EZRA 8 - Allah Wene Fano Wene Hupla Inane

It afuni hele warek welagaukwaba omanogo nen at Ezra inom inambotkwe inaiba wagaukwa mene a'nogo

¹ At hun Artahsasta ebe raja logolik melalinafi lagaikhe huli, afuni attak o Babel huginabi lagaukwa mene omanogo an Ezra ninom seberogo o Yerusalem wagagu mene inogogwi inunggulenu lombok kepala welagaukwa mene a'nogo inenu palek he yi:

^2-14 Inunggulenu Penehas mene re Gersom Inunggulenu Itamar mene re Daniel Inunggulenu Daud oba mene re Sekhanya amlogo Hatus Inunggulenu Paros oba mene re Zakharia inom at unggulenu mene nen ap mene nek inebe 150 nen inom. (It inebe ta'larik wagaukwa mene faget he palek werek). Inunggulenu Pahat-Moab mene nen he Elyoenai hun Zerahya amlogo a'nogo inom ap mene nek inebe 200 nen inom. Inunggulenu Zatu oba mene re Zekhanya Yahaziel amlogo a'nogo inom ap mene nek inebe 300 nen inom Inunggulenu Adin mene nen he Ebed Yonatan amlogo a'nogo ap mene nek inebe 50 nen inom Inunggulenu Elam mene nen he Yesaya Atalya amlogo a'nogo inom ap mene nek inebe 70 nen Inunggulenu Sefaca oba mene re Zebaja Mikhael amlogo a'nogo inom, ap mene nek inebe 80 nen inom, Inunggulenu Yoab oba mene re Obaja Yehiel amlogo a'nogo inom ap mene nek inebe 218 nen, Inunggulenu Bani mene nen he Selomit Yosifya amlogo a'nogo inom, ap mene nek inebe 160 nen inom Inunggulenu Bebai oba mene re Zakharia Bebai amlogo a'nogo inom ap mene nek inebe 28 nen inom Inunggulenu Azgad oba mene re Yohanan Hakatan amlogo a'nogo inom, ap mene nek inebe 110 nen inom Inunggulenu Adonikam mene nen he Elifelet, Yehiel, Semaya inom ap, mene nek inebe 60 nen inom (It he fem hobuk wagaukwa.) Inunggulenu Bigwai oba mene re Utai inom Zabud inom, abenek inebe 70 nen inom wagaukwa.

It ap Lewi mene a'nogo o Tuhan Awi wuri'mo Yabu hilingiti logouwageluk Ezra nen andogerinafikhe wene

¹⁵ Ap inebe esa logalek andi re I o kota Ahawa ba kwelabi lagu agai a'nogo esanggoma andoma kaboget fisigirik he, andoma o sabu wurogo ninenggi henagan welago. Logolik he an nen neilenggen kwelagisilik lagunemen he it inanggelekwe omanogo ap imam-imam we misik-misik ekhe welagaukwaba nen he, it inunggulenu Lewi mene a'nogo nek he misik iluk ogo welagaikha mondok lek.

¹⁶ A'nogo hilingik aple nen he, an nen it afuni inogogwi melalinafu inap omanogo inebe sogo nen woginafi mene inenu re yi: Eliezer, Ariel, Semaya, Elnatan, Yarib, Elnatan, Natan, Zakharia, Mesulam, inom andi nen it guru inebe pire mene, Yoyarib inom Elnatan inom woginafi.

¹⁷ Woginafirik kabogerinafirik he it a'nogo hun Ido afuni holhu mene faget kepala o Kasifya welagaikhe mene a'nogoba lagarik, at Ido inom, agaila'lak inom o Tuhan Awi wuri'mo yabu hilingituba andoma nen ap fenakwe Tuhan Awiba Yabu hilingitu mene faget lakninobagai wesuakhogo ambit lani, iluk lakfisigi.

¹⁸ A'nogo lakfisigimo re, nit nineisena Allah obabut fano nen he ap Lewi mene misik ekhe enu hun Serebya mondok obabut hebelek agun unggulenu Mahli mene a'nogo lak ninobagai waga. Wagunem andi re at inom amlogomi inom, agaila'lak inom inebe 18 nen mene wagaikha.

¹⁹ Hasabya inom, Yesaya inom, it inunggulenu Merari mene a'nogo nen inagoromi inebe 20 nen inom nit ninambit lakfisa wagaukwaat.

²⁰ It andi werek kwelek he it ap Tuhan Ailoba yabu hilingiti logogun mene inebe 220 nen inenu palek welagaikhe mene, it inambu-inomba lak he at raja Daud inom, it ap yabu kerajaan oba andoma lego mene hilingiti lagaukwa inap omanogo inom, it andi re Lewi inap leberisikhi logogun iluk fisasukwa inap omanogo inom wagaikhaat.

It ap hele warogo huginabi lagaukwa inap omanogo sumburu ninggi'lek logolik samban ugu welagaukwa wene

²¹ It a'nogo wagaikha ma re I Ahawa esanggoma aremnogo nen wene menfikhi logolik he, nit ebekhalem lagunem nineisena Allah nen, nit ninebe inom, ninagainafuri inom, fanorogo tegelogo wo'ninarek loakhogo re, niren sumburu ninggi'lek logolik, ninebe ninendawinggen sebel fakhaluk logouwogo, iluk nane meneti.

²² An nen at raja ba ikhi logolik he, ”Nit nineisena Allah andi nen he afuni At oba tiphogo hilingiri'lagwi lek mene abit inoba fuluk unggum wogisigik, nen afuni At oba eberek logolik At obaget enek hilingitu mene re fanoet fisigik, ikherek,” iluk yagatimo re, nit kweba lagunem ap tentara kuda amboloba lagaluk lagaikharek mene omanogo nit ninalong palogo wo'ninarek loakhogo iluk raja ba kino ugu aplere mondok nendawinggen enggin nafikhe.

²³ Andiba re nit a'nogo At Allah nen enek kagalninarek logouwageluk sumburu ninggi'lek welagik, samban ugu welagik, ogoma re, niren samban ogo mene a'nogo onggo higithogo hilingninobagaikhe.

O Tuhan Awi a'nogo faget iluk yi mene ti mene kabogetukwa mene omanogo it imam inenggimo fesukwa wene

²⁴ It ap imam omanogo mene inebe elokhoma mene nek ap inebe nesanggo nen mene inenu re, Serebya inom, Hasabya inom inagaila'lak fena inebe nomolo nen inom heragaisogo fisigi.

²⁵ It a'nogo heragaisogo fisigirik he at raja inom, at ebe komo wene yagati lagaukwa mene inom, it ap hokho-hokho inap omanogo inom, it afuni Israel mene inom, yi mene ti mene emas inom, perak inom, o Tuhan Ailoba nen hilingitungge iluk kabogetukwa mene omanogo an nen it inobaget enggin walhigi. Walhogore abirengge a'nogo it ap imam omanogo inoba fesukwa.

^26-27 Nen yi mene ti mene kabogetukwa mene andoma ebe enu palek he yi: Perak enggin he – 22 ton perak meneba ebe 100 nen wurik mene andi enggin he – 70 kilogram Emas re enggin – 3.400 kilogram, mangkuk emas mene 20 nen mene re – 8,4 kilogram mangkuk perunggu mene mondok fano mene ebe pire mene onggo re emas onggo palhi lagaukwa hakhogo hilingik mene inom kabogetukwa.

²⁸ An nen it ap imam omanogo inoba ikhi logolik he, ”Hit he hineisena Tuhan Allah it ninombawi nen fogerati lagaukwa mene a'nogo faget amu enogo hinobagogo andi hakhogo re, yi mene ti mene emas, perak inom afuni nen andogota mene andoma ogore amu enogo Tuhan obaget logouwak.

²⁹ Yi mene ti mene andoma re mondok fanorogo nek halogo waluk he o Tuhan Awi wuri'mo omanogo asi laluk andoma nen nekhengge enggin walhaluk he it ap imam kepala werek mene inom, it Lewi inap inogogwi melalinafu mene inom, it afuni Israel mene o Yerusalem werek mene faget inogogwi kepala werek mene omanogo inom inenggimo fogoin,” iluk yagaisigi.

³⁰ A'nogo yagaisigimo re it ap imam inom, it Lewi inap inom, a'nogo nen perak, emas inom omanogo o Yerusalem Tuhan Awi wuri'mo a'nogo waluk wagaukwa.

O Yerusalem asi wagaukwa wene

³¹ Arigin fuluk he nit a'nogo o Yerusalem logoin iluk he, tugi attak meneba werek kwelek tanggal 12 oba re i Ahawa a'nogo herakfuluk wulibi lagagu. Wulibi wagagusik kweba andoma wagunem afuni nen kwe palninabi we'luk ninoasi nogo iluk At Allah nen ninalong palogo wo'ninarek wagaikhe.

³² A'nogo wo'ninarek wagu kwelek wagagusik he o Yerusalem kwi wagosik set ninenggi henagan warogo.

³³ A'nogo warogosigen he ninenggi enggaminogonek oba nek he nit ninebe o Tuhan Awi wuri'mo omanogo lagosik he, niren yi mene ti mene emas, perak inom, omanogo enggin walhigik fogo. Enggin walhogo re niren it hun Eleazar Penehas amlogo a'nogo inom, it ap Lewi inap inebe pire mene inenure, Yozabad hun Yosua amlogo a'nogo inom, Noaja hun Binui amlogo a'nogo inom, ineil werek kwelek he imam Meremot hun Uria amlogo a'nogo wogeto.

³⁴ Yi mene ti mene a'nogo abirengge engin walhogo wenatosik he mondok higithogo nek lisu palogo fogo.

³⁵ Linggene a'nogo sambul enek he it afuni hele warogo fisa lagaukwa ma nen wagaukwa mene omanogo inebe mondogaren, Tuhan Allah afuni Israel mene ineisena a'nogoba wam Tuhan endawimo agaiyek hoageluk mene warogo noletukwa. Andi sambul wam watukwa mene it afuni Israel mene inebe lambulogo faget he sapi ai mene 12 nen inom, domba eagwi 77 nen inom watukwa. Andi nen fena re nit ninonggwarek faget ninaweak lek hilingisogo ninobagauwageluk Tuhan kino yagati logolik faget iluk he, wam kambing 12 nen watugusik he, mondogat warogo re Tuhan obaget iluk nolhugu.

³⁶ A'nogo hilingfogosik he, at raja nen lisu palogo it wogisasikhe mene a'nogo re iren ap o Propinsi Efrat barat oba welagaukwa mene gubernur inom, it yabu legoma hilingiri'lagwi mene omanogo inom, inoba yagaisikhe. Yaisikhemo re it ap yabu legoma hilingiri'lagwi inap omanogo nen he it afuni a'nogo TUHAN Awi wuri'mo omanogo kabogetu logouwageluk yi mene ti mene leberisaga andi.