EZRA 4 - Allah Wene Fano Wene Hupla Inane

O Tuhan Awi wuti lagaukwa mene a'nogo aben kwe palhukwa wene

¹ It afuni Yehuda mene inom, Benyamin mene inom, inaselei mene omanogo inesanggo holhunemen he, ”It afuni hele warogo huginabi lagaukwa mene omanogo inambotkwe wagaikhasik he o afuni Israel mene ineisena Tuhan Allah awi a'nogo wuri'lagwi o, ugunem inesanggo holhukwa.

² Andiba re, iren hun Zerubabel inom, it afuni ineisok erokwe lombok omanogo faget kepala welagaukwa mene omanogo inom, inoba ikhi logolik he, ”Nit he hun Esar-Hadon raja Asyur mene a'nogo nen wo'ninarek o yoma wagaikhe huli nen engge, niren hundik-handik Allah oba wam warogo noleti lagoma re, ninagaila'lak hiren hilingiti lagep hakhogo, niren ogo ninom hit ninagaila'lak hineisena Allah andiba wene kabogeti logogun nen he, o Tuhan awi ari nit ninom wusuogen he fano ini o,” iluk yagaisasukwa.

³ Oba nen he, at Zerubabel inom, Yesua inom it kepala lombok welagaukwa mene omanogo inomen wene onggo ikhi logolik he, ”Nit he hun Kores raja Persiaba werek mene a'nogo nen wene melalek yaganisasikhe higithogo re, o andi re ninamu nen wusugun o. Nen, hiren lebetnisugu kwelek nit nineisena Tuhan Allah Awi andi wusugun he elo'lego,” iluk isukwa.

⁴ A'nogo isukwama re it afuni o attagen engge andoma welagaukwa mene omanogo nen he o wusuogeluk isukwa mene a'nogo legasuageluk he it afuni Yahudi were'ma omanogo youk kwelabi wagik, inaberali kwelaginafik, hilingiti lagaukwa.

⁵ It Yahudi mene nen yabu hilingisugun iluk wene melalhukwasik hilingiti lagaukwa mene a'nogo sugwi asuageluk he, it afuni omanogo nen he ap pemerintah Persiaba yabu lego mene logolik hilingitarek inap omanogo onggo palinabi laga lagaukwa. A'nogo hilingitu werek kwelek enek he at Kores raja welagaikhesik obali'mo Darius inoe raja menlagaikhe huliba asi lagaikhe.

O kota Yerusalem wuti lagaukwa mene a'nogo palfesukwa wene

⁶ At Ahasyweros raja menlagaikhesik ket melalinafi lagaikhe andem oba re it afuni Yerusalem mene inom, Yehuda mene inom, inaselei mene omanogo nen he surat ekhe wene warek mene a'nogo oak lolugun iluk lisu palhukwa.

⁷ Andi hakhogo re at Artahsasta o Persiaba Kaisar mendek logolik melalinafi lagaikheba ogo, it hun Bilsam inom, Mitredat inom, Tebeel inom it inagaila'lak fenakwe inom, en nekhe mene surat raja ba palhukwaat. Surat palhukwa andi re Aram inaneba palhukwa ma re pilingisuogeluk he it ekhe nen agam etu kwelek wenati lagaukwa.

^8-9 Ekhere it hun Gubernur Rehum inom, o Propinsi andi faget lisu palhi lagaikhe agun enu Simsai a'nogo inom, it inagaila'lak wene katukhogo pilingitarek inap hakim omanogo inom, it ap yabu o Persia andi a'ma logolik hilingitarek inap, o Erek, o Babel inom, Susan o Elam kweang oba welagaukwa mene omanogo nen inom,

¹⁰ it afuni inunggulenu amu mene at Asnapar Mondok Lego mene a'nogo nen mondok felelenginarek lagaikhesik o kota Samaria inom, o kota-kota i Efrat en mo ubuk ikherek fikhit Propinsi yi meneba logoni iluk yagaisasukwa inap omanogo nen inom, inane seberogo makfesukwasik he, surat ekhe o Yerusalem obabut hilingik mene faget palogo hun Artahsasta oba lak fesukwa.

¹¹ Surat andi ane re yi'nogo palek welagaikhe, ”Hun raja Artahsasta nineisena, it hamingmingengge o Efrat en fena mo ubuk ikherek fikhit welago mene a'nogo nen hai wathafi lago o.

¹² Wene yi re nineisena hat helurogo iluk yagaheti lago, it afuni Yahudi mene hun haren melalinafi lagen kwe wilayah amukwe omanogo herakfuluk o Yerusalem asi lagaikhasik logolik o kota mondok weak mene hun hat hane sagalogo nek hilingiterek mene a'nogo awi wusuogeluk hilingiri'lagwi. Leget pa'leget he iren mondogat wurogo kugun horoksek enggere, we yogondak arat elugun hunisuogeluk werego.

¹³ Nen, iren kota andi arat wuta halok inom nen leget pa'leget andi ogo mondogat hunita halok inom hea, it afuni andi nen kweang onggo fugu mene a'nogo ninabit iluk fei waga logogun lek logou hak, nen a'nogo hilingisumo nen he uang kerajaan yiba kwi weri'lago mene andi, endep asigin logou aplerek.

¹⁴ Nineisena, nit he haren hilingninobagakhi lagen mene re mondok hokhore'ma re, hat hebikhit maben agunem hugu aple andi re ninabiren wene andi lak fei wagonggere,

¹⁵ hun hat hombawi nen lisu palogo fikhi lagaukwa mene omanogoba kwelakhoageluk yagaisano o. Lisu ebe palogo werek mene andiba nen enek he, o kota Yerusalem inap andoma re o attak en engge inane mondok sagalhi logolik it raja inom, it o Propinsi ba inenu lego welagaukwa mene omanogo inom, hundik-handik weagerogo nek fikhi lagaukwa mene andi palek were'ma helu asigin o. Afuni o andiba werek mene andoma re melalinabu mene ogo mondok nonghong sek. Andiba re o kota andi mondok wolelenggenhogo lek agaikhe andi.

¹⁶ Ariginik enggere, niren anggikhi logolik he, iren ambi o kota andi nekhengge wutik, nen leget pa'leget omanogo mondogat menerik lagik, hilingisugun halok he, hun haren it afuni o Propinsi Efrat mo ubuk ikherek fikhit ferinarek welagen mene yi hobuk ferinarek logogin lek higi, iluk anggikhi lago o,” iluk lakfesukwa.

¹⁷ A'nogo lakfesukwama re at raja nen he onggo yi'nogo palogo lakfei wagaikhe, ”Hun Gubernur Rehum inom, hit propinsi andiba lisu palherek mene Simsai inom, hit hinagaila'lak fena o Samaria welagep mene inom, o kota-kota amu kwe propinsi Efrat barat fikhit welagep mene omanogo inom hai wathinafi o.

¹⁸ Nagaila'lak hiren surat palogo lak nobagai wagep mene andi re mondogat hebelhasik an neilhanem wenatama re arat higi o.

¹⁹ Higirik he, an nen miminginafi logolik he mondogat ero herasuageluk yagaisigi mo, heratunemen he, eberogo nenat it afuni Yerusalem mene andi re o endamen engge ap raja-raja mendek welagaukwa mene omanogo inalong werek mene a'nogo inendawimo sebel fisigik, afuni it mene andi re inebe hokhorogo nen inane oak sagalhik, wene weak mene kwelafik, hilingiti lagaukwa mene a'nogo weinam agama arat igi o.

²⁰ Attak andoma ap raja-raja mondok lego mene andoma mendek were'ma o propinsi Efrat barat fikhit mene a'nogo it inomame a'ma were'ma iren kweang onggo figik, it ina'ma welago iluk raja ba onggo fei lagik, hilingiti lagaukwa.

²¹ Arigini'mo re o kota andi nekhengge obali'mo wuti'lek werek kwelek enek an nen wene melalek amu mene ekhe wulabigin huli asigin enggere, it ap andi nen yabu hilingiri'lagwi mene andi herak fouwakhogo re wene melalogo wulak feino o.

²² An nebikhit hokhorogo mabenet lagi hanogo re, an nen hilingi'ni iluk melal hinobagagi mene yi re weak-weakhogo nek hilingi'no o!” iluk lakfei wagaikhe.

²³ At Artahsasta nen surat lakfesikhe mene a'nogo it Rehum inom, Simsai inom, it inagaila'lak omanogo inom, inoba pilingisogo yagaisasikhemo re, it ap a'nogo o Yerusalem lagaukwasik he, it afuni Yahudi mene nen o kota nekhengge wuti lagaukwa mene a'nogo inane nen ninghogo wusugun lek iluk kwe palhukwa.

O Tuhan Awi a'nogo wusuogeluk hobuk eroratukwa wene

²⁴ O Tuhan Awi wuti lagaukwa mene a'nogo kwe palhukwaba nen, ap inoe raja ket mene Darius it afuni Persia mene faget menlagaikhesik melalinafu werek kwelek enek he tahun pire hilinglagaikhe.