EZRA 9 - Allah Wene Fano Wene Hupla Inane

It afuni Yahudi mene inom helime endakwe mene inom wok-wok ari'lagwi iluk Ezra yagatukwa ma esanggo holhikhe wene

¹ A'nogo mondogat hilingfuluk he, it afuni Israel mene inogogwi kaindek fena an nambit wagaikhasik he, an yaganeti logolik mel yaganeta, ”It afuni Israel mene inom, ap Lewi mene inom he, afuni inunggulenu amu mene nen nit welago kwe oma nen haningisogo werek mene, inunggulenu Amon inap, Moab inap, Mesir inap, Kanaan inap, Het inap, Feris inap, Yebus inap, Amori inap, oba nen enogo fakhigi legengge nek hilingiri'lagwi. It ap imam inom, it Lewi inap inom, en ogore a'nogo nek hilingiri'lagwi. It inebe mondogen he afuni inunggulenu andi mene nen inobabut mondok nong-honghogo hilingiri'lagwi mene omanogo hakhogo nek hilingiri'lagwi.

² It ap Yahudi mene nen he hemi inunggulenu endakwe mene woginafunem he, Tuhan againafuri ebe mene a'nogo re mondogat emetlagaikhama fano mene ekhe werek mondok lek. Ero ariginik mene andi hilingitu aplere it ap inogogwi kaindek mene inom, it afuni Israel mene yabu legoma hilingiri'lagwi mene omanogo nen tak erorata.

³ A'nogo yaganetu mene a'nogo nesanggo holhirik he nendawimo mondok weak agama re, nasu tilip-talaphogo herak figirik, nesi inom nomboro inom felelenghogo herak figirik, nendawinggen warugu hurek welagi.

⁴ An nebe hurek a'nogo werek kwelek enek he wam hu'mokwe warogo nolhu mene a'nogoba asi waga. Andi nen it afuni a'nogo an were'ma aremnogo maserogo kwelaknobagai wagaikhasik he, it afuni Israel mene ineisena Allah nen afuni hele warogo fisa lagaukwama hobuk wagaukwa mene andi inaweak werek mene andiba hilingfisagain iluk werek mene a'nogo inendawi wenggel hagasik he it inailo nek agaikha.

⁵ An a'nogo it afuni wam hu'mokwe warogo nolhu mene a'nogo noluogeluk hilingitu kwelek aremnogo re, nendawi heiselhu nen hurek welagiba aremnogo nen nasu tilip segengge aremnogo laberogo menlagarik he, an neindep awi yagaisogo nenggi langhogo neisena Tuhan Allahba liak figi.

⁶ A'nogo liak figirik, an nen ikhi logolik he, ”Neisena Allah, nit ninaweak he lagaikhe-lagaikhe ninunggul horok-horok pogot fakha hak hilingi'mo re, an nen Hat heilhanem nelokhe legeisogo liak hea aplere nenggali mondok hokho ari'lago o.

⁷ O attak nit ninambu ninomba welagaukwa huli nen engge yogondak huli nit Hat hagainafuri nen Hat hoba weak enek hilingiti lagoma re, andiba it ap raja-raja endakwe mene nen he nit ninogogwi raja-raja inom, imam inom, inomame leget fisikhi lagaukwa. Andi nen nit ninebe ninoatik, hinakninafik, hele warogo wo'ninarek lagik, yogondak welago yi hakhogo at nit afuni nen inal ngesukum wat ninafik, hilingiti lagaukwa.

⁸ Oba nen he nineisena Tuhan Allah, yogondak Haren nit ninoba fano agendik, o mondok fanoma yoma ninailo legengge mondok fanorogo logouwageluk, nit mene fenakwe ap ina'ma inamingmingengge a'luk were'ma nen lologo ninobagegendik nineluk ket mene logouwageluk wo'nisegen.

⁹ Nen nit hele warek inamingmingengge higit werek kwelek Haren herak ninobagaluk lagalagen lek. It ap raja Persiaba welagaukwa mene omanogo nen nit inendawit ninafakwasik, o Hat hawi meisalogo kabok lagali'lago mene yi wusuakhogo loagen yagaisoageluk hilingiten. Haren enek nit o afuni Yehuda mene were'ma inom, it afuni Yerusalem mene were'ma inom, ninalong palogo welagen.

¹⁰ Oba nen he nineisena Tuhan Allah, yogondak he wene yi wene mondogat agaikhe mene andiba nen he niren ninggi'nogo ogo aplerek? Nit he Hat Hawene melalek,

¹¹ it hamingmingengge nabi omanogo bene nen wo'nisegen mene omanogo herak fogosik hilingitu welagoma o. Kweang nit welagoba andi faget he iren yaganisikhi logolik, afuni mondogat unggut fena nen fenaba werek mene andoma weak mondok mene hilingitik, nalek falek mene nek hilingitik, hilingitunem he kweang andi pugun sek lego, iluk yaganisikhi lagaikha.

¹² Niren afuni andoma mene ninom wok-wok agik, hilingitu mene faget inom, it afuni andoma inenggi werek hilingfisugunem it inebe fini-fanorogo logouwageluk it nabi andoma nen ili wanhi lagaukwa. A'nogo yaganisikhi logolik he, hit ambi ninane hologo hilingitu halok he, hit hinebe hinomame mene aga logolik, hiren he hinanggweang andi meneba nen enggen ugu palogo ninggik, hinenggi andoma mondok-mondok hit hinagainafuri inoba hinaminingengge hakhogo pelak hisigik, hilingiti logogun, iluk yaganisikhi lagaukwa.

¹³ Nineisena Allah, niren Hat Hawene melalek a'nogo sagalogo herakfuluk hilingiti logolik, nit mondogat weak hilingitunem, Haren wene ninoba fegen. Oba nen he nineisena, wene ninoba fegen mene andi re niren wanu aple andi re mondok hogoenggin oba nen he we horok serogo ninoba fegendigen nit ninagap telogo ninobagegen mene andi ninelurek.

¹⁴ Arigini'mo re niren Hat Hawene melalek a'nogo herakfuluk taganhogo hilingiti logolik afuni inobabut weak mene andi re ninggi'nogo woginafo aplerek? Niren nekhe aple a'nogo nek hilingisugun halok he, eberogo Hat mondok ha'mage lagaluk ap misik iluk ogo ekhe eluk figi'lek mondok alpisanghogo ninoaten aplerek.

¹⁵ Afuni Israel mene ineisena Tuhan Allah, nineisena Hat he mondok katukhogo nek hilingiti lagen mene, oba nen hilingik kwelek nit nineluk logouwageluk ninobagegen. Afuni ninaweak hilingik kwelek he nit Hat helokhoma we'luk u aple re elo'lek oba nen, nit Hat hambit ninaweak fagesi waga lago, neisena,” iluk samban igi.