EZRA 7 - Allah Wene Fano Wene Hupla Inane

Ezra o Yerusalem kwi wagaikhe wene

¹ A'nogo hilingiti lagaukwasik oba nen, tahun ekhe hokhorogo welagaukwasik, afuni o Persia mene inoe raja ekhe enu Artahsasta kain logolik ferinarek welagaikhe andem oba, ap ekhe ebe Imam Agung Harun nen tagoma mene, enu Ezra andi welagaikhe. Ezra ta'lagaikheba nen wurep fikhiren ero fikhit wenarik wagaukwa mene re, yi'nogo: Ezra andi re, Seraya amlogo. Seraya re, Azarya amlogo. Azarya re, Hilkia amlogo. Hilkia re, Salum amlogo.

² Salum he, Zadok amlogo. Zadok he, Ahitub amlogo.

³ Ahitub he, Amarya amlogo. Amarya re, Azarya amlogo. Asarya re, Merayot amlogo. Merayot he, Zerahya amlogo.

⁴ Zerahya re, Uzi amlogo. Uzi re, Buki amlogo. Buki re, Abisua amlogo.

⁵ Abisua re, Pinehas amlogo. Pinehas re, Eleazar amlogo. Eleazar he, Harun amlogo. Nen at Harun andi re, Imam Agung welagaikhe mene a'nogo.

^6-7 Ma re, ap Ezra andi sekolah mondok yanggulhikhesik eluatma re, wene at nineisena Allah Israel mene nen komotninafikhe wene a'nogo, at Musa yagatikhemo, lisu palhikhe mene omanogo mondogat elu mondok welagaikhe. A'nogo were'ma, at nineisena Tuhan nen Ezra ebe fanotfikhi lagaikhe andiba, at Ezra nen raja Artahsasta ba yi mene ti mene legen kino yagatunem ane hologoat wogoti lagaikhe. A'nogo wogeti lagaikhe andi re, at Artahsasta ebe raja menlagaikhesik logolik tahun 7 meneba were'ma, at Ezra inom, imam mene ekhe inom, afuni Lewi mene ekhe inom, wuni watu inelu mene inom, Allah awi wuri'mo kwe ambe palek oba kagelek logogun mene inom, nen yabu Allah awi wuri'mo hilingiti logogun mene inom, mondogat inagoromi inom inebe misik lambukhogo re, o Babel en Yerusalem wesuogeluk woginarek wagaikhe.

^8-9 A'nogo woginarek wagaikhe andi re, tanggal 1 bulan 1 oba were'ma o Babel en wulibi wagaukwasik Allah nen leberisugu kwelek wagaukwa-wagaukwa re tanggal 1 tugi 5 meneba o Yerusalem kwi wagaukwa.

¹⁰ At Ezra a'nogo re Tuhan Allah awene melalek a'nogoba fi-furogo kumuthigik, wene melalek a'nogo ebe hilingitik, yi'nogo ti'nogo hilingi'no iluk werek mene omanogo afuni inunggulenu Israel mene a'nogo yagaisigik ikhi logogin iluk endawinggen ma nen we misik tukumet fuluk furogo hilingiti lagaikhe.

Surat raja Artahsasta nen Ezra wogetikhe wene

¹¹ At raja Artahsasta nen surat enegengge palogo hun Ezra ebe imam logolik, wene melalek faget mondok elu-pelurek agun welagaikhe mene a'nogoba wogotikhe mene a'nogo ebere yi,

¹² ”An raja nenu Artahsasta nen he, hat imam Ezra Allah Pogoroba along welagarek mene awene melalek helu-pelurek hagun a'nogo surat yi palheti lagi:

^13-14 ”An ninom, an nagoromi komotnafarek mene inebe 7 nen mene omanogo ninomenat, hat o kota Yerusalem inom Yehuda inom oba andoma laluk, it afuni andoma wene Allah nen komorinafikhe wene hat hoba fesikhe mene andi higithogo hilingiri'lagwi a? Lega, iluk isa lanogeluk yogondak an nen wene ikhi logolik he, mel ikhi lagi. It afuni Israel mene o an nen ferinarek welagirek oba yoma yi awi ti awi welagaikharek mene mondogat, it imam-imam mene mondogat inom, afuni Lewi mene inom, it ekhe inom, inendawimo nen he, O Yerusalem lelo e, iluk, anggili'lagwi mene halok, haren woginarek lano.

¹⁵ Ma re, hat waluk lagain mene faget he, an nagoromi komotnafarek mene omanogo ninomen emas inom perak inom, Allah hit Israel mene hineisena o Yerusalem welagarek mene andi faget ninendawinggen oba nen fisogo mene yi waluk lano o.

¹⁶ Nen, ekhe re, hun haren emas inom, perak inom, afuni o Babel mene were'ma yoma nen andorasigin mene andoma inom, it afuni inunggulenu Israel mene nen inom, it imam-imam en inom, it ineisena Tuhan Allah Awi o Yerusalem a'nogo faget andogota mene andoma inom, mondogat helaluk lan o.

¹⁷ Nen, uang andem oba re hendawi wenggelogo, sapi ai mene inom, domba ai mene inom, domba eak mene inom, gandum inom, anggur enggen amusu inom, wanimbik he, mondogat o Yerusalem hineisena Allah Awi wuri'mo at faget noletarek oba andoma, nole'no o.

¹⁸ Meneat he, perak inom, emas inom, fena tindelaga mene halok he, hat hagaila'lak hinomen helogoin anggogoin mene halok, hit hineisena Allah endawimo anggikhe higithogoat helano o.

¹⁹ Ma re, yi mene ti mene Allah Awi wuri'mo at faget hilingiti logouwagaluk wokheta mene andi, o Yerusalem waluk laluk he, Allah Allah faget fisano.

²⁰ Nen, yi mene ti mene hineisena Allah Awi andi faget hilingisugun mene hinelokhoma lek agu halok he, an nagoromi nen uang kas pemerintah ba werek mene andoma mene wokhisikhi logouwageluk yagaisugu nogo.

²¹ Nen, hit o propinsi Efrat barat fikhit welagep mene nen uang kerajaan mene halhi lagep mene omanogo hinoba yagahisikhi lagi andi. Ap Ezra Allah Pogoroba mene awene melalek mondok elu-pelu agun andi nen yi mene ti mene kino yagahisugu halok he, weak-weakhogo nek wogeti logoino;

²² At wogeti logogun mene andi yi huliba wogeti logoino. Perak halok he, 3.400 kilo nen, gandum halok he, 10.000 kilo nen, anggur enggen amusu halok he, 2.000 liter en, minyak zaitun enggen amusu halok he, 2.000 liter en, mayu halok he, aren kino igin higithogo wogoti logoino.

²³ Allah nen a'mage an noba figik, an nombo'ne menlasimbik melalinafi logogun mene inoba figik, hilingiti logoinogo re, it Israel mene ineisena Allah pogoroba mene nen at awi wuri'mo hilingiti logogun mene faget, kino yagahisikhi logogin mene higithogo nek wogeti logoino.

²⁴ A'nogo hilingiti logolik, hiren uang pemerintah faget kinorogo wanhi logolik, it ap imam inom, Lewi mene inom, Wuniba Allah fogerati lagep mene inom, Allah awi wuri'mo kwe ambe pale'ma kagalek welagep mene inom, Allah awi wuri'mo yabu hilingiti lagep mene inom, nen it afuni ekhe Allah awi andi faget hilingitarek mene inom, it andoma inoba kino yagaisogoin mondok lego, iluk yagaisigi.

²⁵ Nen, hat Ezra nagailak. Wene yi ekhe yagahesik. Allah nen hendawinggen kagalek mondok logouwagaluk wokhete mene andibaat hilingiti logoino o. A'nogo hilingiti logolik, it afuni o propinsi barat fikhit werek mene andoma inoba wene hineisena Allah nen komothinafikhe wene andi hologo higithogo hilingiri'lagwi mene halok inebe mondogat, inogogwi kaindegen ferinarek logouwagaluk menfisigik, it ap ekhe nen it ekhe wene inoba figik kotik ikhi logouwageluk menfisigik, ilik lano o. Nen, haren it ekhe wene andi inonggot mene mondogat yagaisilik lano aro.

²⁶ A'nogo yagati logolik he, it afuni hat heisena Allah Awene melalek inom, o kerajaan faget inom, hologo hilingiri'lagwi lek mene inom he, wene inoba fuluk weak-weagat inebe inoasugun a, athe, huginabi logoin hea, athe, inangge yi mene ti mene felelenghogo helogoin a, athe, o inenggi hele warogo fisagarek oba andoma kwelakfisigik, ikhi logoino o,” iluk surat palogo wogetikhe.

Ezra nen Allah fogeratikhe wene

²⁷ Surat a'nogo palogo wogetikhemo re, at Ezra nen ikhi logolik mel isikhe: ”Tuhan Allah nit ninombawi nen fogerati lagaukwa mene a'nogo o Yerusalem At onggwarek awi a'nogo haluageluk raja endawimo kagalhemo, eil wo'ninafe andi nen At ebe fogerasuogo.

²⁸ At Allah nen lebetniikhe andi nen, at raja Artahsasta inom, agoromi, komori'lagwi mene inom, agoromi kaindek-kaindek omanogo inomen inendawit nafa andi nen he, an nendawimo nen, Allah enggi fetnarek werek higi, iluk, an nendawinggen se arik nailo lekhogo afuni Israel mene ineisok erokwe lombok inogogwi kepala omanogo woginarek o Yerusalem wagagi o,” iluk Allah fogeratikhe.