EZRA 6 - Allah Wene Fano Wene Hupla Inane

Kores nen, wene melalek wulafikhe mene a'nogo surat attak mene omanogo anggele'ma were'ma heratukwa wene

¹ Niren surat a'nogo lakfesugumo re, inoe raja Darius nen he, agoromi inoba yi'nogo yagaisasikhe: ”Wene andi faget wulafi logolik, arsip attak mene o kerajaan andi faget fikhi lagaukwaba anggelekwe o Babel fisogo welagaukwa mene omanogoba herasuageluk yagaisasikhe.

² Oba nen he, wene andi faget palogo fesukwa mene a'nogo re o Babel andoma welagaikhe lek, athe, o Media kota Ahmeta ba andoma were'ma heratukwa. Lisu palegengge andi ebe re suesingga uan meneba yinggiligengge ane yi'nogo palek welagaikhe,

³ ”At Kores inoe raja menlagaikhesik oba nen, tahun attak-attak ferinarek welagaikhe andiba, wene wulafi logolik he, O Tuhan Aiba Yerusalem a'nogo afuni nen yi mene ti mene waluk o andi we'luk Allah faget fisigik, noletik, ikhi logouwageluk mezbah ilirengge yi'nogo walhogo wusugun. O andi liabek uanhogo wurik lagagun mene re ilirengge 27 meter oba fei lagagun. Nen, aleget nunggulik he, 27 meter en at.

⁴ Nen o andi hobat he yi'nogo wusugun. Helep sap henagan fembik he amboloba re e mene sap misik fuluk wusugun. Nen o wusugun mene andi mondogat he, onggo uang kas kerajaan andi meneba waganogo wusugun.

⁵ Nen, ekhe re, yi mene ti mene emas perak meneba hilingik mene Allah awi wuri'mo o Yerusalem were'ma, ap raja Nebukadnezar en hogougeraluk o Babel fei wagaikhe mene andoma ogore, hobuk ambotkwe obali'mo welagaikheba andoma fei logoin o,” iluk palek were'ma heratukwa.

O Wusugun mene a'nogo palfigi'lek hilingirik loageluk Darius nen, yagaisasikhe wene

^6-7 A'nogo heratukwama, at Darius en wene a'nogo onggo lisu palogo lakfei waga logolik he yi'nogo isikhe: ”Hat Tatnai gubernur o propinsi i Efrat aik iliba mo ubukhogo kwi lagarek higit andoma ferinarek welagen mene inom, hat ap kain Syetar-Boznai inom, hinagaila'lak kaindek fena andoma welagep mene inom, wene heinok wanhep mene a'nogo, onggo hinoba lakfei wagi yi. Hiren afuni Yahudi mene nen o ineisena Tuhan Allah Awi wutunem andi re menggelinabi la fuk. Andi nen he, it gubernur o propinsi Yehuda mene inom, nen it Yahudi mene inogogwi kaindek inom, ineisena Tuhan Awi wurik welagaikheba andoma hobuk wusuageluk hineil feino o.

⁸ Andi nen he, nagaila'lak. An wene ekhe yi yagahisak. Iren ineisena Tuhan Allah Awi wuri'lagwi andi faget, hiren yi'nogo leberisikhi logoino. O andi wusuageluk uang mondogat he it afuni Propinsi Efrat mo ubuk ikherek fikhit mene nen kweang onggo iluk negara faget fugu mene andoma mene waganogo re, it afuni andoma inoba aninurogo fakfuluk welagi'lek, weak-weak wogisikhi logoino.

⁹ A'nogo wogisikhi logolik he, it ap imam o Yerusalem mene andoma nen nit he ti mene elo'lek welago andi iluk sapi ai mene ebe oan mene inom, domba ai mene ebe oan mene inom, domba eak mene inom, warogo ineisena Allah pogoroba mene a'nogo faget nolesugun mene inom, gandum enggen inom, mayu inom, anggur enggen amusu inom, zaitun enggen amusu inom, andoma mondogat hinenggi ekhe kamo igi'lek hundik-hundik wogisikhi logoino.

¹⁰ Iren ineisena Allah pogoroba mene a'nogo endawimo fanorogo warogo wogotik, an nobaget inom, an nagainafuri inobaget inom fanoabet ninobagauwageluk ayonggo figik, ikhi logouwagaluk an nen yagahisigi mene yi higithogo wogisikhi logoino.

¹¹ An nen, yi'nogo wogisikhi logoino, iluk wene yagahisigi mene andi sa nen esanggo hologo hilingite lek halok he, at andi awi ebe werek oba andi mene langoak misik ekhe henogo waluk he enggat merenghogo kabelogo at onggwarek ebe agaukwe tiaganhogo wa'no. A'nogo watfuluk he, at awi ebe werek oba andi re meisalogo potfisugunem he ologoilong engge obalik he andoma hugesi laga logogun o.

¹² It afuni inogogwi inenupogot inebe lombogen inom, afuni inunggulenu lombogen inom, an Darius nen, Yi'nogo hilingisugun, iluk yagahisigi mene andi hologo hilingiti'lek, sagalogo herakfisaluk, Allah awi andi meisalogo weaget fouwogeluk ugu halok, Allah o Yerusalem at fogerati logouwageluk wenagaisogo fakhasikhe mene andi nen inebe mondok legetfisoago. An Darius nen wene yagahisigi andi an nane hologo fanorogoat hilingi'no o,” iluk wene onggo inoba lakfei wagaikhe.

Allah awi a'nogo inane horogo kwe hutukwa wene

¹³ Wene onggo a'nogo lakfei wagaikhemo, at raja Darius nen melalfesikhe mene a'nogo re at Tatnai gubernur o Efrat barat oba welagaikhe agun a'nogo inom, Syetar-Boznai a'nogo inom, inagaila'lak ekhe inomen he, wene inoe kain Darius nen yagaisasikhe mene a'nogo higithogo nek hilingitukwa.

¹⁴ A'nogo hilingitu kwelek, it ap Allah ane yagaisikhi lagaukwa mene Ido amlogo enu Zakaria inom, nen, ap enu Hagai inomen, ”Wu'ni o,” iluk inendawinggen ago watu kwelek, it afuni Yahudi mene inogogwi kaindek omanogo nen o ebe wutukwa. O weak-weagat wutukwa andi re, wene it afuni Israel mene ineisena Allah a'nogo nen, ”Yi'nogo wu'no,” iluk isikhesik oba nen, it afuni o Persia mene inogogwi raja Kores nen inom, Darius nen inom, Artahsasta nen inom, yagaisasukwa higithogoat o a'nogo mondogat eil hondologo wutukwa andi.

¹⁵ O Tuhan Awi a'nogo mondogat wutukwa andi re, at Darius raja menlagaikhesik ferinarek logolik tahun 6 meneba were'ma, tugi it afuni Israel mene nen inenggi wenati logolik enu Adar ikhi lagaukwa mene andi, tanggal 3 ba re elugun warogo wutukwa.

¹⁶ A'nogo wutukwasik he, it afuni Israel mene it ap Allah eisewerek mene inom, afuni Lewi mene inom, it fena mondogat o Babel lakfisasukwama welagaukwasik wagaukwa mene omanogo inom, o Tuhan Awi a'nogo inendawimo inagaiyegeti logolik inane horogo kwe hutukwa.

¹⁷ Iren o andi kwe huti logolik andi re, wam sapi ai mene re 100 nen inom, domba ai mene re 200 nen inom, domba eagwi mene re 400 nen inom, Allah waretukwa. A'nogo waretukwasik, it afuni Israel mene inaweak leget fisoageluk mene faget, inunggulenu 12 nen mene aremnogo higithogo, wam kambing ai mene ebe misiktek higik, lambukhogo re 12 nen mene waretukwa.

¹⁸ A'nogo hilingitukwasigen he, wene Musa nen lisu palogo fesikhe mene a'nogo higithogo, it ap o Tuhan Awi wuri'mo yabu hilingiti logogun mene inebe faget he, it ap imam logolik yabu hilingiti logogun mene inom, it ap Lewi inap omanogo inom ineabu hilingik higithogo nek fisilik lagaikhe.

Paskah seni isatukwa wene

¹⁹ A'nogo hilingitukwasik, tahun andi welagaukwasigen he, tahun ekhe ombo'ne meneba, tugi it afuni Israel mene inenggi wenati logolik attak wenati lagaukwa mene andiba, tanggal 14 oba re, it afuni o Babel andoma huginabi lagaukwama welagaukwasik wagaukwa mene omanogo inebe mondogat Paskah seni a'nogo isatukwa.

²⁰ Paskah seni andi nouwogeluk he, ap imam omanogo inom, Lewi inap omanogo inom he, inebene horogo hilingfakhasukwasik he, inoba fano horek mene nek welagaukwa. Andi nen he it ap Lewi inap a'nogo nen he wam Paskah seni andi faget inom, imam mene faget inom, it inonggwarek faget mene inom, it afuni hele warogo huginabi lagaukwaba nen wagaukwa mene omanogo faget inom, watukwa.

²¹ A'nogo watukwasik he wam omanogo re it afuni Israel mene mondogat wam domba warogo pesta paskah hele warogo woginarek lagaukwa mene inambotkwe inaiba wagaukwa mene omanogo inom, it afuni o andoma welagaukwa meneba nen he, iren weak mene nek hilingitu welago mene oma herakfuluk, it afuni Israel mene ineisena Tuhan Allah a'nogoba nek kabogeti logogun iluk wagaukwa mene omanogo inomat nasukwa.

²² Pesta andi hilingiti logolik andi re, Allah nen afuni Asyur mene inoe raja a'nogo endawimo kagalhikhemo, at obabut fano nen afuni Israel mene ineisena Tuhan Allah Awi a'nogo wusuageluk leberisasikhe andi nen, it inendawimo inagaiyegetu inenggi 7 hari logolik Linggene Sumburu Roti fiterek mene inom werago legengge nunggu welagaukwa.