EZRA 3 - Allah Wene Fano Wene Hupla Inane

Yi mene ti mene Allah noleti logogun oba hobuk wutukwa wene

¹ It afuni Israel mene a'nogo wagaukwasik he, arat inaiba kota inombalak welagaukwa kwe lombok wagaukwa. Wagaukwasik, andoma logolik, tugi it inenggi wenati lagaukwa higithogo, 7 mene werek kwelek, tanggal 1 ba, it inebe mondogat o Yerusalem andogotukwa.

² Andogotukwasik logolik he, Yozadak amlogo, Yesua agaila'lak imam omanogo inom, Sealtiel amlogo, Zerubabel a'nogo agaila'lak inomat en, attagat at Allah amingmingengge Musa a'nogo nen, ”Nineisena Allah anggo warogo a'nogo noleti logoino,” iluk isikhesik lisu palhikhe higithogo noleti logouwogeluk, yi mene ti mene nineisena Allah Israel faget noleti logogun oba a'nogo, hobuk wutukwa.

³ Wutukwa andi, iren afuni o andoma mene inailo logolik meneat he, Tuhan Allah faget wam yi mene ti mene noleti logogun oba a'nogo attak wurik welagaikhebaat hobuk wutukwa andi. Wutukwasik he, hubet inom, hu'mokwe inom, wam yi mene ti mene, Allah faget noleti logogun mene arat eroratukwa.

⁴ A'nogo hilingiti logolik, iren ekhe re yi'nogo hilingiti lagaukwa. O attagat inombalak O Sabu Enggaba salhigik welagaukwa mene a'nogo inendawinggenma eberek logolik, pesta hilingisugun oba higit asi wagaikhemo re, hilingitukwa. A'nogo hilingiti logolik, o ebe lombogat, ”Yi sambul yi'nogo warogo nolesugun,” iluk wene palek werek higit hogoat warogo ineisena Allah faget noleti lagaukwa.

⁵ Nen, ekhe noleti lagaukwa re, Allah faget, Yi'nogo warogo noleti logogun, iluk wene palek werek higit hogoat warogo noleti logolik, Tugi Ket folelhu halok inom, inenggi ekheba ineisena Tuhan agaukhogo iluk noletarek oba asi wagu halok, ebe lombok inom, inanggo warogo noleti lagaukwaat. A'nogo noleti logolik oba loukhogo, yi mene ti mene inendawimo nen fanorogo Tuhan wogoti lagaukwa.

⁶ O Tuhan awi a'nogo ambotkwe wusuogeluk, oan seneti'lek logoligat he, it afuni Israel mene omanogo nen tugi it inenggi wenati lagaukwa higithogo, 7 meneba werek kwelek tanggal 1 ba nen, wam yi mene ti mene Allah faget noleti logogun mene a'nogo attak-attak erotukwa andi.

O Tuhan awi wusugun mene a'nogo erotukwa wene

⁷ Andi nen he, afuni Israel mene omanogo nen ap o helep oba afe halhigik wusugun mene omanogo inom, e meneba wusugun mene omanogo inom, inenggi onggo wogisikhi logouwogeluk, uang andogotukwa. A'nogo andogotukwasik, hobuk he, yi mene ti mene nunggu mene sumburu inom, anggur amusu inom, e zaitun enggen amusu inom, o Libanon andoma nen e wombi hangge enu cemara onggo oarogo i laut agum kwe nen o Yafo andoma lakfei wesuageluk, o kota Tirus inom, Sidon inom, lakfesukwa. A'nogo hilingitukwa andi re, ap kain Kores o Persia mene inoe raja nen, ”A'nogo hilingi'no,” iluk yagaisasikhemo hilingitukwa andi.

⁸ Afuni Israel mene Yerusalem wagaukwasik oba nen, 1 tahun welagaukwasigen tahun ekheba, tugi it Israel mene inenggi wenati lagaukwa higithogo 2 meneba werek kwelek, o Tuhan Awi meisalhukwa mene a'nogo hobuk ambotkwe wusuogeluk attak-attak fakfesukwa. Fakfesukwa re, Sealtiel amlogo Zerubabel inom, Yosadak amlogo Yesua inom, emberek inagaila'lak inunggulenu misigat mene inom, imam mene inom, afuni Lewi mene inom, it afuni ekhe Babel woginarek lagaukwama welagaukwasigen, hobuk wagaukwa mene omanogo inebe mondogaren o wusugun mene a'nogo eroratukwa. Eroratu kwelek, it afuni Lewi mene fena inebe umur huli 20 tahun ambolkwe mene nen ferinarek logouwageluk menfisilik lagaukwa.

⁹ It andi inebe re, at Yesua unggulenu Lewi mene andi againafuri inom, agaila'lak inom he, Kadmiel o Hodawya mene andi againafuri inom, it afuni inebe mondogat omanogo Allah awi a'nogo wutu kwelek ferinarek welagaukwa. Ferinarek were'ma, it ap Lewi mene ap Henadad en tagomangge mene nen leberisikhi lagaukwa.

¹⁰ It ap tukang omanogo nen Allah awi a'nogo wusuogeluk tik watunem a'nogo re, it imam-imam omanogo, inasu endakwe uan mene laberogo, inebe mondogat he, pinggong ane hokho mene a'nogo inenggim lombok wanhukwasik he inobalik lombok tegelik lagaukwa. A'nogo were'ma afuni inunggulenu Lewi mene ap Asaf en tagongge mene omanogo re andoma mendek logolik, abologet hugu mene magendek mene omanogo inebe lombok fisogo welagaukwaat. Fisogo logolik, attagat at Daud en, Wuni pinggong oba yi'nogo wati logogun, iluk isikhemo awene palek werek higithogoat, pinggong andi wati logolik, Tuhan fogeratukwa.

¹¹ A'nogo fogeratu kwelek, it afuni mondogat omanogo nen ineisena Tuhan fogeratu logolik wuni elugun warogo hobugalep agap sagalogo watu logolik, yi'nogo ikhi lagaukwa: ”Nineisena Tuhan andi re fano mondok logolik, nit afuni Israel mene ninoba endawi hundik ninafu mondok welagarego,” iluk wuni watunem, o Tuhan awi a'nogo wusuogeluk, o tik arat watukwa. A'nogo watukwa andi nen he, afuni omanogo mondogaren inendawimo inagaiyegen he a'mit sup igik, wuni watik, ikhi logolik, ineisena Tuhan fogeratukwa.

¹² A'nogo meneat he, ap inaluendek fena inebe hokhorogo omanogo inebe imam mene inom, afuni Lewi mene inom, it ekhe ineisugwi inebe arat yaman agaukwa mene inom, Allah awi attak wurik welagaikhe mene a'nogo ineilenggen hasukwasik inelure'ma nogo nen he, o hobuk Allah awi wusuogeluk tik watunem andi ineilenggen logolik he o attak mene oba ebethikhi logolik le inane mondok hokhorogo agaukwa. Meneat he, it afuni fena welagaukwa mene omanogo inendawimo inagaiyek hokhorogo hikhi logolik, inane hokhorogoat a'mit sup ikhi lagaukwa.

¹³ It ekhe inendawimo inagaiyek hikhi logolik a'mit sup ugu kwelek, it ekhe le agu kwelek, inane hokhorogo ugunem it afuni fena amu mene nen inesanggo ninggi'nogo holu heat hilinglaga lagaikhe. Inane a'nogo hokhorogo ikhi lagaukwa andi nen, afuni yat kwe nen inesanggo holhukwaat.