ESTER 9 - Allah Wene Fano Wene Hupla Inane

Afuni Yahudi inaben it inaselei mene mabenet fisikhi lagaukwa wene

¹ A'nogo hilingiti lagaukwasik hiling-hiling he tugi it inane bare Adar ikhi lagaukwa mene a'nogoba, tanggal 13, linggene at raja nen it afuni Yahudi mene inoasugun oba iluk wenagaisogo fesikhe lingge a'nogo higit asi lagaikhe. Nen it afuni Yahudi mene sebelinarek logolik inaseleirogo welagaukwa mene omanogo nen he linggene andi weak-weak asi lanik agwi iluk nenangotu welagaukwa. Oba nen he linggene a'nogoba re it ap Yahudi mene nen it inaselei inomame leget fisasukwa.

² O kota-kota it Yahudi mene werekwe omanogo bene it inaselei mene nen inoasuogeluk inanini inoba fuluk hilingitunem he it inebe andoget la'luk misik lambulaga lagaukwa. A'nogo hilingitunem he afuni inunggulenu inap werek mene omanogo nen inailo nek a'luk ap misigen ekhe ambong serogo it inelokhoma asilare elo'luk aga lagaikhe.

³ O propinsi andomaba a'ma yi kain ti kain welagaukwa mene inom, bupati inom, nen ap hun raja a'ma logolik yabu hilingiti lagaukwa mene inomen ogore, hun Mordekhai ba inailo logolik he afuni Yahudi mene leberisikhi lagaukwa.

⁴ Afuni yi kwe ti kwe werek mene omanogo nen he hun Mordekhai andi re hun raja aiba andoma aren hilingiti lagaikhe mene faget enu laga lagaikhe agun. A'nogo hilingi'mo re at ebe ekhe inom amane arik mandok laga lagaikhe.

⁵ A'nogo hilingiti logolik he, afuni Yahudi mene nen it inaselei mene omanogo inoba, iren hilingisugun anggugu mene omanogo nek hilingiti lagaukwa. Nen iren he ap inaselei mene omanogo were'ma kwi laluk he inebe karok oba pinggi inoati lagaukwa.

⁶ A'nogo inoati logolik he, o Susan kota eroma a'nogo mene re it afuni Yahudi mene nen he ap inebe 500 nen inoatukwa.

^7-10 Nen it ap inoatukwa mene andoma inanggele'ma nen he hun Haman at Hamadeta amlogo afuni Yahudi mene inaselei hokho agun a'nogo againafuri inebe nomolo nen omanogo inom inoatukwa. It wa'lagaukwa mene andem inebe re: Parsandata, Dalfon, Aspata, Porata, Adalya, Aridata, Parmasta, Arisai, Aridai, Waizata inom, inoatukwa. A'nogo inoatukwaba nen he afuni Yahudi mene nen, it inangge yi mene ti mene telasukwa lek.

¹¹ A'nogo inoatukwama re linggene a'nogo sambul enek afuni nen he ap inebe o Susan oba andoma nen wa'lagaukwa mene omanogo faget hun raja ba eluet fei lagaukwa.

¹² A'nogo yagasi lagaukwama hun raja a'nogo nen he ratu Ester oba yagati logolik he, ”O Susan mene nek ogore afuni Yahudi mene nen he inebe 500 nen mene inoata, andem he hun Haman againafuri inebe 10 nen aremnogo inomat. Nen o propinsi amu-amukwe omanogo re ninggi'nogo hilingita he ninonggot welago andi; Arigini'mo re yogondak hat he ki mene hamolo welagen? Yaganom. Yaganesigin halok he ebe eberogo nen helagain werek!” iluk yagatikhe.

¹³ A'nogo isikhemo he Ester en onggo ikhi logolik he, ”Neisena haren hendawimo fano anggikhi lagen halok he, afuni Yahudi mene o Susan yoma werek mene re yogondak hilingita andi hakhogo ohealekwe ogore a'nogo hilingisuakhogo yagaisan. Nen ekhe re it hun Haman againafuri inebe warek andi re ap warek eba tugulogo fisagarek oba andoma fisogoin,” iluk yagatikhe.

¹⁴ Andi yagatikhemo re he Ester en kino yagatikhe mene a'nogo hilingisuageluk raja nen afuni yagaisigik, Nen o kota Susan faget lisu palogo wulafik, nen hun Haman againafuri warek inebe nomolo nen omanogo eba porogo fisa lagik, uageluk yagaisasikhe.

¹⁵ A'nogo hilingitukwasik he, it afuni Yahudi mene re tugi Adar a'nogo, tanggal 14 oba inebe o Susan kabogesi wagaukwasik ap o kota andi mene inebe 300 nen ekhe inoatukwa. A'nogo inoatukwasik andi sambul ogo iren inangge yi mene ti mene ekhe telasukwa mondok legat.

¹⁶ Andi hilingitu kwelek he, it afuni Yahudi mene o propinsi amukwe werek mene ogore inebe seberogo kabogetukwasik he inonggwarek inebe inili waganogo re, ap it inoba inabit anggikhi lagaukwa mene omanogo inebe 75.000 nen inoatukwa. Oba nen he inangge re telasukwa legat.

¹⁷ Wene andi hilinglagaikhe re tugi Adar a'nogo tanggal 13 oba agaikhe. Nen linggene ombo'ne mene tanggal 14 oba re iren afuni ekhe inoasugun lek iluk isukwa mene a'nogo ebeti logolik inagaiyekhogo hilingitu welagaukwa.

¹⁸ Oba nen he afuni Yahudi mene o Susan welagaukwa mene andoma nen he ap inaselei mene omanogo tanggal 13 inom 14 inom oba inoatukwasik tanggal 15 oba re palfesukwama a'luk he iren tanggal 15 oba andi re linggene hokho mene iluk ebeti logolik welagaukwa.

¹⁹ Andiba re afuni Yahudi mene o kota endep kwe welagaukwa mene nen he tugi Adar oba tanggal 14 sambul andi re linggene inagaiyekhogo hilingituba iluk seni pesta isati logolik nunggungge sumbut-sumbut agu sambul iluk ebetu welagaukwa.

Linggene Purim a'nogoba ebeti lagaukwa wene

²⁰ A'nogo mondogat hilingitukwasik he, at Mordekhai nen hilinglagaikhe mene omanogo faget mondogat lisu palogo re afuni Yahudi mene mondogat o Persia ba andoma yatkwe mene faget inom horokwe mene faget inom lakfilik lagaikhe.

²¹ Lisu palek andi ebe re yi'nogo palek welagaikhe, ”Tahun hundik-hundik andomaba tugi Adar andi tanggal 14 oba inom 15 oba inom asi lagunem he ebetu mondok logogun,” iluk palek welagaikhe.

²² Andi re linggene andi sambul enek iren afuni inaselei mene omanogo mabenet fisasukwama it inendawi heiselogo ou hugu welagaukwa. A'nogo welagaukwa mene a'nogo obali'mo re inagaiyek hasukwa mene andi faget hilingiti logogun isukwa. Andiba linggene andem oba re iren seni isatik, i sumburu nouwogeluk misi'mo kabogetik, nunggungge sumbut-sumbut agik, afuni inenggi lek meneba inangge wogisigik, hilingiti logouwogeluk isukwa andi.

²³ Afuni Yahudi mene nen he at Mordekhai nen hilingi'no iluk yagaisasikhe mene a'nogo hologo hilingitukwama re, iren ebeti lagaukwa mene andi re inetokhogo yi tahun ti tahun a'nogo nek hilingitu mondok werek.

Wene elugun warogo agaikhe wene

²⁴ At Haman hun Hamedata amlogo, hun Agag ambisangma mene, afuni Yahudi mene inaselei hokho mene andi nen he, afuni Yahudi mene mondogat leget fisagain iluk wene isikhesik he, aren linggene inoasugun oba enek asuageluk he, enegengge walhikhi lagaikhe mene enu ”Purim” andi waletikhe.

²⁵ Oba nen, he Ester en hun raja were'ma yagasi kwisikhemo re, raja nen wene melalek palogo wulafikheba re, at Haman onggwarek oba asi wagaikhemo, andiba at ebe inom, it againafuri re e ap porogo fisagarek oba omanogo porogo fisasukwa andi.

²⁶ A'nogo hilingitukwa andiba re linggene hokho sambul iluk ebeti lagaukwa mene andem enu re Purim salhukwa. surat hun Mordekhai nen palhikhe mene inom,

²⁷ ekhe mene ekhe mene afuni Yahudi mene hilinglagunem ineilenggen hasukwa mene inom oba ambisangma nen he, iren it inonggwarek faget inom, it inambisangma mene faget inom, afuni inunggulenu amu mene nen inunggulenu Yahudi meneba kwi wesugun mene faget iluk inom hilingiti logogun mene iluk palfesukwa. Wene melalek palfesukwa mene andiba re linggene pire hun Mordekhai nen wenagaisogo fesikhe mene andem oba re tahun hundik-hundik afuni Yahudi mene nen herakfigi'lek ebetu mondok logogun, iluk palek welagaikhe.

²⁸ Andi nen ekhe melalfisikhi logolik he, ”Linggene Purim andem he afuni Yahudi mene nen eberek mondok logolik he ap Yahudi mene ineisok erokwe lombogen inom, nen afuni ekhe wagik ekhe wagik wesugun mene nen ogo re o kota kwe inom, o propinsi kwe inom werek mene nen ogo eberek mondok logolik hilingiti logogun o,” isukwa.

²⁹ A'nogo isukwasik surat hun Mordekhai nen andi inom he, he ratu Ester at Abihail a'logo a'nogo nen he surat Mordekhai nen palhikhe mene a'nogo omamerogo iluk he surat pirenek mene linggene Purim andiba hilingiti logogun mene faget iluk palhikhe.

³⁰ A'nogo palhukwasik he lisu palek a'nogo afuni Yahudi mene werek kwe mondogat wulafukwasik, palek a'nogo kwelakhigik palhukwa mene re o Persia kweang andiba nen propinsi 127 nen omanogo bene mondogat wulafukwa. Surat andiba re, ”It afuni Yahudi mene inebe fanorogo nek logolik, inailo legengge logouwak,” iluk palogo wulafukwa.

³¹ A'nogo lakfikhi logolik he, it afuni Yahudi mene inom it inambisangma mene inomen he linggene Purim andiba higit agu mene aremnogoba re, iren inambe heang logolik inom, nen fongma logolik inom ebetarek hakhogo ebeti logolik enek logogun, iluk hun Mordekhai inom, he ratu Ester inomen he surat a'nogo palogo wulabik lagaukwa.

³² Nen he Ester en linggene Purim andi faget hilingiti logogun mene iluk wene melalogo yagaisasikhe mene andoma re buku ba palfesukwa.