EZRA 5 - Allah Wene Fano Wene Hupla Inane

¹ Andem sambul he ap nabi inebe pire mene hun Hagai inom Zakharia Ido amlogo a'nogo inom aremnogo Allah wene it afuni Israel mene ineisena Allah enuba afuni Yahudi mene o Yehuda ba werek mene inom, o Yerusalem oba werek mene inom, inoba wene yagaisikhi lagaukwa.

² A'nogo yagaisugu were'ma re, it ap nabi pire aremnogo nen ugu mene a'nogo holhukwasik he, hun Sealtiel amlogo Zerubabel inom, Yozadak amlogo Yesua inom he, o Tuhan Awi Yerusalem nekhengge fakfesukwasik wutunem it ap nabi pire andem nen leberisikhi lagaukwa.

³ Oba nen he at Gubernur Tatnai o propinsi Efrat barat fikhit a'nogo inom, Syetar-Boznai inom, at agaila'lak inom weak-weak o Yerusalem wagaukwasik it afuni Yahudi mene omanogo heinok wogisikhi logolik he, ”Hit he sa nen yagahisikhemo O Wene kabogetuba ari wutik, elonggokwe oma fougeratik ikhi lagep?” iluk heinok wanhukwa.

⁴ Nen, iren ekhe inom heinok wogisikhi logolik he, ap o Tuhan Awi a'nogo wutunem leberisikhi lagaukwa mene omanogo inenu mondogat heinok wanhukwaat.

⁵ Oba nen he it afuni Yahudi mene inogogwi melalinafi lagaukwa mene aremnogo At Allah nen fut fisasikhesik he, inalong palogo ferinarek were'ma re it ap o Persia oba yabu hilingiti lagaukwa inap aremnogo nen he, at Darius oba surat lak fembik onggo oan yaganisigi'lek kwelek he niren ferekhogo hilingisugun lek iluk he wene a'nogo herakfesukwa.

⁶ Hilingik mene a'nogo faget iren at raja ba wene lak fesukwa mene re yi:

⁷ ”Dadius ninoe raja hebe kain mene, hat hebe hailo legengge logolik, melalinafu welagen ma, surat palogo hoba lakfei wago yi!

⁸ Nineisena harogo helu asuak, nit he o propinsi Yehuda a'nogoba lagosik kwelagisilik lagoma re, o Tuhan Allah Enu Hokho mene Awi a'nogo re, nekhengge obali'mo helep hokhondek meneba wutik, leget pa' leget omamenggeba saplit higik wutik, hilingitunem isaluk wago. Nen Yabu ebere mondok fakfagasigen fanorogo wutunem he, palfigik lek hundik-hundik hilingiri'lagwi o.

⁹ A'nogo hilingitunem he niren it afuni inunggulenu andi mene inogogwi kepala werek mene omanogo inoba heinok yi'nogo wogisogo, ”Hit he sa nen yagahisikhe mo o Wene kabogetuba ari ambotkwe wutik, nen elonggokwe fougeratik ikhi lagep nogo? Iluk yagaisogo.

¹⁰ Andi nen it ap yabu hilingitu mene faget kepala welagaikha mene andoma ogo heinok wanhosik he inenu lisu palogo ninoe hat yagahesugun nen iluk hilingito.

¹¹ A'nogo hilingito ma nen he, ”Iren onggo yaganisikhi logolik he, ’Nit he At Allah pogot inom kweang inom walhasikhe mene onggwarek agun a'nogo amingmingengge mene welago, tahun-tahun engge hilingiti lagagu mene omanogoba it afuni Israel mene faget raja mondok lego mene welagaikhe mene a'nogo nen o Tuhan Awi yi wutikhesik fik-foukhogo hilingfesikhe mene a'nogo niren nekhengge wuti lago yi.

¹² Oba nen he, nit ninambu-ninomba lagen he Allah At pogoroba along lego werek mene a'nogo a'mage kwelafi lagaukwama re, Aren it inebe hun Nebukadnezar raja Babel mene it Kasdim mene nen inambisangmangge mene andi enggi omameba wogetikhe. Wogetikhe mo re aren o a'nogo sebeli kwi wagaikhesik he o yi oba wolelenggen tagalogo hilingfuluk he, afuni nit ninunggulenu mene omanogo woginarek o Babel lagaikhe.

¹³ Andi nen he, o Babel oba andoma at Kores raja menlagasik he, aren melalinafi lagaba tahun attak mene a'nogoba wene melalek wulafi logolik he, O Tuhan Awi andi nekhengge wusi lani iluk yaganisikhe.

¹⁴ A'nogo hilingfuluk he yi mene ti mene emas inom perak inom, O Tuhan Awi wuri'mo hilingiti lagaukwa mene oba nen at Nebukadnezar o Yerusalem en waluk lagaikhesik o Babel kembu awi wuri'mo kwelabi lagaikhe mene omanogo ogo wulakfei wagasik wo'nisikhe. Yi mene ti mene andoma re at raja Kores nen he o Yehudaba yoma gubernur ekhe menfesukwa mene hun Sesbazar a'nogo enggim fikhe.

¹⁵ At raja nen yagati logolik he, ”Yi mene ti mene andoma re o Tuhan Awi Yerusalem a'nogo wutfembik he, obali'mo o Tuhan Awi wuri'mo elonggoma andoma fei kwino, iluk yagate.

¹⁶ A'nogo ikhemo re, at Sesbazar a'nogo o Yerusalem yoma wagasik he o Tuhan Awi ari faget helep ubule fei waga. A'nogo fei waga huli andi nen yogondak huli wutu mondok welagoba nen he, oan welagoat ari o,” iluk aga.

¹⁷ Arigini'mo re hun haren fano anggegen halok he, at raja Kores nen o Yerusalem oba andoma o Tuhan Awi andi nekhengge wusuageluk wene andi eberogo nenat melalogo wulafe mo nen a, lega? Iluk nilelu asuakhogore, wene yi wene ti wene faget attak lisu palhigik, kerajaan Babel oba fikhi lagaukwa mene omanogoba herasuakhogo yagaisanogen iluk niren, wene hoba fikhi lago yi. Andi nen he wene andi faget nineisena haren tekhogo igin mene andi re weak-weak yaganisano aro,” iluk lakfogo.