EZRA 1 - Allah Wene Fano Wene Hupla Inane

Raja Kores nen he, ”Afuni Yahudi mene inambotkwe inaiba loago,” iluk wene ero wulafikhe wene

¹ Afuni o Persia mene inoe raja enu Kores andi menlagaikhesik oba, tahun attak welagaikhe andiba, At Tuhan nen wene ap at ane yagaisikhi lagaikhe agun Yeremia a'nogo yagatikhemo isikhe mene ebe asuageluk, ap Kores andi endawimo kagalhikhe. Endawimo kagalhikhemo, aren o yi awi ti awi ferinarek welagaikhe kwe lombok, enu salik loageluk wene yi'nogo wulafikhe:

² ”An he, hit afuni o Persia mene hinoe raja nenu Kores nen wene mel yagahisak: Tuhan Allah ebe pogoroba logolik, yi mene ti mene enggiba welagarek mene nen, an arat kweangma yoma yi awi ti awi mondogat faget inoe raja logouwagaluk menagaisogo nobagaikhesik, At ebe awi wuri'mo nen fogerati logogun oba, o Yerusalem afuni Yehuda mene inaiba andoma wusuageluk nayonggo fikhemo welagi o.

³ Andi nen he, At Allah againafuri hilinglagagip mene andoma re, hineisena Allah nenat fethinarek logouwago. Hit At againafuri mene andi re, ineisena Tuhan Allah o Yerusalem welagarek mene andi, Awi wusubagaigen he, hinambotkwe o Yerusalem lano o.

⁴ A'nogo lagunem andi re, hit ekhe sa nen, Allah againafuri mene o yoma woginarek wagaukwama o yi awi ti awi hinom welagep mene andoma inebe lombok, it leberisouwogeluk yi mene ti mene lek mene andi, uang, perak mene inom, emas mene inom, inamburu ebekhalem nogoin mene inom, wam woginarek logoin mene inom, ekhe wogisilik lano o. A'nogo wogisikhi logolik, ekhe re, yi mene ti mene Allah awi o Yerusalem andi wusuageluk inomat hinendawinggen oba nenat fisano aro,” iluk wene wulafikhe.

⁵ Wene a'nogo wulafikhemo, it afuni inunggulenu Yehuda mene, Benyamin mene, inogogwi kaindek inom, ap imam omanogo inom, ap Lewi mene omanogo inom, nen it afuni ekhe inebe lombok Allah nen inendawimo kagalhikhe mene omanogo mondogat Allah awi o Yerusalem a'nogo wusi wesuogeluk inasunggwe tegelogo fesukwa.

⁶ A'nogo tegelhunem, it afuni it inom welagaukwa mene omanogo inebe mondogen he, inangge yi mene ti mene emas, perak meneba hilingik mene omanogo inom, ekhe yi mene ti mene amu mene omanogo inom, inamburu ebekhalem nogoin mene inom, wam woginarek wesugun mene inom, yi mene ti mene onggo hokho mene ekhe inom, wogisasukwasik, oba loukhogoat Allah awi wusugun mene faget ekhe inendawinggen oba nenat wogisasukwa.

^7-8 A'nogo wogisasukwama, at Kores nen he, yi mene ti mene hokhorogo Allah awi wuri'mo o Yerusalem Allah faget hilingisuogeluk wanhi lagaukwa mene omanogo, ap raja Nebukadnezat a'nogo nen waluk o Babel lagaikhesik he, at andugwi kembu fogerati lagaikhe mene ailoba fesikhemo were'ma, wulabi wesuageluk, afuni o Persia pemerintah ba faget inauang tegelhi lagaikhe agun inoe kain enu Mitredat andi ayonggo fesikhe. Ayonggo fesikhemo aren he yi mene ti mene omanogo mondogat wenagaisogo re, enu palhigik ap Sesbazar gubernur o Yehudaba welagaikhe agun a'nogo eilenggen hoageluk yi'nogo palhikhe.

^9-11 Allah faget hilingiti logolik i keralogo nunggu mene mangkok emas mene re 30 nen, perak mene 1.000 nen, ekhe mangkok hunogoat mene 29 nen, mangkok magandek mene emas meneba hilingik mene re 30 nen, perak mene hilingik mene re 410 nen, yi mene ti mene fena ekhe 1.000 nen mene, enu palhigik fesikhe. Yi mene ti mene andi mangkok emas mene inom, perak mene inom, yi mene ti mene fena amu mene mondogat lambukhogo re, 5.400 nen mene wenagaisogo enu palhikhe andi. Yi mene ti mene andi mondogat he, afuni o Yehuda mene inoe gubernur enu Sesbazar a'nogo wogotikhemo, aren afuni Israel mene o Babel woginarek lagaukwama welagaukwa mene omanogo inambotkwe o Yerusalem woginarek waga logolik andoma inomat waluk wagaukwa.