ESTER 5 - Allah Wene Fano Wene Hupla Inane

He Ester en hun raja inom Haman inom aseni isagoma na we'no iluk inayonggo fesikhe wene

¹ At Ester ambe heang welagaikhesik linggene henaganek mene a'nogoba re asu raja inagagwi nen labetarek asu a'nogo laberogo re, o hun raja ebe were'ma a'nogo nen elokhoma omanogo lagaikhesik he kwe hun raja kwikherek kwe a'nogo mendek logolik welagaikhe. Nen at raja re hu'lagungge takhta a'nogoba kwe sou esanggo fikhit hurek welagaikhe.

² A'nogo hurek logolik kwelakhugunemen he, he Ester a'nogo enda'ma mendek were'ma hasikhesik at raja nen, he a'nogo endawiratikhesik he arige tomuk emas mene a'nogo waganogo re oba tibet fesikhe. Tibet fugunem he at Ester a'nogo higilogo menlasi wagaikhesik he, sige tomuk a'nogo wurep sen fei wagaikhe.

³ A'nogo sen ha wagaikhemo re at raja nen heinok wokhikhi logolik he, ”Nagwe hat he wene ninggi'nogo mene ekhe weregen wagen? Nen nena mene ekhe hamolo anggegen? Yaganom o! Haren an nawi kerajaan melalinafi lagi mene yi faget heirogo minggirogo an wo'nom iluk yaganesigin halok mene ogore an nen wokhesigin enego,” iluk yagatikhe.

⁴ Andi isikhemo at Ester en onggo ikhi logolik he, ”Neisena, haren fano iluk yaganesigin halok he, o yogondak hup yiba re an hamingmingengge nen seni pesta neisena hat inom, hun Haman inom hinobaget isasigin enggere wesubagaigen iluk yagahesi wagi o,” iluk yagatikhe.

⁵ A'nogo yagatikhemo re raja nen he, he Ester en inayonggo fisasikhe mene omanogo inom louwogeluk he Haman weak-weak wesuageluk ayonggo fesikhe. Fesikhesik he it a'nogo he Ester en seni pesta isatunem a'nogo wagaukwa.

⁶ Wagaukwasik he, it inebe anggur agai ninggi logolik aremnogo re, at raja nen Ester oba re mel isikhe, ”Yogondak hat hendawimo hamolo anggegen mene andi an yaganom o. Haren o an nen melalinafi lagi mene yi faget tulem minggirogo an wo'nom iluk yagaten halok mene ogore wokhesigin enek!” iluk yagatikhe.

⁷ Andi isikhemo he Ester en onggo ikhi logolik he,

⁸ ”Neisena, haren hendawimo fano anggegen halok he, an hamingmingengge nen yagahesigin mene yi holin o. Neisena, hat inom Haman inom he an nen seni o hobit hup isasigin mene andiba wesugun fano. Seni andi ninggi logolik enek he, an hamingmingengge nen ti mene namolo iluk hoba yagahesigin.” iluk yagatikhe.

Haman nen hun Mordekhai wasigin iluk wenggelhikhe wene

⁹ A'nogo isikhemo re, Haman a'nogo he Ester en seni isatikhe mene omanogo naluk ambotkwe waga logolik he endawimo hai en agaiyegerik wagaikhe. Oba nen he at Haman ebe o raja were'ma kwi laguba solombonma aremnogo asi lagaikhesik hilingitunemen he, at Mordekhai nen he menla'luk at agaukhogo legoisogo figi'legengge were'ma hasikhesik he, at a'mage hokho mene lagasikhe.

¹⁰ Oba nen he aren yi'nogo ti'nogo ekhe hilingiti'lek sebel fakhasikhesik he aiba lagaikhe. Lagaikhesik at Haman nen he agaila'lak omanogo wesuageluk inayonggo fesikhesik he, at agwe Zeres a'nogo ogo it inom seberogo hurek logouwageluk yagatikhe.

¹¹ A'nogo hurek were'ma re, at Haman eranen wene kagalogo yagaisikhi logolik he angge yi mene ti mene werek mene faget inom, amlogomi alage mene hokhorogo werek mene faget inom, raja nen yabu legoma logouwageluk wogetikhe mene faget inom, it pegawai amu mene inunggulenu sebelek kwelek at enek he unggulenu lego mene welagi iluk inom, onggwaregen leget fakhikhi logolik yagaisasikhe.

¹² A'nogo yagaisasikhesik aren ekhe inom ikhi logolik he, ”He Ester en ogore we an ninom hun raja inom enek seni nit ninobaget isate mene andi na wesuageluk ninayonggo fikhe, nen o hobit hup ogore nekhengge nit ninayonggo fikheat.

¹³ Oba nen he, at Mordekhai ap Yahudi mene andi, o raja kwikherek oba ebekhoma aremnogo hurek werek kwelek he yi mene ti mene omanogo re noba wuri'lago lek.” iluk isikhe.

¹⁴ A'nogo isikhemo holhukwasik he at agwe inom at agaila'lak omanogo inomen he wene yi'nogo yagatukwa, ”Aben e liagaisogo ap inebe eba porogo fisugu mene uanhogo re 25 meter en hilingisuageluk yagaisan. A'nogo hilingfembik he e andiba at Mordekhai andi paku warogo eba fouwageluk at raja ba kino yaga'no. A'nogo hilingiten halok enek he hat hebe seni andiba hendawinggen hambukhogo nagain.” iluk yagatukwa. A'nogo yagatukwama re, at Haman nen he wene noba aga mene andi re fano anggasikhesik, aren he e ap paku warogo fisagarek mene a'nogo weak-weak hilingisuageluk yagaisasikhe.