ESTER 8 - Allah Wene Fano Wene Hupla Inane

Afuni inunggulenu Yahudi mene inonggwaregen inili helikhi logogun fano iluk yagaisasukwa wene

¹ A'nogo hilingitukwasik linggene a'nogo sambul he raja Ahasyweros nen afuni Yahudi mene inaselei hokho mene hun Haman a'nogo angge yi mene ti mene omanogo mondogat ratu Ester wogetikhe. Nen at Ester en raja oba yagati logolik he, ”Mordekhai andi re an nerei, neisena agoren tago mene,” iluk yagatikhemo re, aremnogoba nen he at Mordekhai re, kwi wesuageluk woleti lek kwelek ogore raja were'ma elok kwikhi logouwageluk yagatukwa.

² Nen raja nen cincin Haman wogetikhe mene enggi sehelet oba kwelabek welagaikhe mene a'nogo ambotkwe oak waganogo helasikhesik aren he hun Mordekhai wogetikhe. Nen he Ester en he at Mordekhai re Haman angge yi mene ti mene omanogo eisena a'luk halhi logouwageluk menfesikhe.

³ A'nogo hilingitukwasik he at Ester a'nogo raja were'ma kwi lagaikhe. Kwi lagaikhesik he Ester a'nogo nen, ”Haman nen afuni Yahudi mene inoasigin iluk weim abok ikhe mene andi leget fein o,” iluk le yagaisogo eindep awi yakfuluk elokhe sogoum logolik yagatikhe.

⁴ A'nogo yagatikhemo re raja nen tomuk emas mene a'nogo he Ester oba tibet fesikhemo, he Ester a'nogo menlagaikhesik at oba yagati logolik he mel isikhe,

⁵ ”Neisena, haren an hendawi nealuk, hendawimo hagaiyek noba fikhi lagen halok inom, nen ekhe an nen yagahesigin mene andi fano anggegen halok inom, hun Haman nen lisu palogo wilafi logolik afuni Yahudi mene o kweang yiba werek mene mondogat inoasuageluk palhe mene andi nekhengge oak wamimbik leget fauwageluk neisena haren lisu palogo wulabin.

⁶ Nen an hamingmingengge nunggulenu mene inom, an nagaila'lak nerugwi inom, inebe mondogat inoatunem andoma re ninggi'nogo kwelaginarek logou hak nogo?” iluk yagatikhe.

⁷ A'nogo isikhemo re raja Ahasyweros nen ratu Ester inom Mordekhai inom inoba ikhi logolik he, ”Eberogo, an nen Haman andi nen afuni Yahudi mene mondogat leget fisageluk hilingiri'lago andi nen ebe warogo figirik angge yi mene ti mene re mondogat he Ester wogeti.

⁸ Oba nen he lisu hun raja enuba palogo raja nen cap fikhemo wulafe mene andi re, niren nekhengge lisogo wanu lek hak. Oba nen he, hiren afuni hinunggulenu Yahudi mene hinebe hilingik welagep mene faget inom, hiren yi hilingisugun fano iluk anggikhi lagep mene inom, lisu mondogat palubagaigen iluk yagahisikhi lagi. Lisu palugun mene andi re an nenuba palimbik he o kerajaan ari enuba enekhogo fili'lagwi mene cap enggi segelet oba senggan a'nogo taget feino,” iluk yagaisasikhe.

⁹ A'nogo yagaisasikhemo re linggene a'nogo sambul enek, tugi henaganek mene enu Siwan andiba tanggal 23 werek kwelek Mordekhai nen he it ap raja obaget lisu palhi lagaukwa inap omanogo inoba re, ”Ap gubernur inom, bupati inom it ap yi kain ti kain inom o 127 propinsi, o India nen he Sudan huliba werek mene omanogoba surat palogo wulabini. Surat andi palhi logolik he it o propinsi andoma nen inane unggut inom, lisu palharek mene inom higithogo nek palino,” iluk yagaisasikhe. Nen aren he it afuni Yahudi mene inobaget it inaneba lisu palogo wulabik lagaikhe.

¹⁰ Surat palhukwa mene andomaba re at Mordekhai nen raja Ahasyweros enuba palhikhesik he kerajaan andi enuba cap taget fesikhe. A'nogo hilingitukwasik he at Mordekhai nen he ap yonggo mene wam kuda hun raja nen weak-weak lagarek mene omanogo ekheba lagasikhesik he surat andi o kweang andi bene sumborogo wulabik loageluk lakfisilik lagaikhe.

¹¹ Surat palek a'nogoba ikhi logolik he, ”Afuni Yahudi mene kota ekhema-ekhema welagep mene andoma hinebe misik sebe uluk he hinonggwarek faget hinili helano. Nen hit ambi afuni inunggulenu amukwe nen ogo nen kerajaan amukwe nen ogo ap sikhe fisogo inaben ogo hinoasugun iluk wagu halok he, hiren ap hinaselei mene andoma hineil futfisaluk he it inebe inom inagagwi inom inagainafuri inom, andoma inoasugun fano nek, iren he ap inaselei mene andoma hele warinabimbik it inangge yi mene ti mene andoma telogoin fano.

¹² Wene melalek yire at Haman nen linggene afuni Yahudi mene inoasugun iluk, tugi Adar 12 meneba were'ma tanggal 13 oba wene melalek yire o kerajaan Persia ba yoma mondogaren hilingisugun.

¹³ Surat palek andi re wene ero lego mene iluk palogo wulak fuluk he, linggene andiba tip iwagu halok he it afuni Yahudi mene inaselei mene inoasugun mene faget fik-fukhogo logouwageluk he wene wilabugun,” iluk palek welagaikhe.

¹⁴ A'nogo palhukwama re, raja nen yonggo lakfisasikhe mene omanogo weak-weak lani iluk yagaisasukwama kuda raja nen meneba lagasukwasik lagaukwa. Nen it a'nogo lagu kwelek he o ibu kota Susan oba andoma ogo wene a'nogo lenggalik lagaukwaat.

¹⁵ A'nogo hilingitukwasik he, at Mordekhai a'nogo raja ebe were'ma omanogo herakfuluk he su ap raja nen laberek mene eil heiselek weak mene inom, kut mene inom, oba selebensek engge a'nogo inom, su jubah yo lenan eil sakhorek meneba ugungge a'nogo inom, mahkota emas meneba hilingigengge eil ebe mene a'nogo inom pukhogo wulibi wagaikhe. A'nogo wulibi wagunem he afuni o kota Susan oba welagaukwa mene omanogo mondogaren inagaiyegeti logolik he inamit-mit suphogo inanggiluk eti lagaukwa.

¹⁶ A'nogo hilingitukwama re afuni Yahudi mene omanogo re inendawinggen yamuk igik, inagaiyegetik, inalong anggigik, hilingitukwa.

¹⁷ Andi hakhogo re, it afuni Yahudi mene werekwe o kota ebe lombok inom, propinsi ba inom, o ekhema-ekhema inom omanogo surat raja nen enu salik loageluk wulafikhe mene a'nogo enu salik lagaukwama inesanggo holhukwa kwe omanogo re inagaiyek hokhorogo hilingitukwasik he seni isarik lagaukwa. A'nogo hilingitunem he afuni o andoma mene it Yahudi mene inoba inailo welagaukwa mene omanogo re nit hit Yahudi mene ninom asugun o, iluk it inoba sebesi wagaukwa.