ESTER 7 - Allah Wene Fano Wene Hupla Inane

¹ Ma re inenggi pirenek meneba re at Haman inom raja inom he Ester en seni isagoma a'nogo i inom, sumburu inom, nasukwa.

² It aremnogo inom seberogo anggur ninggi logolik, at raja nen he Ester oba heinok wokhikhi logolik he, ”He yi, nagwe ratu, hat he nenamene hamolo anggikhi lagen? Yaganom! O an nen melalinafi lagimo oma tulem heirogo minggirogo wo'nom igin halok ogo eberogo at wokhesigin.” O iluk yagatikhe.

³ Andi isikhemo raja agwe ratu Ester a'nogo nen onggo ikhi logolik he, ”Neisena, hat raja nen fano anggikhi lagen halok he, An hamingmingengge inom it an hamingmingengge nunggulenu mene inom, nineluk logogun fano.

⁴ Nen an hamingmingengge inom, nen it an hamingmingengge nunggulenu mene inom he pinggi inoasugun iluk onggo palninafa andiba igi. Nen nit we inamingmingengge ap ninabuogeluk onggo hunninaple'ma nen he ninane lek logolik nineisena hat nit hamingmingengge nen hane yinghafi lago mene ari, a'nogo hilinghafi logoilo lek. Oba nen he nit ninebe mondok legaphogo ninobagauwogeluk hilingitu nen welago!” iluk yagatikhe.

⁵ Andi isikhemo raja Ahasyweros nen ratu Ester oba heinok wokhikhi logolik he, ”Andi re ap sa nen ambong serogo hilingisu hak nogo? Nen ap andi re ebe koma werek?” iluk heinok wokhasikhe.

⁶ Andi isikhemo Ester en onggo ikhi logolik he, ”Hun Haman anini mondok weak agun ari re nit ninaselei mene logolik, nit ninoasigin iluk hilingiri'lago mene werego!” iluk yagatikhe. Andi isikhemo at Haman a'nogo nen endawimo ailo inom-inom hun raja inom at raja agwe inom kwelagisasikhe.

⁷ A'nogo kwelagisasikhemo re hun raja a'nogo a'mage hokho mene lagasikhesik he e talek era'lu hurek welagaikhengge a'nogo feisakhogo menla'luk he olulu obalik fanorogo pugunse'ma omanogo wulibi lagaikhe. Nen at Haman nen anggikhi logolik he, ”Raja nen he an nebe unggum wo'nesigin higi,” iluk anggasikhesik he at ebe wulibi lagi'lek engge he Ester a'nogo inom hurek logolik he, nagap telnabin iluk yagarik kwikhi lagaikhe.

⁸ A'nogo hilingiti logolik he, at Haman ebe endawimo mondok warikhi logolik he onggwaregen he Ester elokhoma aremnogo nen kweangma weing laga logolik he, he Ester en unggum andi legaphogo nobagauwakhogo iluk kino yagati lagaikhe. Oba nen at a'nogo hilingitu kwelek aremnogo re raja awi olulu nen nekhengge oloba kwi lagaikhe. Kwi lagunemen he at Haman a'nogo hilingitunem hasikhesik he raja nen ane ikhi logolik he, ”Nenamene? Aren he ambong si serogo andoma an nelokhe kwe, nonggwarek nawi polmining nagwe inom sebesugun iluk hilingiri'lago a?” iluk isikhe. At raja ane a'nogo isikhesik werek kwelek aremnogo re it ap inouwali waganek mene yabu raja a'ma hilingiti lagaukwa inap omanogo wagaukwasik he Haman eil sali wagaukwa.

⁹ A'nogo hilingfuluk, hun Harbona, it ap yabu raja a'ma hilingiterek agun wagaukwa mene omanogo misik ekhe nen ikhi logolik he, ”Neisena, hun Haman awi lilu andoma re e ap homagaisogo fisagarek mene waganek mene liabek uanhogo re 25 meter en hilingik engge ekhe werek. E hilingik engge andi re hun Mordekhai neisena hoa'lep mene telhafe agun a'nogo warogo eba fogoin mene iluk menogo fikhe mene werek.” iluk yagatukwa. Andi isukwama at raja nen mingminginafi logolik he, ”At Haman andi re e kigilogo werek mene andiba porogo fei lani!” iluk yagaisasikhe.

¹⁰ Andi yagaisasikhemo re, iren hun Haman a'nogo e hilingik hun Mordekhai warogo fuguba iluk fougetikhe mene a'nogoba paku warogo fei lagaukwa. A'nogo hilingitukwama nek he raja a'mage lagasikhe mene a'nogo lombuk isikhe.