ESTER 6 - Allah Wene Fano Wene Hupla Inane

At raja nen Mordekhai legeisogo fesikhe wene

¹ A'nogo yagatikhemo hup a'nogo sambul he hun raja ebe hup nogo u elo'lek aga lagaikhemo re, aren buku attak hilingiti lagaukwa mene o kerajaan andiba palogo welagaikhe mene omanogo ap ekhe nen enu salogo pilingisuageluk yagaisasikhe.

² A'nogo yagaisasikhemo enu salhunemen he, it ap inouwali waganek logolik yabu tukhogo hilingiti lagaukwa mene, hun raja ebe nogoli'lagoba a'nogo faget kagalek welagaukwa inap, hun Bigtan inom Teres inom aremnogo nen he hun raja ebe wasugun iluk abok palhukwa mene faget hun Mordekhai nen eluabet fesikhe mene a'nogo palek were'ma hasikhe.

³ A'nogo were'ma hasikhesik he, at raja nen heinok wogisikhi logolik he, ”At Mordekhai nen hilingitikhe mene andi faget onggo wogetik, nen hai warogo legeisogo figik he hilingita?” iluk heinok wogisasikhemo, it amingmingengge obaget hilingiti lagaukwa mene omanogo nen yagati logolik he, ”At he yi mene ti mene ekhe iluk ogo wogetukwa lek,” isukwa.

⁴ A'nogo isukwama at raja nen he mel isikhe, ”O yogondak an nawi istana ba andoma pegawai an nagoromi mene sa werek?” iluk isikhe. At a'nogo ugu kwelek aremnogo at Haman a'nogo nen he, ”Ap Mordekhai a'nogo ebe warogo e wendeberogo fesikhe meneba teisalogo fagain,” iluk raja elurogo yagasigin iluk he o raja ebe werek oba awi silimo omanogo kwi lagaikhesik heinok wogisasikhe.

⁵ A'nogo heinok wogisasikhemo, at raja amimingengge omanogo nen ikhi logolik he, ”Haman he nineisena hat hambit kwi wesigin iluk wagasik olulu werego,” iluk yagatukwa. A'nogo isukwama at raja nen he, ”Kwi wesuakhogo yaga'ni,” iluk yagaisasikhe.

⁶ Andi isikhemo re at Haman a'nogo kwi lagaikhemo hun raja nen ikhi logolik he, ”An nen he ap ekhe heragaisogo menfeile iluk anggikhi lagi, enggere ninggi'nogo heraginabu hak?” iluk yagatikhe. A'nogo yagatikhemo at Haman nen wenggelhi logolik he, raja ap ekhe heragaisogo menfagain ikhe andi re ap arem he sa ekhe werek engge halok? We An nobaget ikhe!” anggasikhe.

^7-8 A'nogo anggasikhesik aren onggo ikhi logolik he, ”Ap andi obaget he su hokho asu hun neisena honggwaregen labeti lagen mene a'nogo wani laluk he, kuda neisena haren mene a'nogo bene re mahkota hak mene omanogoba alilingge waganogo feino.

⁹ A'nogo hilingfuluk he, ap kain mene misik ekhe unggulenu agun su andi hun neisena haren ap heragaisogo menfagain mene andi ebene louget fembik he, wam kuda neisena haren andiba re hondo'luk o kota silikwe laga logogin. A'nogo lagunem he ap kain mene a'nogo ap kuda ba lagu mene a'nogo era'lu laga logolik he, ane yi'nogo ilik laga logogin, ’Aben at raja agaugetfuluk legeisogo fagarek mene inobare re raja nen he yi'nogo hilingfisili'lago!’ iluk ilik laga logogin,” iluk yagatikhe.

¹⁰ Andi isikhemo raja nen Haman oba ikhi logolik he, ”Su andi inom, kuda andi inom weak-weak wani laluk he, hun Mordekhai ap Yahudi agun andiba alonghogo legeisogo fugu mene andi hilingfeino. Andi re misik ekhe pelak figi'lek, haren egen mene aremnogo higithogo nek hilingi'no. Nen at ebere o raja awi silimo kwe kwi weri'lagwi meneba ebekhalem en elokhoma hurek were'ma hagain logou hak,” iluk yagatikhe.

¹¹ Andi isikhemo re, at Haman nen he su labetu mene inom, kuda inom, omanogo wanhikhesik he su a'nogo hun Mordekhai ba labet fesikhe. Labet fesikhemo at Mordekhai a'nogo kuda ba lagasikhemo re, o kota silikwe hondo'luk laga logolik he yi'nogo ilik lagaukwa, ”Futfeni! Ap he hun raja esinetfuluk legeisogo fagarek mene inobare yi'nogo legeisogo fisikherego,” ilik lagaukwa.

¹² A'nogo hilingirik lagaukwasik he at Mordekhai a'nogo nekhengge hun raja kwikherek oba solombonma omanogo wagaikhe. Oba nen he at Haman a'nogo re we halek legengge afuni nen ineil neanogo iluk he enggali nen elokhe salogo weak-weak awiba lagaikhe.

¹³ Lagaikhesik he aren agwe inom agaila'lak inom inoba re wene agaikhe mene omanogo mondogat tindelisasikhe. A'nogo tindelisasikhemo it at agwe inom nen agaila'lak inafe hebelek inap omanogo inomen ikhi logolik he, ”Hun Mordekhai andi re, Yahudi agun hilingik enggere haren at sebelogo fou lek hak, aren hat halong legaphogo hobagau hak. Nen eberogo nen he aren hat homame leget hobagau hak andi,” iluk yagatukwa.

Haman ebe pinggi watukwa wene

¹⁴ It a'nogo Haman inom inane matu kwelek he ap inouwali waganek mene yabu hun raja aiba hilingiti lagaukwa mene omanogo re halek legengge at homan hondo'luk he Ester en seni isagoma a'nogo waluk logoin iluk wagaukwa.