FILIPI 1 - Allah Wene Fano Wene Hupla Inane

Hai warinafikhe wene

¹ Hit Allah againafuri Kristus Yesus hinom hundik logolik, o Filipi welagep mene hinebe mondogat inom, fethinarek welagaikharek mene inom, lebethisagarek mene inom, nerugwi nagaila'lak. An Paulus Timotius nemberegen Kristus amingmingengge logolik wene lisu palogo hinoba lak fei wago andi.

² Nineisena Allah, ninoe Enupogot Yesus Kristus emberek inobabut fano a'nogo nen fano mene wokhisigik, hinendawinggen hambugethinafik, ikhi logouwago.

Allah againafuri o Filipi mene faget, Allah hai watik, ayonggo figik, isikhe wene

³ An he, hundik-handigat hit hinoba mondok eberek logolik, neisena Allah at hai wati lagi.

^4-5 Hit attak wene wanhigip andi huli nen, yogondak huli an nen fano wene afuni ekhe yagaisilik nikhi logouwageluk lebetniugu mondok welagep andi nen, hundik-handigat nendawimo nagaiyekhogo hit mondogat faget samban ikhi logolik, Allah ayonggo figik, hai watik, ikhi lagi o.

⁶ At Allah nen hit fano hilinghinabigiluk omanggum enggi fakhinobagasikhesik he, fano hilinghinafi logombigen, huli at Yesus Kristus wesigin andi sambul o eil hondologo wutarek hak, fano hilinghinabi wesigin andi eberogoat iluk, nendawinggen hambukhogo welagi.

⁷ Allah obabut fano nen nayonggo fesikhemo re, an nenggi hele warek welagik, nenggi hele oan wati'le'ma fano wene elelerogo ninghogo hilingitik, ikhi lagi hak, hit mondogat a'nogoat ninom hilingiti logouwageluk hinayonggo fesikheat andi nen he, hit hinebe nendawinggen hundik welagio. Ma re, an nen hit mondogat faget: ”Yesus eberogoat hilinghinabi wesigin,” iluk angga mene higithogoat anggikhi lagi.

⁸ Yesus Kristus nen hit hinebe mondogat endawi welagarek hak, an nen hit nendawiat logolik he: ”Ninom logoilo e,” iluk, nendawimo eberogoat anggikhi lagi mene andi, at Allah eluo.

⁹ An nen samban hit hinobaget ikhi logolik, mel ikhi lagi: ”Yi mene ti mene awi yatunem ero hokho a'luk wuliferek hak, hit ebe wene furogo hinelu agik, fut figik, ikhi logolik, afuni inebe hinendawirogo welagep andi mene hokhorogoat hinendawirinafi logobagaigen,” iluk, samban ikhi lagi aro.

¹⁰ Hit a'nogo futfuluk hilingiti logogun halok, hinendawimo nen he: ”Yi fano hilingisu mene,” igik: ”Andi weak hilingisu lek mene,” igik, futfikhi logogun andi. A'nogo hilingisugun halok, Kristus wesigin andi sambul wene hinoba lekhogoat, fano tegelek were'ma wesigin andi.

¹¹ Yi mene ti mene awi yatunem ero hokho a'luk enggen iterek hak, at Yesus Kristus nen hilinghinafi logogin oba, hinobabut higithogo hilingitu mondok ekhe inomat hilingiti logogun halok, at ebe wagunem he, afuni ekhe nen Allah hai watik fogeratik, uguno.

Paulus enggi hele warek werek kwelek fano wene hokho agaikhe wene

¹² Nerugwi nagaila'lak. Wene yi hinelurogo yagahisak. An yi'nogo hilingnafa yiba re, fano wene lek agi'lek hokhorogoat wialarik lili'logo.

¹³ An Paulus, Kristus fagerat nenggi hele watama welagi yiba re, it ap at Kaisar Enupogot aiba ninggi'nogo iluk kweba kagalek welagaikharek mene mondogat inom, it afuni ekhe yoma mene mondogat inomen he, enegat fut nobagali'lagwi.

¹⁴ An nenggi hele warogo nobagagama welagi yi nen, Allah againafuri ekhe inebe hokhorogo inendawinggen ninoe Enupogot oba himbiret fuluk wurik a'luk he, wene Kristus faget inaneba fakhogo yagaisikhi logou inailo lek ari'logo andi.

¹⁵ It andi fena nen inendawimo weak a'luk he, an noba wene palhi logoligat yagaisili'lagwi andi, meneat he it fena nen inendawimo fano logolik he,

¹⁶ ”At Allah nen Paulus ayonggo fikhi logolik he, afuni nen fano wene andi eberogoat iluk anggoageluk, fakhogo yagaisikhi logoino, iluk ayonggo fesikhemo hikhi lago,” iluk, enegat fut nobagaluk nebe inendawi nen wene at Kristus faget yagaisili'lagwi andi.

¹⁷ Meneat he, it fena wene pali'lagwi andi nen, wene Kristus faget yagaisili'lagwi andi re, inendawinggen misigat logolik yagaisili'lagwi fuk. We, inendawimo nen he, ”Paulus enggi hele warek werek andi ebe weak asuak,” iluk inonggwarek inenu hokho asuagelugat yagaisili'lagwi andi.

^18-19 Mene re, it ekhe nen inendawinggen pire logolik yagaisigik, it ekhe nen inendawinggen misigat logolik yagaisigik, ili'lagwi meneat he, wene Kristus fagerat yagaisili'lagwi halok nendawimo nagaiyegeti lagi. Yi'nogo hilingnafu were'ma, hiren samban an faget ikhi logoumo re, Yesus Kristus Areagun en an lebetniugu kwelek, Allah nen telnabigin iluk an nelu logoligat, nendawimo nagaiyegeti logogin aro.

²⁰ An nendawimo nen he, wene Kristus faget ure nenggali agi'lek yagaisikhi logogin namolo. Halok, nenggali agi'lek yagaisikhi logogino, iluk, futfuluk nendawimo fano welagi. Hundik-handik fakhogoat yagaisigirek hak, yogondak a'nogoat yagaisagelugat welagi o. Nebe neluk logoumo fanoat. Nen, wa'lasumo fanoat. An a'nogo hilingnafu kwelek, nebe abirengge Kristus faget hilingiti lagi andiba re, afuni nen Kristus fogerasuagelugat welagi o.

²¹ A'nogo welagi andi nen, nendawimo nen he, nebe neluk welagirek andi re, Kristus faget. Nen, wa'lasigin halok he, fano mene saburagain andi.

²² Nebe kweangma yoma neluk logolik Allah eabu hobuk hokhorogo hilingisigin welagi andi nen, neluk logogin hea? Wa'lasigin hea? Ki mene wenasik he, nonggoraro.

²³ An hilingisu mene wene ebe pire mene nen miming nabi'lago, andi nen he, an wa'lasigin halok he, at Kristus nemberek logoumo fano. Ebe fano mondok he andi aro.

²⁴ Meneat he, an hit faget kweangma yoma neluk logoumo fano aro.

²⁵ An wene andi faget futfuluk, logogin, iluk neluo. Hit hinendawinggen Allah oba himbirik logolik, wurik agik, hinendawimo hinagaiyek anggigik, ikhi logobagaigen he, hit hinebe mondogat ninom logogun aro.

²⁶ Logouwogeluk, an hobuk hinoba wesumo re, hit Kristus Yesus hinom hundik logolik, hinendawimo nen he: ”Paulus ninom welago,” iluk, an faget hinalong asimbik hinendawimo hinagaiyek hokhorogo hilinglasigin andi.

Paulus nen: ”Weim yafi logolik ninghogo yafarek hak, fano wene faget, ninghogo hilingiti logoino,” iluk yagaisasikhe wene

²⁷ Wene fano wene Kristus nen hilingitikhe wene a'nogoba: ”Yi'nogo hilingiti logoino o, ti'nogo hilingiti logoino o,” iluk yagahisagarek meneat hilingiti logoino o. A'nogo hilingiti logolik, hinebe lambulogo hilingiti logoumo, it afuni ekhe nen hinabok ikhi logolik he: ”It inobabut he, fano wene yagaisugunem holi'lagwi higithogoat inendawinggen Allah oba himbiret fuluk ninghogo mendek werego,” iluk, an nebe yatma were'ma yaganesugun hea? Hinoba wesimbik neilenggen hisagain hea? Wene Fano wene yagahisogorek hak, hinom lambulogo logolik, weim yafi logolik ninghogo yafarek hak, wene andi faget ninghogo hilingiti logoino.

²⁸ It ekhe nen he: ”Wene andi ninabit,” iluk, ugu kwelegat he, hit enek he, hinailo agi'lek ninghogo mondok fisogo logoino o. A'nogo fisogo logogun andiba, it andi nongasugun iluk enegat hilinglagik, hit telhinabigin iluk enegat hilinglagik, Allah nenat hilingisigin werego.

²⁹ At Allah obabut fano nen, hit hinendawinggen Kristus oba himbiret fouwageluk enek hinayonggo fesikhe fuk. Lego. At faget yi enggin ti enggin hikhi logouwageluk hinayonggo fesikhe aro.

³⁰ At attak he, weim yafi logolik ninghogo yafarek hak, fano wene faget ninghogo hilingitunem hineilenggen neasigibat. Nen, yogondak nabok holhi lagebat. Andi mene, hit ninom lambulogo hilingiti lagoat andi.