EZRA 10 - Allah Wene Fano Wene Hupla Inane

Hemi inom ap inom hesangge woginafu mene leget fogoin iluk hilingitukwa wene

¹ Andi iluk at Ezra a'nogo Tuhan Awiba elokhoma aremnogo nen inaweak fakhogo le aga logolik samban ugu kwelek he, it afuni Israel mene a'nogo inebe hokhorogo, ap inom, hemi inom yenggerugwi magendek mene inom, kabogesi wagaukwasik at ebe tulem haningisogo kwelakfesukwasik he inane kwi-kwerogo le agaukwa.

² A'nogo le agunem he at hun Yeiel unggulenu Elam mene amlogo Sekhanya a'nogo nen Ezra ba ikhi logolik he, ”Niren afuni inunggulenu endakwe mene ninom wok-wok aga lago andiba re Tuhan oba weak hilingito, oba nen he it afuni Israel mene faget he hilingisu mene ekhe werek.

³ Nit he haren komo wene yaganisagain mene inom, it Allah wene melalek yaganisugu mene a'nogo esinet fuluk hilingitu inaben inom, komotninabugun mene andoma niren higithogo nek hilingitik, At Allah nen wene melalek yi'nogo hilingi'no ti'nogo hilingi'no iluk werek mene a'nogo hologo hilingitik, hilingisugun en he, hemi andoma ineagwi inomat mugusogo wilaginabugun iluk Allah elokhoma nen hombuk paluok.

⁴ Nen wene andi re haren a'nogo hilingninabino, nit he hat hilingitunem lebetheogoin, engge re hele wat-wat mene hilinginabugun he fuk, we hat hane ninghogo ugunem enek legabesugun,” iluk yaganete.

⁵ A'nogo isikhemo re at Ezra nen it hemi endakwe mene omanogo ineagwi inom felelenghogo wulak fisagain iluk wene a'nogo erotesik aren it imam mene kepala inom, it Lewi inap inom, it afuni Israel mene nen fenakwe omanogo inom, inoba re at Sekhanya nen ikhe mene a'nogo hilingisugun iluk hombuk paluageluk, yagaisasigi.

⁶ A'nogo yagaisasigimo re, it a'nogo mondogat hombuk palhukwasik he at Ezra a'nogo Tuhan Aiba elokhoma omanogo nen lagaikhesik hun Elyasib amlogo Yohanan were'ma omanogo kwi lagaikhesik he, it afuni hele warogo huginabi lagaukwa mene omanogo nen hilingitukwa mene andi faget wenggelhi logolik he endawimo mondok weak agaikhemo re sumburu inom i inom ninggi'lek welagaikhe.

⁷ A'nogo hilingitikhesik he it afuni hele warogo huginabi lagaukwama nen inaiba wagaukwa mene omanogo o Yerusalem kabogesi wesuageluk he wene ekhe menfuluk lisu palogo it afuni Yerusalem mene inom Yehuda mene inom werek kwe omanogo lak fikhi logolik he,

⁸ linggene henagan arem oba nek ap misik ekhe wesigin lek mene andi re angge yi mene ti mene mondogat telaluk he at andi re afuni nit mene werek fuk anggogoin. Iluk he lisu palek a'nogo it holhu mene inogogwi melalinafarek inap omanogo nen enek it inenggi amusu cap fuluk lak fesukwa.

⁹ Tugi sogongge tanggal 20 ba, inenggi henagan welagaukwasik a'nogo re it abenek o it Benyamin mene werek kwe nen inom, it Yehuda mene werek kwe nen inom, o Yerusalem wagaukwasik he o Tuhan Awi lilu a'nogo kabogetukwa. Kabogetukwama nen he andem oba re o meiso mondok hokho mene nunggu kwelek a'luk he sogoi aigengge nen he afuni omanogo hom-hombuk falhi logolik wene andi mondok esin mene faget hiligimo a'luk he sebethikhi logolik welagaukwa.

¹⁰ A'nogo were'ma re at Ezra a'nogo menlagaikhesik he it inoba ane ikhi logolik he mel isikhe, ”Hiren hemi inunggulenu enda'ma mene woginafigip andiba re, weak mondok hilingitepma afuni Israel mene inoba weak ekhe inomat hilingfegep andi.

¹¹ Ariginik enggere At Tuhan Allah nit ninambu-ninombalagen apne wanhi lagaukwa mene a'nogoba hinaweak fakhogo herak fembik he, At endawimo agaiyek anggikherek mene nek hilingiti logolik he, it afuni endakwe mene nit ninanggweang yiba werek mene andoma hinom huniti lek logolik, hinagagwi inunggulenu endakwe mene woginafigip mene andoma re mugusogo wulak fisano,” iluk yagaisasikhe.

¹² A'nogo isikhemo re it afuni omanogo nen inane fanoba re, ”Nit he haren komotninafen mene andi hakhogo nek hilingisugun o,” iluk isukwa.

¹³ A'nogo isukwasigen iren ekhe inom ikhi logolik he, ”Oba nen he nit ninebe kabogesi wago mene yoma re mondok hokhorogo hilingi'mo, o meiso ogo mondok hokho meneat nunggunem nit ninebe meisoba enda'ma mendek logou elo'legat hilingninabi'lago yi. Nen ekhe re wene yi ninenggi misik pire meneba pilingisogo leget fou lek hak.

¹⁴ Enggere nit ninogogwi kaindek-kaindek enek he wene yi palhu re o Yerusalem yoma logouwak. Nen, nit he ninawi kota lombok ninagagwi enda'ma mene woginarek welago mene re linggene enogo fogoin higithogo, nit ninogogwi melalninabi'lagwi mene ninom, ninawi kota welago lombogen ap hakim wene katukhogo pali'lagwi mene omanogo inom seberogo wesugun enggere senggerogo yaganisani. A'nogo hilingisugun halok he At Allah nen nit ninoba wene ekhe fagain mondok lek,” iluk isukwa.

¹⁵ Andi isukwama re wene a'nogo isukwa mene andi re fano nek anggasukwasik ap ekhe nen an nendawimo enggin nafe iluk ogo ekhe isukwa lek, oba nen he at Yonatan hun Asael amlogo a'nogo inom, Yahzeya hun Tikwa amlogo a'nogo inom enek he it ap Lewi mene inebe pire, Mesulam inom Sabetai inom andem en inendawimo kagalhukwama re, a'nogo hilingisugun ninabit isukwa.

¹⁶ It afuni hele warogo fisa lagaukwama nen wagaukwa mene omanogo nen he wene hilingisugun mene iluk isukwa mene a'nogo higithogo hilingitu aple nen he, at imam Ezra nen he afuni inunggulenu lombok omanogo nen kepala fisilik lagaikhesik he it inenu palhigik filik lagaikhe. A'nogo hilingitukwasigen he tugi 10 mene tanggal 1 ba kwi lagunem he wene a'nogo pilingisuogeluk kabogetukwa.

¹⁷ Kabogetukwasik werek kwelek enek he tugi henaganek mene folelogo ombo'ne mene nek he it aben hemi inunggulenu endakwe mene woginafukwa mene omanogo mondogat inawene pilingisogo legaberik lagaukwa.

It ap inagagwi endakwe mene woginarek welagaukwa mene a'nogo

¹⁸ It inagagwi inunggulenu endakwe mene woginarek welagaukwa mene a'nogo inenu palek he yi: It ap imam mene inunggulenu lomboget higik ineisok erokwe lombok he: Yosua mene ineisok erokwe lombok agaila'lak inom, Yozadok againafuri: Maaseya, Eliezer, Yarib, Gedelya inom andoma.

¹⁹ Iren he, nit ninogagwi herak fisogoin iluk weinama fagetukwasik he, nit ninaweak legaphogo iluk domba ai mene ekhe warogo nolhukwa.

²⁰ It Imer mene ineisok erokwe mene nen he: Hanani inom Zebaja inom.

²¹ It Harim mene ineisok erokwe mene nen he: Maaseya, Elia, Semaya, Yeiel Uzia inom.

²² Pasyhur mene ineisok erokwe mene nen he: Elyoenai, Maaseya, Ismael, Netaneel, Yozabad, Elasa inom.

²³ It ap Lewi mene nen he: Yozabad, Simei, Kelaya, (enu ekhe Kelita ikhi lagaukwa,) Petahya, Yuda, Eliezer inom.

²⁴ It wuni watu inap he: Elyasib It o Tuhan Awi wuri'mo ebekhalem kagalek werek mene nen re: Salum, Telam, Uri inom.

²⁵ It afuni Israel mene fenakwe nen he: It Paros eisok erokwe mene nen he: Ramya, Yezia, Malkia, Milyamin, Eleazar, Malkia, Benaya inom.

²⁶ It Elam eisok erokwe mene nen he: Matanya, Zakharia, Yehiel, Abdi, Yeremot, Elia inom.

²⁷ It Zatu eisok erokwe mene nen he: Elyoenai, Elyasib, Matanya, Yeremot, Zabad, Aziza inom.

²⁸ It Bebai eisok erokwe mene nen he: Yohanan, Hananya, Zabai, Atlai inom.

²⁹ It Bani eisok erokwe mene nen he: Mesulam, Malukh, Adaya, Yasub, Seal, Yeramot inom.

³⁰ It Pahat-Moab eisok erokwe meneba nen he: Adha, Kelal, Benaya, Maaseya, Matanya, Bezaleet, Binui, Manasye inom andem.

^31-32 It Harim mene ineisok erokwe meneba nen he: Eliezer, Yisia, Malkia, Semaya, Simeon, Benyamin, Malukh, Semarya inom.

³³ Hasum eisok erokwe meneba nen he: Matnai, Matata, Zabad, Elifelet, Yeremai, Manasye, Simei inom.

^34-37 Bani eisok erokwe nen he: Madaai, Amram, Uel, Benaya, Bedeya, Keluhu, Wanya, Meremot, Elyasib, Matanya, Matnai, Yaasai, inom.

^38-42 Binui eisok erokwe nen he: Simei, Selemya, Natan, Adaya, Makhnadbai, Sasai, Sarai, Azareel, Selemya, Semarya, Salum, Amarya, Yusuf inom.

⁴³ Nebo eisok erokwe nen he: Yeiel, Matica, Zabad, Zebina, Yadai Yoel, Benaya, inom.

⁴⁴ It ap inebe mondogat andi nen he hemi inunggulenu endakwe mene woginafukwa ma re, hemi omanogo mondogat herak fisilik lagaukwasik he, inagainafuri inom mondogat mugusogo wulaginafukwa.