Barnabas nemberek ninenggi fak-fak hai wa'ninafukwa.

¹⁰ Hai wa'ninafukwasik he, komorogo hak wene mel enek yaganisasukwa: ”Afuni nit mene ekhe inelagaik mene yoma inoba eberek logolik, leberisikhi logoino,” iluk, yaganisasukwa andi, an nen a'nogo nendawimo nagaiyek hikhi logolik hilingitirek meneat yaganisasukwa.

At Paulus nen Petrus hilingiti lagaikhe mene faget fakhogo wenagatikhe wene

¹¹ Mene re, at Petrus o Antiokhia wagaikhesik weak hilingiti lagaikhemo, an nen he, ”Hat hilingiti lagen andi weago,” iluk, fakhogoat wenagetigi.

¹² Andi re, mel hilingiti lagaikheba wenagetigi. Attagat at Yakobus nen agoromi lakfisa wagaikhe mene oan wagi'lek werek kwelek, at Petrus a'nogo it afuni endakwe mene inom sumburu lambukhogo ninggi lagaukwa. Mene re, it wagaukwasik oba nen, at Petrus endawimo nen he, ”Nit ninagap ninenggalimo mene palek mene ekhe nen nena yaganesugun,” iluk, ailo nen, it inom sumburu ninggi'lek kamo isikhesik ikhogo wulifikhe andi.

¹³ At ane pire logolik ikhogo wulifikhe hak, it afuni Yahudi mene fena inebe mondogat inom wulifi logolik he, at Barnabas a'nogo endawimo kagalogo hobuk it inane pire mene andi inoba mangotikhesik wulifikheat.

¹⁴ A'nogo wulifukwama re, an nendawimo nen, ”Wene eberogoat, fano wene yi meneat he, it inobabut he, fano wene yagaisikhi logolik hilingisu mene hilingiri'lagwi lek higi,” iluk, afuni mondogat ineilhanem Petrus wene mel iluk yagatigi: ”Hat hebe Yahudi meneat he, afuni Yahudi mene hilingitarek hak hilingiti'lek, afuni endakwe mene nen hilingitarek hak hilingiti logoligat, it endakwe mene yagaisikhi logolik he, Hit hinobabut afuni Yahudi mene hilingitarek hak, inobabut waganogo hilingiti logoino, iluk ninghogo yagaisikhi lagen andi nenahalok,” iluk, fakhogo wenagetigi.

”Afuni Yahudi mene inom, endakwe mene inom, inendawinggen Kristus oba himbiret fugunem he, telinabigin enego,” iluk yagaisasikhe wene

¹⁵ Nit ninebe Yahudi meneat ta'lagagu. It endakwe weak hilingitarek mene andi hangge ta'lagagu fuk.

¹⁶ Mene re, afuni wene Allah nen komotninafikhe wene a'nogo higithogo hilingitunem he, Allah nen wene inoba mene korogo wokhilik inom hobuk inambotkwe hunogo fisikherek lek. We, inendawinggen Yesus Kristus oba himbiret fugunem enek, hunogo fisikherek iluk hineluaro. Wene andi faget, Allah aneba lisu mel iluk palek werek: ”Afuni ekhe nen higithogo hilingitunem, wene inoba mene korogo wokhilik, inom hobuk inambotkwe hunogo fisikherek lek,” iluk lisu palogo fesukwa andi nen, niren wene Allah nen komotninafikhe wene a'nogo higithogo hilingitunem fuk. We, ninendawinggen Kristus oba himbiret fugunem wene ninoba mene korogo wokhaluk, at ninom ninambotkwe hunogo ninobagauwageluk ninendawinggen Kristus Yesus oba himbiret fesugu andi.

¹⁷ Nit Kristus ninom hunetunem, Allah nen wene ninoba mene korogo wokhaluk, ninom hobuk ninambotkwe hunogo ninobagauwageluk ninomamerogo walhikhi logoligat he, ninobabut afuni endakwe inobabut hilingitarek hak ninom higirat welago, iluk enegat ari'logo andi nen, nit weak hilingitorek mene andi, ero at Kristus iluk ugun nogo? Mondok lego.

¹⁸ O meisalfuluk hobuk wutarek hak, an nen nit afuni Yahudi hilingitorek mene arat hebisasigi mene hobuk hilingiti logoilema re, Allah ane herakfisaluk sagalogo hilingiterek mene iluk enegat a'lep.

¹⁹ Mene re, wene Allah nen komotninafikhe wene andi nen nebe warek mene hangge hilingnafikhemo re, an nebe neluk logolik Allah faget hilingiti logoigeluk, wene andi faget warek hak welagi. Andi re, Kristus ebe eba menfuluk watukwa andi nemberegat ninoatukwa andi.

²⁰ Nen, yogondak nebe neluk welagi yi re, nonggwarek nomameba neluk welagi fuk. We, at Kristus at nendawimo logolik eluk welagarego. At ebe Allah amlogoat logolik, nebe endawi nen an fagerat, ”Noasuak,” iluk anggasikheba ebe watukwa andi. Nen, an nendawinggen at oba himbirik were'ma re, at ebe nendawimo were'ma, neluk welagirek andi.

²¹ Allah obabut fano nen fanotninaferek wene andi an nen sagalogo herakfisigirek lek. Wene Allah nen komotninafikhe wene a'nogoba, wene ninoba mene korogo wokhaluk ninom ninambotkwe hunogo ninobagailepma re, Kristus wa'lagaikhe andi we tulemat alemarogo wa'la'lebo.