FILIPI 4 - Allah Wene Fano Wene Hupla Inane

Wene wurep oba komorinafikhe wene

¹ Andi nenat, nerugwi nagaila'lak. Hinebe nendawi e. Ninoe Enupogot hinom hundik logolik ninghogoat logoino o. Hit hinobabut hilingiti lagep oba an nendawimo nagaiyek anggigik, fogerakhigik ikhi logolik, hinoba we'luk nebe ninom logoilo e, iluk, anggikhi lagi.

² Euodia, Sintike, nerugwi e. Hemberegat, at ninoe Enupogot hinom hundik logolik hinendawinggen misigat mene ebeti logobagaigeluk yagahisigi andi.

³ Nen, hat nagailak ekhe Allah eabu nemberek hundik mondok hilingiti lago a'nogo, it hemi inebe pire andi leberisanok iluk yagaheti andi. It hemi andi inom, ap Klemen a'nogo inom, it fenakwe an ninom Allah eabu misigat hilingiti lago mene omanogo inom, fano wene ninomamerogo ninom yagaisilik nikhi lago mene ninenu lombok, at Allah ambukuba nabulal-habulal hilinginabigin mene halok, inenu palogo fikherek a'nogoba palogo fikhemo werek.

⁴ Halok he, nerugwi nagaila'lak. Hit ninoe Enupogot hinom hundik logolik, hundik-handigat hinendawimo hinagaiyegetu mondok logoino o. Hobuk nane hebekhogo yagahisagat. Hinendawimo hinagaiyegetu logoino o.

⁵ Ninoe Enupogot a'nogo weak-weagat wesigin andi nen, afuni mondogaren hit hinebe fut hinobagauwageluk, hinobabut liokhogo hilingiti logoino o.

⁶ Yi mene ti mene faget menenei uan horok ebeti'lek, mondogat faget Allah ayonggo fikhi logolik hai warogo kino yagati logoino.

⁷ A'nogo yagati logogun halok, Kristus Yesus hinom hundik welagep andi nen, at Allah nen afuni nen fut fagarek lek mene elalinat hinendawinggen hambuget hinapluk he, menenei ebeti lagep mene andi, arenat sebelogo fethinarek logogino.

⁸ Nerugwi nagaila'lak. Wene wurep oba yi ekhe yagahisak. Hinendawinggen ebeti logolik he, fanorogo hilingitik, fogerinabu mene hilingitik, ili'lagwi mene oba ebeti logoino. Andi ebe re, wene eberogoat mene oba ebetik, fogerasu mene oba ebetik, inobabut lomborogo logolik hilingitarek mene oba ebetik, inobabut heanerogo hilingitarek mene oba ebetik, inoba liok ugu mene oba ebetik, ebetu mondok logoino o.

⁹ Wene an nen yagahisugunem hinesanggo holhik, an hilingitunem hineilenggen niigik ikhi logolik, wene wanhigipsigen yanggulasigip mene a'nogo higithogoat hilingiti logoino o. A'nogo hilingitunem he, Allah ninendawinggen hambuget ninaferek mene a'nogo nen fethinarek logogino.

Allah againafuri o Filipi mene nen Paulus lebethasukwama hai warinafikhe wene

¹⁰ Hit attak, an noba ebetigipsigen, hobuk noba eberek welagep meneat he, ninggi'nogo lebetnea heat welagepsigen yogondak lebetneegep andi nen ninoe Enupogot ninom hundik logolik nendawimo nagaiyek hokhorogo anggikhi lagi.

¹¹ An nangge yi mene ti mene lek halok inom, werek halok inom, nendawimo fanorogo nek logogin iluk arat yanggulasigi andi nen, yi mene ti mene nelagaigen kino yagahisikhi lagi fuk.

¹² An he, inelagaik welagaikharek andi neluat, inenggi werek welagaikharek andi neluat. Sumburu neleba inom, nele legoba inom, yi mene ti mene hokhorogo were'ma inom, le'ma inom fano nek anggigirek.

¹³ At Kristus nen nomamet nafu kwelek andi nen he, yi mene ti mene weak agunem inom, fano agunem inom, higit logou hak enek.

¹⁴ Higit logou hak meneat he, an nenggi lek were'ma, hiren lebetnafi lagep andi fano mondogo.

¹⁵ Hit Allah againafuri o Filipi mene nerugwi nagaila'lak. Attak, an fano wene yagaisilik nikhi logoigeluk, o Makedonia nen wagunem he, Allah againafuri o fenakwe nen lebetniikhi lagaukwa lek meneat he, hit enek ninom hundik logolik, lebetniugunem helikhi lagagi andi hineluaro.

¹⁶ An o Tesalonika a'lima yi mene ti mene nenggi lek were'ma, attak ekhe laknobagai wagagipsik he, hobuk ekhe laknobagai wagagip andi.

¹⁷ Mene re, a'nogo lebetniikhi lagep meneat he, laknobagai wagunem wanhu mene andi faget esinet fikhi lagi fuk. We, hit onggo hela hak he, Allah nen ebe mene wokhisugunem hit eisewerek asubagaigeluk esinet fikhi lagi o.

¹⁸ Yogondak he, hit lebetneegepma, heligirik, an mondogat namolo anggikhi lagi mene higit agasik fena tindu ikhe aro. Ap Epafroditus oba fegepma wo'nesi wagama nen, nenggi werek aga. Hiren an lebetneegep andi re, wam Allah faget warogo endu noleti logolik amben fano mene liak etunem, at endawimo fano agarek hak, a'nogo lebetneegepma, at Allah endawimo fano aga o.

¹⁹ Nen, hit yi mene ti mene hinenggi lek were'ma, an neisena Allah fogeratirek mene Kristus Yesus inom hundik logolik enggi weregen fogeratarek mene a'nogo nen, wokhisugunem hinenggi werek asigin aro.

²⁰ Halok he, nineisena Allah fogeratu mondok logouwok, iluk: ”Amin,” igi andi.

Paulus nen wene wurep kobokhogo hai warinafikhe wene.

²¹ Allah againafuri Kristus Yesus hinom hundik welagep mene hinebe lombok mondogat hai wathinafi o. Halok, it ekhe yagaisano. Andi hak, an nerugwi nagaila'lak Allah againafuri ninom welago mene yoma ekhe nen hai wathinafa aro,

²² It Allah againafuri o yoma welago mene mondogat lambulogo nen hai wathinafa aro. Hai a'nogo wathinafi logolik, ebe esin hangge re it at kain Kaisar inom welagaikharek mene nen hai wathinafa o.

²³ Halok he, nerugwi nagaila'lak. Ninoe Enupogot Yesus Kristus obabut fano mene a'nogo nen hinendawimo logolik fethinarek logouwago.